Ua E Faafiafiaina Lou Tinamatua

A o ou ola a’e faatasi ma ni mātua logonoa, sa ou iloa lelei ai e ese lo’u aiga. A o ou laitiiti, sa leai se tasi e faamatalaupu mo o’u matua i sauniga po o gaoioiga a le Ekalesia, o lea sa matou le auai soo ai.

Sa ou lagonaina i taimi uma e pei o se tagata ese e tilotilo atu i totonu, manao i mea sa i ai i isi o la’u uarota—o se aiga e tatalo ma suesue faatasi.

Ae peitai, ina ua lata i le faaiuga o lo’u tausaga mulimuli i le aoga maualuga, sa amata ona matou toaaga atili i le Lotu. Sa faamauina o’u matua i le Malumalu o Mesa Arisona, ma sa faamauina i matou ma le toalua o nai o’u tei e toafa ia i la’ua.

I le lima tausaga mulimuli ane, sa ou sauniuni ai ina ia maua faaeega paia ma faaipoipo i le malumalu. O le po a o lumanai la’u faamauga i le malumalu, sa auai atu ai lo’u tuagane ma lona toalua i le malumalu e faatino galuega sui mo matua o lo’u tina e sauniuni ai mo le la faamauga i le aso na sosoo ai. O lo’u tina o se tagata liliu mai mo le toeitiiti atoa le 20 tausaga i lena taimi, ma sa naunau lava o ia e amata le talafaasolopito ma le galuega faalemalumalu a lona aiga.

O le aso na sosoo ai, sa faamauina ai o matou matua matutua i le tasi ma le isi, ae sa toe tutu foi lo’u tuagane ma lona toalua e fai ma sui. O le aso o la’u fa’aipoipoga, ioe, ae sa i ai se tāua sili atu mo a’u. O o’u matua matutua, ou te le’i feiloai lava i ai, sa faatasi ai i lenei aso faapitoa ia te au.

I ni nai aso mulimuli ane, a o ma tatalaina ma lo’u toalua ni meaalofa o le faaipoipoga, sa ma tatalaina se meaalofa faapitoa mai le tausoga muamua o lo’u tinamatua. O ia o se tamaitai lotu sa vavalalata ma lo’u tinamatua. O le meaalofa o se ata o lo’u tinamatua i le aso o lana lava faaipoipoga. O le kata na aumai faatasi ai sa faapea mai, “Ua matua fiafia lava lou tinamatua ia te oe ma o loo tilotilo ifo ia te oe.”

E le’i iloa e lenei tausoga le tāua tele o lana sāvali ia te a’u. Na te le’i iloaina foi le galuega o le malumalu lea na faatinoina talu ai nei mo lo’u tinamatua. Sa ou iloaina i lo’u loto i lena taimi sa fiafia lo’u tinamatua ia te au ma sa fiafia ona ua amataina e lo matou aiga le malaga taua o talafaasolopito o aiga ma galuega faalemalumalu.

O i matou o se aiga e faavavau i le taimi nei, i luga o le ala o le faapotopotoina o o matou tuaa ma sa taitaia e lo’u tina i le faamanuiaina o lo matou aiga i le isi itu o le veli.