Maligayang Bumalik si Elder Patrick Kearon sa Pilipinas

Noong Miyerkules, ika-21 ng Mayo, muling nakipagpulong si Elder Kearon kay Cardinal Pablo Virgilio David ng Diocese ng Kalookan sa San Roque Cathedral compound sa Lungsod ng Caloocan. Magkasama, ang dalawang lider ng pananampalataya ay nagministeryo sa 250 parolado at dating mga bilanggo na nakikilahok sa Kaagapay Ministry Project ng diocese, isang programang community-based drug rehabilitation. Pinangunahan ni Elder Kearon ang pagbibigay ng inilathalang materyal ng Simbahan sa katatagan ng damdamin gayundin ng mga pagkain at hygiene kit sa mga kalahok.

“Napakagandang makitang muli si Cardinal David,” ngiti ni Elder Kearon, “patuloy niyang inaalagaan ang mga madaling makalimutan.” Sa kabilang banda, nagpahayag ng pasasalamat si Cardinal David para kay Elder Kearon at sa mga pagsisikap ng Simbahan: “Ang mga elder ng Simbahan ni Jesucristo ng mga Banal sa mga Huling Araw ay naging katuwang namin sa aming maraming adbokasiya mula noong ako ay auxiliary bishop pa ng San Fernando, Pampanga, at naglilingkod bilang parish priest ng Holy Rosary Parish.”

Nang sumunod na araw, nag-abot si Elder Kearon ng donasyon sa Caritas Manila, ang humanitarian arm ng Simbahang Katoliko, para tumulong sa pagsuporta sa Youth Servant Leadership and Education Program (YSLEP) nito. Ang donasyon ay tinanggap ni Padre Anton C. T. Pascual, Executive Director ng Caritas Manila.

Sa BYU-Pathway Worldwide Global Education Center (GEC) sa Cebu City, personal na pinasalamatan ni Elder Kearon ang mga pinuno ng gobyerno, edukasyon, negosyo, at komunidad sa kanilang suporta sa BYU–Pathway Worldwide program, isang inisyatiba na itinataguyod ng Simbahan na nagbibigay ng abot-kaya at nakasentro sa ebanghelyo na mas mataas na edukasyon sa mga kabataan. Kasama ni Elder Kearon sina Elder Nash at Bishop Causse kasama ang kanilang mga asawa sa pananghalian ng mga lider at kinapanayam din ng mga kinatawan ng media.

“Umaasa kami at nananalangin na matagpuan ninyo kaming kaisa ninyo, sa mabuting layunin,” sabi ni Elder Kearon sa mga inanyayahang bisita, “lalo na sa edukasyon at pagbuo ng komunidad.”

Sa isang Focus Group Discussion ng mga Kearon kasama ang mga piling YSA, nagkaroon si Jhezrael Punzalan ng karanasang nakapagpapatibay ng pananampalataya. Nadama niya nang husto ang Espiritu nang tiyakin sa kanya ni Sister Kearon ang patnubay ng Panginoon pagkatapos niyang ipahayag ang kanyang mga takot at pagdududa tungkol sa paglilingkod sa misyon. “Sumasagot ang Ama sa Langit sa ating mga tanong sa iba’t iba at katangi- tanging paraan," pagtitibay niya, "at ang sa akin ay dumating sa isang napakaespesyal na paraan."

Kinabukasan, ika-24 ng Mayo, nagsagawa sina Elder Kearon, Elder Nash, at Bishop Causse ng Area Instruction Meeting kasama ang mga lider ng priesthood mula sa rehiyon ng Visayas, na nagbibigay ng inspiradong payo at pagtuturo sa mga natipon.

Isang tampok na espirituwal sa pamamalagi nina Elder at Sister Kearon sa Cebu ay nang umakyat ang mag-asawa sa bundok para bisitahin ang pamilya Secuya ng Busay 2nd Ward, Cebu Stake. Mula sa kanilang bukid sa kabundukan, binabaybay ng mga Secuya ang mga mabatong landas at batis para lamang marating ang pampublikong transportasyon na magdadala sa kanila sa Simbahan tuwing Linggo.

“Napakasaya naming makita si Elder Kearon, ipinaalala niya sa amin si Jesucristo at ang Kanyang pagmamahal,” sabi ni Mitzi Secuya, na buong pusong tinanggap ng kanyang pamilya ang apostol at ang kanyang asawa. Habang nagmiministeryo ang mga Kearon sa pamilya, nadama ng anak na si Ryle na lumakas ang kanyang pangako na manatiling aktibo: “Patuloy kaming magsisimba, dahil alam namin na mahal kami ng Panginoon.”

“Ito ay isang magandang alaala natin magpakailanman,” ibinahagi ni Elder Kearon sa pamilya sa pagtatapos ng pagbisita. “Ang ganda-ganda ninyo, bawat isa sa inyo,” buong pagmamahal na tiniyak ni Sister Kearon sa mga batang Secuya, na napaharap sa pambu- bully dahil sa kanilang sitwasyon.

