“O Laau Tāua o Bonsai ma Molimau Tāua,” Liahona, Sete. 2025.
O Laau Bonsai Tāua ma Molimau Tāua
O molimau taitasi o se meaalofa e le mafaatauina lea e manaomia ai le tuuto malosi o le tagata lava ia ma le faatuatua ina ia tumau ai o se mea matagofie ma le olioli.
Ata pu’e mai faaaloaloga a le tusitala
I le ogatotonu o Tokyo, Iapani, na ou vaaia ai se mea i se paka togalaau matagofie lea na ou maofa ai. I tafatafa o se ala i totonu o le paka sa i ai se puipui lea sa nonoa ai le silia ma le sefululua koneteina laiti, e tofu ma se laau bonsai. O laau matagofie taitasi sa i ai se tamai faailoga e faaalia ai lona matua. O le tele lava ua silia ma le 100 tausaga le matutua.
O le tasi, e 390 tausaga le matua, ae o loo fua pea. O le isi sa i ai ni ogalaau se lua ua fili faatasi—o le tasi ua pe, a o le isi o loo ola. O se mea ofoofogia ua 590 tausaga le matua.
Sa ou vaai faalemafaufau i le uluai totoina o laau bonsai taitasi ma le teuteuina ma le mitamita tele ma le olioli. Mulimuli ane, na foliga mai laau ua faapei o ni measina a le aiga. Sa ou mafaufau i matua matutua o loo faatonuina a latou fanau i le tiutetauave o le tausiaina faapelepele o le laau bonsai a le aiga, puipuia mai le afaina ma faasaoina mo tupulaga i le lumana’i.
O nei laau laiti i Tokyo na sao mai i taua mata’utia ma taimi o le filemu, mai i afā tetele ma taimi o le tau to’afilemu. O i latou o se molimau uiga ese i le tuuto, tu ma agaifanua, ma le tausiga alofa.
O se Meaalofa Tāua
Talu ona ou vaai i nei laau bonsai, Ou te fiafia lava i le mafaufau i auala na amata ai augatupulaga o aiga e tele i Le Ekalesia a Iesu Keriso o le Au Paia o Aso e Gata Ai mai se tasi o tagata paionia o le aiga na mauaina se molimau tāua o le talalelei toefuataiina.
O le molimau a tagata fou taitasi o le Ekalesia e amata a o latou “tuu avanoa” mo pe totoina le afioga a le Atua i o latou loto ona faafaileleina lea (tagai i le Alema 32:28). A o tuputupu ae le molimau, o faatinoga a lena tagata fou e mamanuina ma teuteuina i se auala ese o le olaga.
E ala i le tele o tofotofoga ma afā o le olaga, o le a tuputupu ae malosi ai se molimau faafaileleina ia Iesu Keriso ma Lana Ekalesia. E pei o se laau bonsai, o se molimau e faasoa atu ma tuufaasolo mai o se meaalofa tāua mo augatupulaga e sosoo ai ina ia tuputupu ae ma faafaileleina foi.
Ua i ai i augatupulaga taitasi le tiutetauave maoae e avea ai lena molimau ma ana lava molimau. O se meaalofa e le mafaatauina ae maaleale. Ina ia tumau o se mea matagofie ma le olioli, e mana’omia ai le tuuto malosi ma le faatuatua o le tagata lava ia.
Tatou te le iloa po o le a le tele o le laau na vaaia e Liae i lana miti. Ae ua tatou iloa sa matuai matagofie lava ma sa le mafai ona ia faatali e faasoa atu ona fua i lona aiga (tagai i le 1 Nifae 8). Na avea le aiga o Liae ma se faataitaiga manino o se aiga e tele augatupulaga—o nisi taimi na faamanuiaina ai i le tuufaasolo atu o tu ma aga amiotonu, ma o nisi taimi, o le mea e faanoanoa ai, o le vaaia o molimau ua mamae ma maliliu i le feagai ai ma faigata, le usiusitai, ma tofotofoga.
Tatou te olioli ia i latou o e, i le avea ai ma uluai Au Paia o Aso e Gata Ai i o latou aiga, ua faafaileleina a latou molimau talavou e ala i le osia ma le tausia o feagaiga paia. Ma matou te faafetai atu i na Au Paia paionia mo le auala latou te tuufaasolo atu ai lo latou alolofa i le Atua i augatupulaga i le lumanai.
O matua, faiaoga, autalavou, ma talavou matutua o ē e faamuamua sauniga o le Aso Sa, auaunaga i le malumalu, ma le auai i seminare, inisitituti, ma konafesi mo le autalavou ma le autalavou matutua—i le faamuamua ai o le Faaola i o latou olaga—o loo saunia le eleele faaleagaga ma meaai mo molimau talavou e atiina ae ai.
E pei o laau bonsai sa ou vaai i ai i Tokyo, o a tatou molimau ia Iesu Keriso ma Lana talalelei toefuataiina o ni meatotino e le mafaatauina o le a faamanuiaina ai i latou tatou te alolofa i ai. E mafai ona avea ma o tatou talatuu pe a tatou faafaileleina, faapelepele ma faasoa atu ma le faaeteete mai lea augatupulaga i lea augatupulaga.