Ou Te Fia Faapei o Oe

Ata na tusia e David Malan

Ina ua mavae se aso umi ma faigata na faatumulia i tauiviga e oo mai i le tausiga o tamaiti laiti e toatolu, na pau lava le mea sa ou manao e fai o le taele ma alu e moe.

Sa ou manavanava loloa ma alu i lo’u potu e malolo. O le taimi lena na sau ai le ma tama teine e lima tausaga le matua ma faamanatu mai ia te au o lona taimi lea mo faatalanoaga patino faalemasina na amata ona ma faia ma lo’u toalua ma le ma atalii e tolu tausaga le matua. Ma te fai atu ia i latou ni fesili e uiga i mea e sili ona fiafia i ai, ma mea la te fiafia i ai e uiga i le a’oga faata’ita’i po o le lotu. Ona ma faamanatu lea i ai o i laua o fanau a le Atua ma maua te alolofa ia i latou.

Sa ou fiafia i nei talatalanoaga, ae ou te le o saunia i ai i le faaletino ma faalemafaufau. Sa amata ona ou ta’u atu i la’u tama teine o le a fai la ma talanoaga i le po taeao, ae sa ou iloaina le tāua tele o a ma talanoaga ia te ia.

“Ua lelei,” sa ou fai atu ai ma le lelava, “ta o e aumai Tamā.”

Sa matou nonofo toatolu i luga o le moega ma amata la matou talatalanoaga. Ina ua tuua e lo’u toalua le potu mo sina taimi, sa ou fesili atu i le ma tama teine, “O le a se mea e te manao e avea ai oe pe a e matua?”

Ou te le’i saunia mo lana tali: “E pei o oe.”

Sa maligi o’u loimata, ma sa faatumulia lo’u loto i le ootia. Sa ootia a’u i le auala na vaai mai ai lo’u tama teine ia te a’u, ae sa ou lagonaina le popole lofituina lea na mafua mai i le fefe i le le agavaa. Sa ou mafaufau i mafuaaga uma ou te le’i avea ai ma se faaa’oa’oga lelei mo la’u fanau, ma sa ou iloa lelei o’u vaivaiga.

Mulimuli ane i lena po a o ou tatalo, sa ou ole atu ma le faatauanau i le Tama Faalelagi e fesoasoani mai ia te au ia avea ma se faataitaiga sili atu mo lo’u tama teine ma sili atu ona agavaa mo lona faamemelo i ai. Na faafuasei lava ona lofituina a’u i se galu o le faamafanafanaga, faamoemoe, ma le alofa. Sa oo ina ou iloaina le agaga faafetai o lo’u Tama oi le Lagi ma le Faaola mo au mo le avea ai ma se tina sa taumafai ia avea ma se tagata sili atu. Sa La aloa’ia a’u taumafaiga ma sa i ai iina e fesoasoani ia te au ia avea ma tina ma afafine ua La vaaia ia te au.

Ou te iloa ma lo’u loto atoa e silafia ma alofa le Atua ia i tatou ma e ala “i le mana gafatia o le Togiola a le Faaola,” e mafai ai ona avea i tatou ma tagata tatou te faamoemoe e avea ai i tatou.