"Sinabi sa amin ni Elder Kearon na ang pagtanggap ng paghahayag ay parang musika. Nararamdaman mo ito at sinusunod ito, pagkatapos ay susunod ang lahat tungkol sa pagtanggap ng paghahayag. Kung hindi natin ito gagawin, ang paghahayag ay mahirap makuha."

John Tilman Lee
Busay 1st Ward, Cebu City Stake

Sa Davao City, nagdaos sina Elder Kearon, Elder Nash, at Bishop Causse ng isa pang Area Instruction Meeting, sa pagkakataong ito para sa mga lider ng priesthood mula sa rehiyon ng Mindanao, sa meetinghouse ng Buhangin.

Kalaunan ay nakipag-ugnayan ang mga Kearon sa mga 500 YSA sa isang Focus Group Discussion at debosyonal. Inspiradong nadama ni Sister Kearon na ibahagi noong debosyonal, “Tanggapin ang Kanyang pagmamahal at kapayapaan at tanggihan ang lahat ng masasamang bagay na hindi nagsisilbing mabuti. Sinang-ayunan ni Elder Keron ang sinabi ng kanyang asawa sa pamamagitan ng pagpapayo sa mga kabataang miyembro na huwag hayaang “pigilan kayo ng inyong takot at limitahan ang inyong mga pagkakataong tumanggap ng mga pagpapala.”

Matapos marinig ni Julia Faye Lacre ng Matina 2nd Ward, Davao Stake ang kanilang mga mensahe, “nakatulong ito sa akin na ilabas ang lahat ng negatibong iniisip ko dahil sa pagkabalisa at takot,” at “pinaalala rin nito sa akin ang kahalagahan ko sa paningin ng Diyos.”

Nagkaroon ng espesyal na aktibidad sina Elder at Sister Kearon kasama ang mga mag-aaral ng Maa Central Elementary School, kung saan pinangunahan nila ang paglilipat ng mga bagong kagamitang pantubig at kuryente. “Ito ay napakaespesyal na paaralan,” ang sabi ni Elder Kearon, “mahal namin kayo, at mahal namin ang espiritu at kalikasan ng inyong paaralan.” Ang school compound ay katabi ng Davao Philippines Temple site.

Noong ika- 27 ng Mayo, sinamahan ng mga Kearon sina Elder at Sister Strong sa pagho- host ng interfaith luncheon. “Ito ay isang kaganapan na nagdiriwang ng isang pagkakaibigan, pagbabahaginan ng mga pinahahalagahan, at isang sama- samang pagnanais na itaguyod ang kapayapaan at paglilingkod,” wika ni Elder Strong habang binabati ang iba’t ibang lider ng relihiyon na nagtipon para sa kaganapan. “Huwag po sana kayong huminto sa pag- imbita sa amin sa bawat pagtitipon ninyo, lalo na kung nais ninyong makipag-dayalogo sa amin,” pasasalamat ni Sultan Ubpon, chair of Islamic Studies sa Ateneo de Davao University sa kanyang mensahe.

“Itinuro sa akin nina Elder at Sister Kearon ang isang mahalagang alituntunin: kung minsan ay direktang ipinapakita sa atin ng Panginoon ang sagot, at kung minsan ay inaakay Niya tayo na malaman ang tamang landas.”

Addison Katrin Miraflor
Buhangin 2nd Ward, Buhangin Stake

Parehong nagsalita sina Elder Nash at Elder Kearon sa isang debosyonal sa Philippines Missionary Training Center (MTC) noong ika-29 ng Mayo. “Sa pag-anyaya natin sa kanila na manalangin at magbasa,” sinabi ni Elder Nash sa mga misyonero tungkol sa mga tuturuan nila, “pinapayagan natin silang makipag-ugnayan kay Jesucristo at sa Ama sa Langit.”

Ayon kay Elder Tungpalan, “Ang mga salita ni Elder Nash ay tumimo sa isip ko kung paano tayo gumaganap ng mahalagang papel sa buhay ng mga taong tinuturuan natin.” Sa pag-iisip niya sa mga tutulungan niya sa Philippines Angeles Mission, natanto niya “kung paano tayo gumaganap ng mahalagang papel sa buhay ng mga taong tinuturuan natin, at na sa tulong ng Espiritu Santo, magagawa nating pasimulan ang kanilang paglalakbay patungo sa Tagapagligtas.”

Matapos bigyang-diin ni Elder Kearon sa mga misyonero na “kayo ang mensahe ng kagalakan na dadalhin ninyo,” naalala ni Sister Cinco “ang kagalakang nadama [niya] nang tanggapin [niya] ang ebanghelyo, na ito ay mensahe ng pag-asa at kapanatagan.” Sa kanyang paghahanda na maglingkod sa Japan Tokyo South Mission, idinagdag niya na ang mensahe ay “nagbigay sa [kanya] ng katiyakan na kapag kasama [niya] ang Panginoon, magagawa [niya] ang lahat ng bagay.”

