E Mo Tatou Aso

I le aso 23 o Setema, 1995, na saunoa ai Peresitene Gordon B. Hinckley (1910–2008) i se faapotopotoga o tuafafine o le Aualofa ma folasia atu le “O Le Aiga: O Se Folafolaga i le Lalolagi.” O nisi nei o ana saunoaga i lena taimi:

“Ou te talitonu e tatau ona avea ma se faamanuiaga o tamaiti taitoatasi le fanau mai i se aiga e taliaina, faafaileleina, alofaina, ma faamanuiaina lena tamaitiiti e ni matua, o se tama ma se tina, o e ola faamaoni a’ia’i le tasi i le isi ma i le la fanau. …

“O le faateleina lava o lou tausia ma le mautinoa o lau fanau i ala o le talalelei a Iesu Keriso, i le alofa ma se faamoemoega maualuga, o le faateleina foi lena o le a i ai le filemu i o latou olaga. …

“Faatasi ai ma le tele o le tuusaoloto ua faaigoa faafoliga e faapea o mea moni, faatasi ai ma le tele o le taufaasese e faatatau i faatulagaga faatonuina ma mea e faatauaina, faatasi ai ma le tele o faatauanauga ma faatosinaga ina ia talia lemu le pisia mai le lalolagi, ua matou lagonaina le tatau ona fautua atu ma lapataiina. I le faateleina o lenei tulaga, o i matou o le Au Peresitene Sili ma le Aufono a Aposetolo e Toasefululua ua tuuina atu nei se folafolaga i le Ekalesia ma le lalolagi o se faalauiloaga ma se toe faamautuina o tulaga faatonuina, aoaoga faavae, ma faatinoga e faatatau i le aiga ia ua faaleoina so’o atu e perofeta, tagatavāai, ma tali faaaliga a lenei ekalesia i le faagasologa o lona talafaasolopito. …

“Matou te fautuaina tagata uma e faitauina ma le faaeteete, manatunatu, ma le agaga tatalo i lenei folafolaga. O le malosi o soo se atunuu e faavae i totonu o puipui o ona aiga. Matou te uunaia o tatou tagata i soo se mea ina ia faamalosia o latou aiga ina ia ogatasi ma nei faavae faamamaluina o taimi.”