Faamanuiaina e ala i le Pule ma le Mana o le Perisitua

O Iesu Keriso o le ao o le Ekalesia. O le Ekalesia o le meafaigaluega lea na Ia foafoaina e faataunuu ai le galuega tāua o le togiolaina o tagata i lenei tisipenisione mulimuli o le talalelei e pei lava ona i ai i le tisipenisione a o soifua o Ia i luga o le fogaeleele. E Ala i le Ekalesia:

• E mafai ona Ia folafola atu Lana talalelei i le lalolagi atoa.

• E mafai ona Ia ofoina atu le papatisoga ma isi feagaiga uma—e oo lava i se ala o feagaiga i Lona malo selesitila.

• E mafai ona Ia tuufaatasia aiga mo le faavavau.

• E mafai ona Ia ofoina mai meaalofa o le faaolataga, e oo lava ia i latou o e ua maliliu e aunoa ma na mea.

• E mafai ona Ia auauna atu i manaoga faaletino a fanau a le Atua i le taimi nei.

Ina ia ausia nei faamoemoega maoae, ma saunia ai mo le toe afio mai o le Faaola, e manaomia e le Ekalesia le taitaiga faifai pea, pule, ma le mana o le Atua. O le Ekalesia o le “ekalesia moni ma ola” (Mataupu Faavae ma Feagaiga 1:30) aua ua tuuina atu e Keriso i Lana taitaiga ma le mana e ala i Lana perisitua, “o le Perisitua Paia, e tusa ma le Faatulagaga a le Alo o le Atua” (Mataupu Faavae ma Feagaiga 107:3).

Ana le seanoa lenei perisitua paia, o le Ekalesia o le a avea moni lava ma se faalapotopotoga faalelalolagi, e faia mea lelei i le lalolagi ae leai se malosi e ausia ai le faamoemoega tupito o le saunia o atalii ma afafine o le Atua mo le olioli o le ola e faavavau i Lona afioaga. Faatasi ai ma lenei perisitua, ma ki e taitaia ai le galuega o lenei perisitua, o loo i ai uma le pule ma le faatulagaga i le Ekalesia.

“I le Ekalesia, o pule uma o le perisitua e faaaoga i lalo o le taitaiga a i latou o ē umia ki o le perisitua.

“O tamatane agavaa o le Ekalesia e mauaina le pule o le perisitua e ala i le faaee atu o le perisitua ma le faauuga i tofi o le perisitua. E mafai e tagata uma o le Ekalesia ona faaaoga le pule faamatuu pe a vaetofiaina pe tofia foi i latou e fesoasoani i le faataunuuina o le galuega a le Atua.”

E ala i ki o le perisitua, o le a manumalo ai pea mea e faamuamua e le Alii. E leai se tasi e mafai ona lagolagoina se fuafuaga patino e le ogatusa ma Lana taitaiga. E leai se tasi e mafai ona faamanuiaina i le faafaitaulaga pepelo, i le sailia o le manuia o le tagata lava ia ma ni tagata e mulimuli patino.

E i ai foi se matafaioi tāua a le perisitua i aiga o tagata o le Ekalesia. Na aoao mai e Peresitene Dallin H. Oaks, “O le mataupu faavae e faapea o le pule o le perisitua e faatoa mafai ona faaaoga i lalo o le taitaiga a lē o loo umiaina ki mo lena matafaioi e tāua tele i le Ekalesia, ae e le faatatau lea i totonu o le aiga.” E pulefaamalumalu ma faaaoga e tamā le perisitua i o latou aiga—fefautuaai, faia o fonotaga faaleaiga, tuuina atu o faamanuiaga faaleperisitua po o le faamalologa i tagata o le aiga po o isi, ma isi mea faapena—e aunoa ma le taitaiga po o le faatagaga a se tasi o loo umia ki o le perisitua.

“O lea lava foi mataupu faavae e faaaoga pe a leai se tamā ae o le tinā o le taitai o le aiga. E pulefaamalumalu o ia i lona aiga ma o se meafaigaluega o ia i le aumaia o le mana ma faamanuiaga o le perisitua i totonu o lona aiga e ala i ona faaeega paia ma faamauga i le malumalu.”

Perisitua: O Le Mana e Faamanuia ai

I se faaupuga, o le faamoemoega o le pule ma le mana o le perisitua lea na toefuatai mai e Iesu Keriso o le faamanuia. E mafai ai e tagata o le Ekalesia ona faaaoga le mana o le Atua i le auauna atu ma le faamanuiaina o isi i le Ekalesia, i le aiga, ma le lalolagi atoa. E auai faatasi tagata o le ekalesia ma le Faaola i le faataunuuina o Lana galuega o le faaolataga ma le faaeaga, i le faaaogaina o meaalofa paia ma le mana e sili atu nai lo a latou lava meaalofa e fesoasoani ai i le malo o le Atua ia tuputupu ae e faatumulia ai le lalolagi (tagai i le Mataupu Faavae ma Feagaiga 65:2, 5–6).

Ua faamalamalama mai e le Alii e faapea “ma o le perisitua tele [Mekisateko] lea e pulea le talalelei ma umia le ki o mealilo o le malo, o le ki lava lea o le malamalama e uiga i le Atua.

“O lea, o ona sauniga, ua faaalia ai le mana o le faale-atua.

“Ma a aunoa ma ona sauniga, ma le pule o le perisitua, e le faaalia mai le mana o le faale-atua i tagata i la le tino” (Mataupu Faavae ma Feagaiga 84:19–21).

O sauniga, ioe, o sauniga po o faamanatuga e faatautaia e le perisitua lea tatou te osia ai feagaiga ma le Atua, e amata i le papatisoga ma faaauau ai i feagaiga ua maua i le maota o le Alii. O le tausia o nei feagaiga e liua ai i tatou mai alii ma tamaitai “o le lalolagi” i le au paia (tagai Mosaea 3:19) e ala i le alofa tunoa togiola o Keriso ma avea ai ma tagata ta’uamiotonuina ma faapaiaina—e le sala ma le pona—i luma o le Atua (tagai i le Mataupu Faavae ma Feagaiga 20:29–31; 3 Nifae 27:16–20).

O lenei upusii mai le “O Le Toefuataiga o le Atoaga o le Talalelei a Iesu Keriso: O Se Folafolaga i le Lua Selau Tausaga i le Lalolagi,” na saunia e le Au Peresitene Sili ma le Aufono a Aposetolo e Toasefululua, o loo faailoa mai ai se aotelega talafeagai:

“Matou te tautino atu O Le Ekalesia a Iesu Keriso o le Au Paia o Aso e Gata Ai, sa faatulagaina i le aso 6 o Aperila, 1830, o le Ekalesia lava lea a Keriso o le Feagaiga Fou ua toefuata’iina mai. O lenei Ekalesia ua taula i le soifuaga atoatoa o lona ma’a tulimanu, o Iesu Keriso, ma i Lana Togiola lē i’u ma le Toetu moni. Ua toe valaauina e Iesu Keriso ia Aposetolo ma tu’u atu ia i latou le pule o le perisitua. Ua Ia valaaulia i tatou uma ia ō mai ia te Ia ma Lana Ekalesia, ia maua le Agaga Paia, o sauniga o le faaolataga, ma ia maua le olioli tumau.”