“Na Toetoe Lava a Faaleagaina e le KOVITI Lana Miti o le Aufaipese a le Tapeneko,” Liahona, Sete. 2025.
Na Toetoe Lava a Faaleagaina e le KOVITI Lana Miti o le Aufaipese a le Tapeneko
O le faaesea o le faanofo vaavaaia na aoao mai ai se lesona loloto: o le alofa faaKeriso mo e tuua toatasi.
I le tautoulu o le 2024, e lei leva ona valaauina o ia e avea ma se faufautua o faalapotopotoga o le eria i le Eria a Europa Tutotonu, sa malaga ai Laura Echarri Hermoso i le silia ma le 5,000 maila (8,047 km) mai lona fale i Pamplona, Sepania, e pese o se malo faaaloalogia o le Aufaipese a le Tapeneko i le Lotoa o le Malumalu.
Sa na o le tolu aso sa i ai o ia i le Aai o Sate Leki, Iuta, ISA, ae faamaonia ai lona aafia i le KOVITI-19 ma faanofoesea ai o ia lava. Sa foliga mai e le mafai ona maua lona avanoa e pese ai i le aufaipese mo le konafesi aoao na loma.
I le tuua toatasi ma le faaesea ai i lona potu i le faletalimalo, sa tootuli ai o ia ma tatalo. Sa faamoemoe o ia mo le faamalologa. Sa moomoo o ia e mafai ona pese. Sa ia faatumauina lona faatuatua.
I Le Tausaga Na Muamua Atu
I se taimi faigata o le le manuia ai o togafitiga ina ia ma’itaga ma le mafatia ai o lona tina i le faama’i o le Alzheimer, sa le mafai e Tuafafine Echarri ona maua lona leo e pese ai e pei ona sa i ai muamua. Sa faigata ona o musika sa avea pea ma vaega taua o lona olaga. “O se mana’oga sa ou maua i taimi uma talu mai o teine,” o lana tala lea.
Tuafafine Echarri (agavale) ma lona tina, o María.
A o tatalo ai, sa oo mai se manatu e faapea, e manaomia ona ia pese faatasi ma le toatele o tagata. I le vaiaso mulimuli ane, sa faafesootaia ai o ia e se taitai o le Ekalesia o le na faatalanoaina o ia. “Sa ia saunoa e uiga i se galuega faatino faamusika sa amataina e le Ekalesia ma sa latou sailia ni tagata pepese,” o le tala lea a Tuafafine Echarri.
Na te lei ta’ua le faamoemoega patino, ae ina ua mae’a se faatalanoaga lona lua, sa faailoa mai e le pulega e manao le Ekalesia i ni tagata pepese valaaulia mo le Polokalama a le Aufaipese a le Tapeneko mo Tagata Auai i le Lalolagi e pepese i le konafesi aoao.
“Ma sa amata ona ou tagi ona ou te le’i iloa le mea o le a tupu, ae sa ou lagonaina sa i ai iina le Alii ma sa silafia a’u e le Alii, ma o se mea ou te le’i mafaufauina lava,” o lana tala lea.
O Le Ala i le Konafesi Aoao
O le faatalanoaga sa na o se faatalanoaga muamua ma sosoo ai ma se faatalanoaga lona lua faatasi ma isi. Sa tatau foi ona pueina e Tuafafine Echarri o ia lava o pese ma auina atu ni nai lipine na pu’eina. Ona ia faia lea o se faatalanoaga tuusa’o faaiu ma le faatonu lagolago o musika a le Aufaipese a le Tapeneko o Ryan Murphy. “Sa ou matuā popole lava,” o lana tala lea.
Mulimuli ane, sa filifilia o ia faatasi ma isi e toa 13 i le lalolagi atoa e pepese i le konafesi aoao, ma ia Setema 2024, sa malaga ai o ia i se vaalele mo le Iunaite Setete. Ina ua taunuu, na maua o ia i le COVID-19 ma o le taimi lena na amata ai lona faanofo vaavaaia.
O le tuua toatasi faaesea ma le mamao mai le aiga na aoao mai ai se lesona loloto: O le a saunia e le Faaola le mafanafana i ona taimi sili ona tuua toatasi (tagai i le Ioane 14:26–27). “Sa ou mafaufau o le a le mafai ona ou o’o i ai,” na ia faapea mai ai. “Sa fai lava si o’u lotovaivai, ae sa ou faatuatua. I le taimi lava lea e tasi, sa ou lagona ai le lē atoatoa o le malosi. O lenei o se tasi o a’u sini autu o le sailia lea o i latou e ono lagona le tuua toatasi ma taumafai e avatu ia i latou se mapusaga.”
Ina ua mavae aso e valu o le faaesea o ia, sa toe manuia lona soifua maloloina ma lona leo, ma sa ia faataitai faatasi ma le aufaipese. Sa auai faatasi lona leo ma le faitau selau o tagata sa i luga o le tulaga i le Maota Autu mo Konafesi ma pese i le konafesi aoao ia Oketopa 2024.
“O loo soifua le Atua. Na te silafia i tatou, i tatou taitoatasi,” o lana tala lea. “O musika o le faamalologa, e i ai le mana faamalolo, ma e manaomia ona tatou faatumuina o tatou olaga i musika. E matua taua lava. Ou te lagona o se mea lena o loo taumafai le Alii e ta’u mai ia te au: Faatumu lou olaga i musika.”