Noong Biyernes, ika-30 ng Mayo, tinulungan nina Elder at Sister Kearon ang mga bata sa Primary sa pagbabalot ng mga hygiene kit para sa mga batang kapus-palad sa Las Piñas Stake Center. Ibinahagi ni Elder Kearon na siya ay “labis na nagpapasalamat na makita ang gayong kahanga-hangang mga bata na nagpapakita ng mga pagpapahalaga sa paglilingkod,” at nagpahayag ng pag- asa na “mas maraming bata ng ating simbahan sa iba’t ibang panig ng mundo ang makakatulong at makapagbigay ng paglilingkod na iyon sa mas maraming tao.”

Ang mga salitang iyon ay nagpabalik ng alaala sa siyam na taong gulang na si Natalie Sumagpao: “Naalala ko noong isang Pasko, naglibot kami ng aking pamilya upang bigyan ng pagkain ang mga bata sa lansangan. Nagpapasalamat ako na nakilala ko sina Elder at Sister Kearon, na ginagabayan kami sa paglilingkod at inilalapit kami kay Jesucristo.”

Ang isa pang kalahok sa Primary, si Kief Markus Tiu, ay nadama na pinagpala na makausap si Elder Kearon, na ikinuwento na “binigyang-diin niya ang kahalagahan ng paglilingkod sa iba sa parehong paraan na ginawa ni Jesucristo, at ipinaalala sa akin na si Cristo ang perpektong halimbawa na dapat nating tularan.”

Kinalaunan noong araw na iyon, pinangunahan ni Elder Kearon ang isang donation turnover ceremony sa Elsie Gaches Village, isang pasilidad ng pangangalaga sa tirahan para sa mga batang may kapansanan sa pag-unlad sa Muntinlupa City. Kasama sa donasyon ng Simbahan ang mga customized na wheelchair para sa mga indibidwal na may cerebral palsy, mga hygiene kit, at mahahalagang suplay para suportahan ang mga residente at kawani.

Kinabukasan, muling nagbigay sina Elder Kearon, Elder Nash, at Bishop Causse ng mahalagang pagsasanay sa pamumuno sa isa pang Area Instruction Meeting, sa pagkakataong ito kasama ang mga lider ng priesthood mula sa buong Luzon area.

Bago umalis ng Pilipinas, nagsalita si Elder Nash sa mga miyembro ng Valenzuela Stake sa isang espesyal na kumperensiya ng stake, hinggil sa kahalagahan ng ikapu sa pamamagitan ng pagbanggit sa Malakias 3:10: “Dalhin ninyo ang buong ikasampung bahagi sa kamalig upang magkaroon ng pagkain sa aking bahay, at sa gayo’y subukin ninyo ako ngayon, sabi ng Panginoon ng mga hukbo, tingnan ninyo kung hindi ko bubuksan para sa inyo ang mga bintana ng langit, at ibubuhos ko sa inyo ang isang pagpapala na walang sapat na kalalagyan.”

Ipinaalala ng sipi kay Marifi dela Cruz, Relief Society president ng Meycauayan 1st Ward, ang panahong nahihirapan ang kanyang pamilya sa pananalapi. “Mayroon akong anak na babae na nasa mission field. Nangako kami na babayaran namin ang buong suporta para sa kanyang misyon, at tapat kami sa pamumuhay ng batas ng ikapu,” pagkukuwento niya. “Sa kalaunan, nalampasan namin ang aming mga paghihirap at natanggap ang mga ipinangakong pagpapala ng Panginoon, nang tunay Niyang binuksan ang mga bintana ng langit.”

"Sinabi ni Elder Kearon na Ang Simbahan ni Jesucristo ng mga Banal sa mga Huling Araw ay ang Simbahan ng mga bagong simula. Alam ng Ama sa Langit na magkakamali tayo; kaya nga ibinigay sa atin ang ating Tagapagligtas na si Jesucristo, upang makabalik tayo sa Kanya, gaano man karaming pagkakamali ang magawa natin."

Elisha Kyle Canoy Nalangan
Matina 2nd Ward, Davao Stake

Bukod sa mga pangyayaring binanggit dito, nakipagpulong din si Elder Kearon sa mga Area Seventy at kanilang mga asawa, bumisita sa mga temple site ng Cebu at Davao, nagsagawa ng courtesy visit sa Technical Education and Skills Development Authority (TESDA), at nakapanayam ng news portal na Rappler. Nakipagpulong si Elder Nash sa mga mission leader at missionary ng Quezon City North Mission, nagsagawa ng My Plan conference kasama ang mga returned missionary, at nakipag-ugnayan sa mga kabataan sa isang FSY conference sa Tanay, Rizal, habang si Bishop Causse ay naglibot sa Alabang temple site at nag-inspeksiyon sa mga pasilidad at mga production plant ng Simbahan.