“Ua fuafuaina e le Alii le aiga e avea ma iunite autu o le Ekalesia ma le lalolagi.”
Mo le faitau afe o tausaga, na folafola atu ai e perofeta ma aposetolo le paia o le aiga ma lapatai mai e uiga i mala o le a oo mai i tagata taitoatasi, malo, ma le lalolagi pe afai e le faasaoina ma puipuia aiga. O nisi nei o upu musuia mai perofeta ma aposetolo e faatatau i le aiga ma le taua o le “O Le Aiga: O Se Folafolaga i le Lalolagi.”
O Le Aiga o le Totonugalemu lea o le Fuafuaga a le Atua
Peresitene Russell M. Nelson
Peresitene o Le Ekalesia a Iesu Keriso o le Au Paia o Aso e Gata Ai
“O le mea taua i le fuafuaga a le Atua o le aiga. O le mea moni, o se tasi o faamoemoega o le fuafuaga o le faaeaina lea o le aiga. Na foafoaina le lalolagi ina ia mafai ai e i tatou o fanau agaga a lo tatou Tama oi le Lagi i le muai olaga ona o mai i le lalolagi ma maua ni tino faaletino. Ua tatou i ai iinei ina ia su’esu’eina ma tofotofoina [tagai i le Aperaamo 3:24–25 ]. Ua tatou i ai iinei ina ia ‘filifili le saolotoga ma le ola e faavavau … pe filifili le faatagataotauaina ma le oti’ [2 Nifae 2:27 ]. Ma o le mea e sili ona taua, ua faatagaina i tatou ina ia iloa ona alofa, ina ia faaipoipo atu, ma ina ia valaaulia fanau i o tatou aiga” (“Faith and Families ,” Ensign , Mat. 2007, 39).
O Le Folafolaga i le Aiga e Faavae i luga o Aoaoga Faavae E Faavavau
Peresitene Dallin H. Oaks
Fesoasoani Muamua i le Au Peresitene Sili
“O i latou e le malamalama atoatoa i le fuafuaga alofa a le Tama mo Ana fanau e ono manatu i lenei folafolaga i le aiga ua na o se faamatalaga o aiaiga faavae e fai ma fesuisuiai. I se eseesega, tatou te faamautu atu o le folafolaga i le aiga, ua faavaeina i luga o aoaoga faavae lēmasuia, ua faauigaina ai le ituaiga o mafutaga faaleaiga lea e mafai ona tupu ai le vaega sili ona taua o lo tatou atinaega e faavavau” (“O Le Alofa Paia i le Fuafuaga a le Tama ,” Liahona , Me 2022, 103).
O Le Olaga Faaleaiga i le Olaga Faaletino e Saunia ai i Tatou mo le Faavavau
Peresitene Henry B. Eyring
Fesoasoani Lua i le Au Peresitene Sili
“O le iunite o le aiga e le gata ina taua i nuu ma i le Ekalesia ae faapea foi i lo tatou faamoemoe mo le ola e faavavau. E amata ona tatou faia i le aiga, o le iunite laitiiti, ia mea o le a sosolo atu i le Ekalesia ma i nuu ua tatou ola ai i lenei lalolagi, ma o mea ia tatou te ola ai i aiga o le a fusia ai faatasi i tatou e faavavau i feagaiga ma le faamaoni” (“O Le Aiga ” [faigalotu a le Iunivesite o Polika Iaga, Nov. 5, 1995], 8, speeches.byu.edu).
O Sootaga Vavalalata Faaletino ua Faapolopolo mo le Faaipoipoga
Peresitene Jeffrey R. Holland
Sui Peresitene o le Korama a Aposetolo e Toasefululua
“O le alofa molitino ua faapolopolo mo se ulugalii faaipoipoina aua o le faailoga sili lea o le tuufaatasiga, o se atoatoa ma se tuufaatasiga ua faauuina ma faauigaina e le Atua. Mai le Faatoaga o Etena agai mai i luma, o le faaipoipoga na faamoemoe e faaatoaina ai le faatasiga o se alii ma se tamaitai—o o laua loto, o faamoemoega, o olaga, o le alofa, o le aiga, o le lumanai, ma mea uma. … O se faatasiga lenei o le atoatoa lea tatou te faaaogaina ai le upu faamau e momoli atu ai lana folafolaga e faavavau” (“Personal Purity ,” Ensign , Nov. 1998, 76; Liahona , Ian. 1999, 91).
