O Le Atua o Loo i le Foeuli

I le aso 2 o Fepuari i le tausaga nei, sa ma asiasi ai ma Sister Meurs i Warrnambool, Ausetalia, mo le faatuina o le Paranesi a Warrnambool mai se vaega o le uarota a Geelong. Sa o se aso fiafia e toefoi ai i le mea na ou fanau ai, ma vaai i le paranesi sa ou lotu ai a o tama, ua toefaatuina. 

E lua vaiaso mulimuli ane, sa ma lauga ai i faifeautalai i le MTC a le Eria o le Pasefika i Aukilani. Ma te fiafia lava e feiloai i faifeautalai fou ma lagonaina lo latou naunautaiga ma le faatuatua a o amata la latou auaunaga faapaiaina. Sa ese le faapitoa o lea faamoemoe ona sa valaauina Harrison Snow, o le tama tama a lo ma afafine i le Misiona a Ausetalia i Melepone—ma o ia o se tasi o na faifeautalai. 

Na faaopoopo i lo ma olioli, sa tofia Elder Snow i Warrnambool o lana eria muamua lea. Sa tonu ia te au e auina atu ia te ia se tala i le ala na auai ai lo matou aiga i le Ekalesia iina. O se vaega lenei o le mea sa ou faasoa atu ia te ia. 

O le tama o lou tama-matua, o Frederick Michael Wilhelm Meurs, na fanau i Holani i le 1926. O ia o se tasi o le fanau e toa 12. O lona tina o se Katoliko tuuto, sa na ia aveina lana fanau i misasā i Aso Sa taitasi. Sa auai Fred i aoga Katoliko ma sa atiina ae se faatuatua loloto ia Iesu Keriso ma se fiafia i tusitusiga paia. 

O le tina o lou tina-matua, o Lois Ellen Meurs, sa fanau foi i le 1926 i Warrnambool. E toalua ona tuagane, o Ralph ma David, ma sa ola a‘e o ia i se aiga faatuatua Metotisi. Sa ia faamemelo i le auaunaga agaalofa a ona matua ma sa atia‘e ai se faatuatuaga malosi faaKerisiano. 

Sa faaipoipo Fred ma Lois i Warrnambool ia Fepuari 1954. Sa fanau mai Julie mulimuli ane i lena tausaga, ma o Peter (o a‘u) ia Tesema 1956. 

I le popofou o le la faaipoipoga, sa mananao ai Fred ma Lois ia lotogatasi i lo la‘ua faatuatuaga. Sa la lolotu uma i le lotu Katoliko ma le Metotisi, ma sa la taufai suesue faatasia le Feagaiga Fou. A o la faitauina, sa la tusia i lalo ni fesili se tele—e uiga i le natura o le Aigaatua, toetu, pule o le perisitua, le faatulagaga o le Ekalesia, ma le papatisoga e ala i le faatofuina. 

Sa la sailia tali mai taitai faalelotu i le lotoifale, ae o le toatele lava sa fai mai o na mataupu sa o ni “mealilo” pe sa tauivi foi e tali ane. O la la‘ua sailiga mo le mea moni na taitai atu ai i la‘ua e asiasi i ni lotu Kerisiano eseese i Warrnambool. Ona o le le faamalieina lava, sa la liliu atu ai i le Atua i le tatalo, ma ole atu ia te Ia e auina mai ia i la’ua ni tali. 

O le taimi lena, na auina mai ai Elder Jones (mai Iuta) ma Elder Erickson (mai Kanata) e Peresitene Thomas S. Bingham e tatala le galuega faafaifeautalai i Warrnambool. Sa lapata’ia e faifeau i le lotoifale ia tagata o le taulaga, e aua ne’i talanoa ia i la’ua, fai mai o le a la “faavaleaina a latou fanau.” 

Sa tu‘itu‘i ma le faamaoni ia Elder Jones ma Elder Erickson i faitotoa mo le tolu masina, ma sa la iloa ai le matuai teena o i la‘ua. Sa faalotovaivaia i la‘ua ma sa faanoanoa. Sa maluelue lo la‘ua faatuatua. Sa la tusi atu ia Peresitene Bingham ma talosaga atu e siitia ese i la’ua mai Warrnambool. 

Mulimuli ane, sa taunuu se tusi mai ia Peresitene Bingham. I le mavae ai o le iloiloga ma le lototatalo, sa ia tusi mai, ua ia maua se uunaiga sili ona malosi sa i ai tagata i Warrnambool ua saunia e talia le Ekalesia toefuataiina. Sa ia faamalosiauina i la’ua e toe foi e galulue ma asiasi i nofoaga la te le’i oo i ai muamua. 

