Na Aumaia e le Atua ia te Au le Filemu

A o matou sauni e pepese i le taimi o se sauniga o le faapaiaga o le Malumalu o Concepción Chile i le 2018, sa tutusa lava le sini a tagata uma o le aufaipese a le autalavou matutua sa ou taitaia: fai le galuega faamusika ma le faaleagaga e tatau ai e tuuina atu ai i le Atua la matou taulaga silisili.

Faatasi ai ma tagata o le aufaipese, mai siteki e lua i le aai o Chillán, sa ou tuuto atu ai au lava ia mama a’ia’i i le mea ou te mafaia. Sa ou manao ia atagia le Malamalama o Keriso i lo’u olaga. Sa ou manao i le taulaga na matou tuuina atu i le Atua i Lona maota paia ina ia atoatoa i le mea e mafai ai. Sa ou iloaina afai matou te faia la matou vaega, o le a fesoasoani mai le Tama Faalelagi ia i matou, ma o le a matou pepese e pei ona Ia finagalo matou te pepese ai.

I le taimi o le faapaiaga, sa matou pepese ai ma o matou leo ma o matou loto. Ou te manatu na pepese agelu faatasi ma i matou. O le leo o le aufaipese sa atoatoa. Sa matou lagonaina o le alofa tunoa o le Atua sa faatasi ma i matou ma sa fiafia o Ia i la matou taulaga. O lena lagona na tumau ia te a’u mo se taimi umi.

Ina ua maea le faapaiaga o le malumalu, sa ou lagonaina le fafagaina faaleagaga ma le tasi ma le Tama Faalelagi. Sa ou lagonaina se sootaga malosi atu ma Ia nai lo se isi lava taimi na ou oo i ai. O lena sootaga sa matuai malosi lava lea sa ou lagonaina ai le taitaiina faaleagaga i mea e ole atu ai pe a ou tatalo (tagai i le 3 Nifae 19:24).

E oo ane i le taimi o le faapaiaga o le malumalu, ua lima vaiaso o lo’u maitaga. I ni nai masina mulimuli ane, na fanau lē āu ai la’u pepe. O se taimi mata’utia. Sa ou matuā faanoanoa lava, aemaise lava ina ua ou iloa atonu o le a le mafai ona ou maua nisi fanau.

Ae o lenei aafiaga faigata na tupu i se taimi sa ou lagonaina ai le malosi faaleagaga silisili. Sa ou malamalama sa ou saunia mo lenei taimi e ala i le taulaga sa matou tuuina atu i le malumalu. O le malosi faaleagaga na ou maua na fesoasoani ia te au e faatoilalo ai lenei tofotofoga auā sa faatasi le Tama Faalelagi ma au ma sa tuuina mai ia te au le filemu.

I se taimi puupuu mulimuli ane, na faamanuiaina ai i maua ma lo’u toalua e le Atua i se vavega. Sa ma matuā fiafia lava ina ua maua e lo ma atalii o Arturo se tuafafine laitiiti e igoa iā Daniela.

Semanu e le mafai ona ou onosaia lena aafiaga e aunoa ma le sootaga vavalalata sa ou olioli ai ma le Tama Faalelagi. Sa ou iloa o le a lelei mea uma ma e tusa ai ma Lona finagalo. O le manatuaina o nei mea e faatumulia ai pea lo’u loto i le olioli ma le lotofaafetai.