“Afai e I Ai se Ekalesia a le Atua i le Lalolagi,” Liahona, Sete. 2025.
Atatosi o le Faatuatua
Afai e I Ai se Ekalesia a le Atua i le Lalolagi
Sa ou fai atu i faifeautalai e aua nei maimauina o latou taimi, e i ai o’u lava talitonuga. Ae peita’i na ou aoao o a latou aoaoga e fetaui ma o’u talitonuga e uiga i le aiga, o se Tama oi le Lagi alofa, ma le Ekalesia a le Faaola.
A o ou laitiiti, sa ave a’u e o’u matua i lotu eseese. Mulimuli ane, a o o’u talavou, na amata ona ou liliu atu i le Atua ma amata ona faitau le Tusi Paia. Sa ou maua lagona lelei.
A o o’u mafaufau e uiga i le Atua ma le faamoemoega o le olaga, sa ou iloaina ai e tāua le i ai o se aiga. Sa ou talitonu e tatau i taitai o le ekalesia ona aoao atu e ala i faataitaiga, ae i le lotu sa ou auai, e le’i faaipoipo ositaulaga. Sa le’i fetaui lena mea ia te a’u. Sa ou talitonu o se mea lelei le faaipoipo ma maua se aiga.
Sa 16 o’u tausaga i lena taimi. Sa i ai la’u uo teine sa ou alofa tele i ai, ae na ia tuua a’u. Na faigata lena mea mo au. Sa tele ona ou mafatia toeitiiti atoa le tausaga. Ona o lena aafiaga, sa ou manao ai ia malamalama po o fea na ou sau ai, pe aisea na ou i ai i le lalolagi, o le a le faamoemoega o le olaga, ma le mea e tupu pe a mavae le oti. Sa ou manao e saili le tali i nei fesili e a’u lava ia. Ae ina ua uma ona ou mafaufau i ai mo se taimi umi, sa ou toe liliu atu i le Atua ma faapea ifo ia te au lava, “O Lē na Foafoaina le ola e sili atu lona silafia o le ola nai lo a’u. E tatau ona ou su’ea ni tali mai ia te Ia.”
O le faitauina o le Tusi Paia, sa ou aoao ai na valaauina e Iesu Aposetolo e toasefululua. “Afai e i ai se ekalesia a le Atua i aso nei,” sa ou mafaufau ai, “e tatau la ona i ai ni Aposetolo.” Sa faateteleina lo’u tosina atu i lotu, ma sa ou manao ou te papatiso.
Ina ua ma talanoa ma lo’u tama e uiga i le Atua, sa ia fai mai ia te a’u e amiotonu le Atua. Na ia fai mai a le o le papatisoina o oe ina ia faaolaina, pe o le a faasalaina oe i seoli e faavavau. Ou te lei manao e talitonu o le a fiafia le Tama oi le Lagi alofa e auina atu Lana fanau i seoli e faavavau ona e lei papatisoina i latou. Ae faapefea i latou e lei maua se avanoa e papatiso ai?
I Farani, e to’aitiiti tagata talitonu. Sa i ai a’u uo e agalelei, ae latou te le’i papatiso. Sa ou manatu e le sa’o le mafaufau o le a latou o uma i seoli.
O lea na ou filifili ai e fatu ni o’u lava talitonuga. Sa ou talitonu i se Atua e atoatoa lona alofa ma o le a faia mea uma i Lona mana e laveai ai Lana fanau. Afai e le mananao Lana fanau e maua Lona mamalu, o le a faitalia lava i latou. Ae o le a Ia tuuina atu ia i latou se avanoa.
