Itulau i le Lotoifale
O Le Autalavou o Falani Polenisia o loo Faasoa Maia le Alofa Sili Atu o Iesu Keriso
E 800 talavou mai aulotu Kerisiano eseese ua auai i le konaseti o faatuatuaga eseese i le Eseta
Sa auai autalavou mai aulotu Kerisiano eseese e lima mo se aso o musika, faatuatua, ma le lotogatasi i le Aso Gafua o le Eseta 2025.
Na faia lea gaoioiga i fafo i le aso 21 o Aperila i le Paka o Paofai, Papeete, Tahiti.
E tusa ai ma se tasi o e na faamaopoopoina, o Hina Brodien, “E ui lava ina timu, ae e silia ma le 800 tagata talavou na auai, ma faatinoina se gaoioiga faaleagaga mamana tauaofai. O le sini ia faamalolosia le faatuatua o tagata talavou ma tuufaatasia i latou ia Iesu Keriso. O le konaseti na faataga ai i latou ia iloa se taimi o le soofaatasi i talaatu o tuaoi faaleaulotu.”
Na faaauau Brodien, “E ala i lo latou aofia ai i musika, aoaoga, ma le pulega o le gasologa o auaunaga, sa latou aoao ai i le galulue faatasi i le Agaga o Keriso.”
O le gaoioiga o se vaega o le faama‘ite o le Eseta i le lalolagi atoa o le “Alofa Sili Atu” na amata e Le Ekalesia a Iesu Keriso o le Au Paia o Aso e Gata Ai, ma sa lagolagoina e tagata o isi aulotu Kerisiano.
I Papeete, na auai ai le autalavou ma talavou matutua mai le Ekalesia Katoliko, le Ekalesia a Ma‘ohi Porotesano, le Ekalesia Aso Fitu, Le Ekalesia a Iesu Keriso o le Au Paia o Aso e Gata Ai, ma le Potopotoga a Keriso i gaoioiga o le aso. Na o mai matua, taitai o autalavou ma uo e tuu mai la latou lagolago.
Sa faatulagaina “Faleie o Fonotaga” i autu faaleagaga (tatalo, faamanuiaga, viiviiga, molimau, faaaumea) na talileleia ai vaega toalaiti o talavou. O faleie taitasi sa talimalo ai aulotu eseese ma maua ai avanoa e aoao ai i faatuatuaga o isi.
Ona aumai faatasi ai lea o se konaseti o faatuatuaga o aufaipese a ekalesia taitasi, ma se vaega fefaasoaai o musika (“Himene Amui”), na aofia ai talavou ma aulotu uma.
E ui i le timuga o le tau i nisi taimi, sa pepese tagata auai ma tatalo faatauanau, ma faaalia ai le malosi o lo latou faatuatua.
E silia ma le 300 le au pepese ma le au faimusika na auai i le konaseti. O le aofia na silia ma le 1,000 e aofia ai ma malo faaaloalogia ma le tusa i le 800 tagata talavou.
Pe tusa ma le 50 volenitia na faagaoioia le faagasologa o le auaunaga, fesootaiga, ma le saogalemu; ma le 13 tagata faamaopoopo mai aulotu e lima na tuufaatasia mea uma.
Na faaalia e le autalavou lagona o le lotofaafetai, saolotoga, ma le mitamitaga i le faaalia lauaitele o lo latou faatuatua. E toatele na maua tagata talitonu i o latou siosiomaga i aoga, ma aveesea ai le faaesea faaleagaga.
O gaoioiga na faamalosiauina ai i latou e tautatala, tatalo, molimau, ma pepese faatasi—ma fatuina ai faigauo fou ma faamalolosia ai a latou ta’utinoga faaKerisiano.
O nisi o manatu faaalia o talavou na auai o loo i lalo:
Tehau Tuki (Lotu Katoliko): “O faleie o se taimi o faasoa ma le lotogatasi. Sa matou faataatia ese a matou tapuaiga ina ia tuufaatasi lo matou faatuatua ia Iesu Keriso. O le konaseti, e ui ina timu, o se taimi tulagaese. E mafai e le faatuatua ona talepe papupuni uma.”
