Na Taitai Atu A’u e le Alii i le Fale

Ata na tusia e David Malan

A o ou galue i lo’u faailoga faafomai ma le aoaoina o musika i le Iunaite Setete, sa ou finafinau e ola i le talalelei ma lagona le tosinaga a le Atua i lo’u olaga. Sa ou mamao ese mai lo’u aiga ma sa i ai taimi sa ou lagonaina ai le tuua toatasi, ae sa ou lagonaina Lona alofa ma Lona siufofoga o loo taialaina au faaiuga.

I se tasi aso na oo mai ai le lagona e tatau ona ou toe foi atu i lo’u atunuu moni o Polivia. O le toe foi e le o se faaiuga na ou faia ma le manatu mama. Sa sologa lelei mea uma. Ae ina ua uma ona tatalo, sa malosi lou lagona e tatau ona ou toe foi atu ona o se mea taua o loo faatalitali mai mo au.

Ina ua ou toe fo’i, na tatala se polokalama o le faailoga tikeri i le musika i se tasi o iunivesite sili ona lelei i Polivia, lea na ou maua ai se galuega o se polofesa.

I la’u uarota, e lei umi ae ou feiloai i se tamaitai talavou ou te lei vaai muamua lava i ai. Sa liliu mai ona matua i le Ekalesia a o ou sauni e alu mo le Iunaite Setete i tausaga ua mavae. Sa amata ona ma tafafao faamasani ma faaipoipo, lea ua avea ma se faamanuiaga tele i lo’u olaga.

I le lua tausaga talu ai, sa maua ai lou tinā matua i le kanesa. Sa matuai vavalalata la ma’ua mafutaga. A o ou laitiiti, sa ia fai mai ia te au, “O le a e faatasi pea ma a’u, ma ou te iloa o le a e tausia a’u.”

Talu ai sa ou toe foi atu i le fale, sa ou i ai pe a ia manaomia au, ma faaalu se taimi ma ia i aso uma i ona masina mulimuli. E lei auai o ia i le Ekalesia a o lei maliu o ia, ae sa fiafia o ia i le mekasini o le Liahona, le Tusi a Mamona, ma le konafesi aoao. “Ou te talitonu i mea uma,” o lana tala lea.

Mulimuli ane, sa faamanuiaina au i le i ai i le Malumalu o Cochabamba Polivia faatasi ma o’u matua ina ua faamauina lo’u tinamatua i lona toalua, o le na maliu a o talavou. Sa le’i toe faaipoipo lava o ia. Sa ou lagonaina sa la’ua i ai iina i le malumalu faatasi ma i matou, fiafia ma toe faatasi. O le vaai atu i o’u matua i totonu o le potu o faamauga o tutu e fai ma sui mo i laua sa o se vaaiga matagofie.

Tatou te le iloa pe o le a faapefea ona oo mai mea i o tatou olaga, ae e silafia e le Alii le mea e tatau ona tatou i ai. Na te silafia foi le ala e faamanuia ai i tatou, ma o le a Ia taitaia i tatou e galulue i Lona tulaga e faamanuia isi. Afai tatou te faalagolago atu i Lona poto ma le taitaiga, ou te iloa e mafai ona Ia faia le tele o mea mo o tatou olaga nai lo le mea tatou te mafaia na o i tatou.