Sa maua e faifeau le tusi pe tusa o le taimi lava lea e tasi sa tatalo ai Fred ma Lois mo ni tali. I ni nai aso mulimuli ane, sa la tu‘itu‘i ai i le faitotoa i luma o le fale o le aiga o le au Meurs i le 68 Jamieson Street, Warrnambool. Sa tali e Lois, ma sa faapea mai faifeau o loo i ai se la savali faapitoa e uiga ia Iesu Keriso ma Lana Ekalesia e faasoa atu. 

Sa tali atu Lois, “Sa ma tatalo mo oulua ia o mai—ae e le mafai ona oulua o mai i totonu i le taimi nei. O le ma fanau (o Julie e lua tausaga ma Peter e ono masina le matua) o loo maua i le tanesusu, ma lua te ono pisia ai.” Sa ia talosagaina i la‘ua e toe foi atu i se vaiaso. 

Sa faamatala e Lois ia Fred le asiasiga, ma sa faaauau pea ona la tatalo ia aua nei galo i faifeautalai ona toe foi mai. La te le‘i iloaina po o ai ia ua la feagai. 

Sa toe foi ane Elder Jones ma Elder Erickson i le vaiaso na sosoo ai ma sa amata ona la aoaoina ia Lois ma Fred. A o la aoao atu, sa la taliina fesili uma sa i le lisi umi a Fred ma Lois. Sa faamatalaina le natura o le Atua, pule o le perisitua, o le Toetu ma le ola pe a mavae le oti, o le faamoemoega o le olaga, atiina a‘e o le faatuatua, ma le sauniga o le papatisoga ma le faamanatuga. 

Sa talai e Fred ma Lois a la‘ua tusitusiga paia—ua uma ona faailoa mai la la‘ua suesuega talu ai—ma maua ai le faamautuuga o mea uma sa aoao atu e faifeautalai. 

I ni tausaga mulimuli ane, ina ua tofia a‘u e avea ma Fitugafulu Eria, sa ma talanoa ai ma Elder Bruce Jones e uiga i lenei aafiaga. Sa ia faamatala mai ia te au e faapea o lo la’ua taimi i Warrnambool, e oo mai i le taimi na feiloai ai ma o‘u matua, sa o se tofotofoga tele o lona faatuatua. Ae o le aoaoina o Fred ma Lois ma lo la tali mai e faaaoga ai mau faamautu mai le Feagaiga Fou, na toe faaolaola ai lona faatuatua ma avea ai ma mea na suia ai lona olaga. 

Sa papatisoina Lois ma Fred ma faamauina i le aso 5 Iulai 1957—na o le tolu vaiaso talu ona feiloai ma faifeautalai. E le‘i leva, ae auai isi aiga i le Ekalesia, ma sa amata ona faia sauniga a le paranesi fou i le fale o le au Meurs i le Jamieson Street. 

E mafai e i tatou uma ona toe toso i tua lo tatou faatuatua i se tala o le liuaina—a lē o tatou lava po o tagata o o tatou aiga sa tali atu i le talalelei toefuataiina a Iesu Keriso. E faamanatu mai ai ia te au nei upu mai le mataupu muamua o le Tala’i La’u Talalelei: 

“O lo o siomia outou e tagata . . . o loo saila le faamoemoega o le olaga. . . . Latou te mananao i le ‘filemu i le lalolagi lenei, ma le ola e faavavau i le lalolagi a sau” (Mataupu Faavae ma Feagaiga 59:23) 

“E toatele o loo taofia i latou mai le upumoni ona ua latou le iloa le mea e maua ai” (Mataupu Faavae ma Feagaiga 123:12). 

O le taimi nei, ua tatou iloa na o le valaaulia o a tatou uo tatou te o faatasi i le lotu, e saunia ai le aafiaga aupito sili e mafai ona latou maua. O le a latou aoao atili e uiga ia Iesu Keriso, maua tali i a latou fesili, ma lagonaina le talileleia e tagata o le ekalesia e pei o outou. O le a latou lagonaina se agaga faapitoa a o latou auai i le faamanatuga. E toatele o le a mananao e aoao atili—ma i‘u ai ina amata la latou malaga i luga o le ala o feagaiga e ala i le papatisoga. 

O le a faavavau ona ou faafetai ia Elder Jones ma Elder Erickson—ma mo le fiafia na lagonaina e o‘u matua ina ua la mauaina le Ekalesia toefuatai o le Feagaiga Fou, le Ekalesia a Iesu Keriso o le Au Paia o Aso e Gata ai.