“O le alofa o se matua mo se tamaitiiti o se tasi lea o malosiaga sili ona malosi i le atulaulau. O se tasi lea o nai mea iti i lenei lalolagi e mafai moni ona faavavau.
“Ia, masalo e te lagonaina o lau mafutaga ma lou atalii po o le afafine e le lelei tele e pei ona tatau ai. O iina e sau ai i totonu le mana o le Faaola. Na te faamalolo i ē mamai, ma e mafai ona Ia faamalolo ni mafutaga. Na te faateleina le areto ma le i’a, ma e mafai ona Ia faateleina le alofa ma le olioli i totonu o lou aiga” (“O Iesu Keriso o Le Malosi o Matua ,” Liahona , Me 2023, 56).
Faamalosia Sootaga Faaleaiga, E Tusa Lava Pe O Nisi Atonu Ua Motusia
Elder David A. Bednar
O Le Korama a Aposetolo e Toasefululua
Ia te oe [talavou matutua] na lagona le lototiga ona o se tatalaga o se faaipoipoga i lou aiga pe sa e lagonaina le tiga i le solia o le faatuatuaina, faamolemole ia manatua e toe amata foi ia te oe! Atonu e tasi le sooga i le filifili o ou augatupulaga ua motusia, ae o isi sooga amiotonu ma mea o totoe o le filifili e le faaitiitia le taua e faavavau. E mafai ona e faaopoopo i ai le malosi i lau filifili ma atonu lava e te fesoasoani e toefuatai mai sooga ua motusia. O lena galuega o le a faataunuuina tai toatasi” (“O Se Sooga Mau ” [faigalotu i le lalolagi atoa mo talavou matutua, 10 Sete., 2017], Potutusi o le Talalelei).
“Ua i ai i tamaitai ma alii ni matafaioi tupito e pei ona otooto mai i le ‘O Le Aiga: O Se Folafolaga i le Lalolagi,’ ae o le la tiute faatausimea e tutusa le aoga ma le taua. E tutusa mana ia te i laua e maua ai faaaliga mo le la aiga. A laua galulue faatasi i le alofa ma le amiotonu, o a la faaiuga e faamanuiaina faalelagi” (“Alofa Sili mo Fanau a lo Tatou Tama ,” Liahona , Me 2019, 79).
E Tatau i Matua Ona Ta’ita’ia le Fanau i le Faamoemoe ia Keriso
Elder D. Todd Christofferson
O le Korama a Aposetolo e Toasefululua
“Sa faauuina e le Atua ia faaipoipo alii ma tamaitai ma fanauina ni fanau, ma o lea e foafoaina ai, i le faapaaga ai ma le Atua, ia tino faitino ia ua avea ma autu o le tofotofoga o le olaga nei ma e taua mo le mamalu e faavavau faatasi ma Ia. Sa Ia faauuina foi ia faavaeina e matua ni aiga e faafailele ai a latou fanau i le malamalama ma le upumoni [tagai i le Mataupu Faavae ma Feagaiga 93:36–40 ], ma taitai i latou i se faamoemoe ia Keriso” (“Aisea e Faaipoipo ai, Aisea e Fai ai se Aiga ,” Liahona , Me 2015, 51).
O Mataupu Faavae o le Folafolaga i le Aiga E Matagofie le Fesootaiina
Elder Neil L. Andersen
O le Korama a Aposetolo e Toasefululua
“A tatou pikia ma filifili mea ua tatou taliaina i le folafolaga, ua tatou faapogisaina lo tatou vaaiga e faavavau, i le soona tuu o le faataua tele i lo tatou olaga iinei ma le taimi nei. E ala i le mafaufau loloto ma le agaga tatalo i le folafolaga e ala i mata o le faatuatua, tatou te malamalama atili ai i le auala e fesootai ai ma le matagofie ia mataupu faavae, lagolagoina o le tasi ma le isi, ma faaali mai ai le fuafuaga a lo tatou Tama mo Lana fanau” (“O Le Mata o le Faatuatua ,” Liahona , Me 2019, 35–36).