Taharia Asahela (Aso Fitu): “O le po nei, na faatino Iesu. Matou te le‘i pepese mo i matou lava, ae mo Ia. Ia viia le Atua mo mea sa Ia ausia i le aso.”
Tetuanui Maleani (Ekalesia Porotesano): “Faafetai i le Alii mo lenei potopotoga. O i matou o le aiga e tasi ia te Ia. Faafetai atu ia i latou uma na mafai ai ona fai.”
Ueva Teraiarii (Potopotoga a Keriso): “O Ekalesia Eseese, igoa eseese, ae tasi ma o le Keriso lava e tasi. Ia tatou soofaatasi i lenei eseesega mo lo tatou Faaola o Iesu. Ou te alofa ia te outou uma, ia faaeteete.”
Chung-tiem Tehina (O Le Ekalesia a Iesu Keriso o le Au Paia o Aso e Gata Ai): “E ala i afa ma le tai, na faia e le Alii o se po o vavega, olioli, ma le lotogatasi. E leai se mea e le mafai e Le Tasi e silafia mea uma.”
Na faasoa mai e taitai mai ekalesia o latou lagona e uiga i le faapotopotoga:
Vaitoare Alexandre (Potopotoga a Keriso): “Ua Faatasia ia Keriso, o talavou i le lotolotoi, ma le olioli. Amene.”
Marotau Hinatea (Ekalesia Porotesano Ma‘ohi ): “Faafetai atu i taitai uma mo lo latou tuuto ma le faatuatua. Faafetai i le Atua ua mafai ai ona faia lenei gaoioiga i Māòhi Nui. Sa faamau’oaina faleie, e aunoa ma igoa faaleaulotu, na tauaveina e le autalavou malolosi ma faaleuso. O mea sa matou iloaina sa le na o ni su’ifefiloi faalefaatuatuaga—o se faapotopotoga o talavou ua talitonu i le Atua.”
Ortas Manava (Ekalesia Asofitu): “Le Au Pele, ua faamamaluina le Alii e ala ia te outou taitoatasi. . . . Ua matuai talisapaia loloto e o tatou tagata talavou ia taimi e fefaasoaai ai i faleie. A o le’i avea ma ni faifaatufugaga, o i tatou o ni tagata tapuai—ma sa faaalia e o tatou talavou lena mea. Sa matuai faagaeetia o tatou taitai Asofitu sa auai mai. Ia viia le Atua.”
Elder Frédéric Riemer (O Le Ekalesia a Iesu Keriso o le Au Paia o Aso e Gata Ai): “Mo se uluai lomiga ma e ui i le leaga o le tau, ou te manatu sa faamanuiaina. Sa matou lagonaina se faatulagaga sili, o se agaga malosi, ma i luga atu o mea uma, o se autalavou na tuufaatasia ia Keriso.”
Tehei Boniface (Ekalesia Katoliko): “Na ou vaaia se taimi tulaga ese o le faatulagaina o lenei gaoioiga. Na saofagā e tagata uma a latou maa ma simā e fauina ai lenei poloketi o le faatuatua. Aua nei tatou faagaloina o le Atua o le tusiatafale moni lea. I lena aso, sa avea i tatou ma malamalama i se lalolagi na faapouliuligia i nisi taimi e le ita. Se olioli ina a tele i le vaaia o talavou i a tatou Ekalesia o loo talitonu malolosi i lo tatou Alii o Iesu Keriso. O faleie o ni avanoa faamaoni o finagalo faaalia. A o savali faasolo, sa ou vaaia i foliga o talavou se olioli faigofie ma le loloto o le mafuta faatasi ai. O le konaseti . . . o se taimi moni o le faaneetaga. I le mavae ai o vaiaso o tapenaga, o le vaaia o o tatou talavou i luga o le tulaga, sa punouai ma le olioli, o se faamanuiaga tele. Faafetai, le Alii e, mo lenei manavaga o le lotogatasi. Ma faamalo i le ‘au atoa na faatulagaina. Na outou totoina se mea sili.”
Na malilie taitai ma le toatele o talavou ma talavou matutua faapea sa latou mananao e faia lenei gaoioiga faaletausaga e faamalolosia ai le faatuatua ia Iesu Keriso i le salafa o Falani Polenisia.