O Se Auala Taamilo i le Liua
I se tasi aso na lagona ai e ni faifeautalai faamisiona se toalua o e sa galulue i lo’u nuu le uunaiga e ui i se auala taamilo e toe foi ai i le fale. A o la agai atu i le fale, sa latou feiloai ai ma lo’u tina. Sa ia taofi i laua ma faatulaga se taimi atofaina ou te feiloai ai ia i laua. Sa ou le fiafia i lena mea. Sa ou le’i manao e talanoa ia i la’ua. Sa ou manatu o le a la fai mai, “E tatau ona e faalogo mai ia i ma’ua. E tatau ona e talitonu i mea o le a ma ta’u atu ia te oe.”
Ina ua taunuu mai faifeautalai mo la matou feiloaiga, sa ou fai atu ia i laua, “Aua le maimauina lo lua taimi. E i ai o’u lava talitonuga. O le mea o loo e faia e lelei, ae ou te talitonu e tāua tele le aiga. Ou te talitonu e tatau ona faaipoipo taitai o le Ekalesia. Ou te talitonu o se ekalesia e tatau ona i ai Aposetolo e toasefululua. Ou te talitonu o le a faaolaina e le Atua le toatele o Ana fanau e mafai ona Ia faia. Ou te le talitonu i le ulaula ma le inu ava malosi.”
Sa faateia au i le iloaina e fetaui a la’ua aoaoga ma o’u talitonuga. Sa la’ua tuuina mai ia te a’u se Tusi a Mamona ma fai mai ou te faitau ma tatalo e uiga i ai. Sa ou lagonaina le Agaga ina ua ou faitauina le tusi, ma sa ou lagonaina le Agaga faatasi ma faifeautalai. Ae sa ou mafaufau, “Atonu ua na ona ou fatuina nei lagona lelei.”
Sa ou tatalo ma maua se tali i se miti. I la’u miti, na ou tatalaina ai le Tusi Paia. I totonu o le Tusi Paia sa i ai ni faailoga o tusi eseese o le Tusi Paia. O le faailoga mulimuli na fai mai ai “Mamona.” O lenei savali na fesoasoani ou te malamalama ai o le Tusi Paia ma le Tusi a Mamona o loo i ai le talalelei lava lea e tasi (tagai i le Esekielu 37:15–19).
Sa faamalosia atili la’u molimau e ala i isi aafiaga i le faitauina ma le suesueina o le Tusi a Mamona. Ina ua valaaulia au e faifeautalai ou te papatiso, sa ou taliaina ma le olioli. Sa ou papatiso i le atoaga tonu o le tausaga e tasi talu ona tuua au e la’u uo teine. O lo’u papatisoga na faailogaina ai se suiga tele i lo’u olaga. Sa leiloloa ni au uo ina ua ou auai i le Ekalesia, ae sa ou maua ni uo fou i le paranesi sa ou auai ai.
“O le talalelei na aumaia ia te au le tele o le malamalama ma le fiafia,” o le tala lea a Nicolas. “Ua faamanuia a’u e le Atua. Sa ou feiloai i se tamaitai lelei, ma e toatolu le ma fanau teine lelei.”
Na aumaia e le talalelei ia te au le tele o le malamalama ma le fiafia. Sa faatumulia a’u i le Agaga ma le olioli. Sa ou mafaufau, “O mea uma na ou mafatia ai muamua ua aumaia ai a’u iinei.”
Ua faamanuia a’u e le Atua. Sa ou feiloai i se tamaitai lelei, ma e toatolu le ma fanau teine lelei. O le toalua o i laua ua auauna atu i ni misiona, ma fesoasoani i isi ia malamalama i le mea na ou malamalama i ai i tausaga ua mavae: “O le aiga o le totonugalemu lea o le fuafuaga a Le Foafoa mo le taunuuga e faavavau o Lana fanau,” “o e ua maliliu o e salamo o le a togiolaina, e ala i le usiusitai i sauniga o le maota o le Atua” (Mataupu Faavae ma Feagaiga 138:58), ma ua valaauina e le Alii aposetolo ma perofeta i o tatou aso e taitaia Lana Ekalesia (tagai i le Efeso 2:20).