Itulau i le Lotoifale
E i ai pea le faamoemoe
Ina ua tofia i ma‘ua ma lo‘u toalua e galulue i se misiona i Tahiti, ma te le‘i mafaufauina lava aafiaga matagofie e le‘i faamoemoeina sa faatalitali mai mo i ma’ua. Se‘i ou faasoaina atu se tasi na faaalia ai le ala e galue ai le Alii i ala lilo.
Ua silia ma le luasefulu-lima tausaga talu ai, a o avea o se Epikopo o le Uarota a Aix-en-Provence ma faigaluega mo Seminare ma Inisitituti, sa ma feiloai ai ma Sophronia na sau mai Tahiti e a‘oga i Farani. O ia o se talavou matua e i ai se malamalama mautu i le talalelei, ona sa ola a‘e i le Ekalesia. O le mea lea sa faate‘ia ai ina ua sau i lo‘u ofisa e faailoa mai o le a le toe sau i le Lotu. Sa ou faamoemoe o le a mo na o sina taimi, ae, ioe, sa ia faataunuuina lava lona manao ma ou te le’i toe vaai lava i ai. Mo le silia ma le luasefulu tausaga, sa ola ai Sophronia i se olaga ua ese mai le Talalelei.
I le 2024, ina ua ma taunuu i le ma misiona i Tahiti, sa ma fiafia lava e toe vaai ia te ia—ma sili atu ona fiafia e aoao ai ina ua toefoi i le Ekalesia i le lua tausaga talu ai. Sa ia faasoa mai le mea na uunaia ai o ia e toefoi mai.
“E tatau ona lua silafia o le taimi atoa na ou aluese ai mai le Ekalesia, sa ou tausia la‘u molimau o le talalelei ma sa i ai se naunauga loloto mo la‘u tama teine, o Kahaili, ia ola a‘e e pei ona ou i ai—i Le Ekalesia a Iesu Keriso o le Au Paia o Aso e Gata ai. Sa ou manao ia te ia ia iloa o loo soifua le Atua, ma e alofa o Ia ia te ia, ma o loo i ai Sana fuafuaga mo ia e toefoi atu e ola faatasi ma Ia ma lona aiga pe afai na te tausia Ana poloaiga. Ae ou te le‘i manao ou te toefoi a‘u lava i le lotu. E fai lava si feteena‘i, a ea?
“O Kahaili sa auai ma lo’u tina i nisi taimi, ae o lenei auai mo na o ni vaitaimi o le a lē lava lea e saunia ai o ia mo le papatisoga. I le 2022, ina ua ono ma le ‘afa tausaga o Kahaili, sa ou iloaina sa na o se tausaga ma le ‘afa ma te tapena ai. Ou te fai atu ‘ma te’ ona o lea faagasologa o lona uiga e tatau ona ou aofia ai a‘u lava ia, ae le faalagolago i lo‘u tina po o se isi tagata.
‘Sa ou fesili ia te ia, ‘Kahaili, e te manao e papatiso pe a atoa lou 8?’
E aunoa ma se faatalitali, sa ia tali mai, ‘Ioe, tina, ou te fia papatiso!’
O lona naunautaiga na ou maofa ai, ma i lena sasaa mai o le lotonaunau, sa ou maua ai le lototele e fai le osigataulaga ma toefoi i le lotu.
“Sa ma o na o i ma‘ua i lena Aso Sa muamua. Ae le‘i pine ae auai mai faatasi lo‘u toalua o Cyril ma i ma‘ua, ina ua lagona o i ai lona nofoaga faatasi ma i ma‘ua. Ina ua faaalia e Kahaili lona manao ia papatiso e lona tama o ia, sa ou tali atu ma se ataata faamalosi, ‘Ia, fesili i lou tamā, e te le iloa lava!’—ma le le talitonu mo se taimi e mafai ona tupu. Na tali atu lona tamā, “Afai ou te mafaia, lo’u afafine, o le a ou faia.’”
Ona faasalavei lea e le Alii le olaga o Cyril. Na oo mai lona liua e ala i le faitauina o le Eteru 12:4: “O le mea lea, soo se tasi e talitonu i le Atua e mafai moni lava ona faamoemoe mo se lalolagi sili atu ona lelei, ioe, se nofoaga lava i le aao taumatau o le Atua, o le faamoemoe lea e sau mai le faatuatua, e fai ma taula i agaga o tagata, lea o le a latou mautinoa ma mausali ai, ma faatumulia ai pea i galuega lelei e le aunoa, ma taitaiina ai e viia le Atua.”
O le mau e uiga i le faamoemoe na avea o se taula na tagitagi loloto ia Cyril a o ia tomanatu i le taimi na toeitiiti a malemo ai i le vaituloto o Tuamotu i ni tausaga na muamua atu. A‘o fagota, sa tafea ese lona vaa ina ua mamulu lona taula. E ui i lona aau faatauanau e pu‘e mai lona vaa, sa amata ona vāivai. Na faavavega, ona lāvea le taula i se ‘amu, ma taofia ai le vaa ina ia mafai ona ia pa‘i atu i ai. O loo faamatalaina pea e Cyril se vavega na laveaiina lona ola.
E faapei o se toefanau mai, sa papatiso ai Cyril i le aso 28 o Mati, 2024—i lona asofanau lona 50. O le masina na sosoo ai, na ia papatisoina ai Kahaili. Na oo mai le taimi taualuga i le aso 12 o Aperila, 2025, ina ua faamauina Sophronia, Cyril, ma Kahaili i le Malumalu o Papeete. Sa matou maua le avanoa paia e auai ai i lenei sauniga paia.
Ua ou faasoa atu lenei tala e molimau atu ai faapea e i ai pea lava le faamoemoe pe a sē ese tagata o le aiga mai le Ekalesia. Tusa lava pe alu ai se kuata seneturi, e ala i le faatuatua ia Iesu Keriso, e mafai lava ona tupu se vavega.