Sino ang May Gustong Pasayahin ang Panginoon Ngayon?

Tuwing Linggo ng umaga kapag nakikipagkita kaming mag-asawa sa grupong nagsasalita ng Korean na bahagi ng aming ward, amoy ang banayad na bango ng mga bulaklak sa buong chapel. Sa kanan ng pulpito ay laging may magandang arrangement ng mababangong freesia na pinaligiran ng masisiglang bulaklak na globe amaranth na maberde ang dahon.

Nang lumipat ako sa ward ilang taon na ang nakararaan, napansin ko si Sister Geum-oak Choi na may dalang kakaiba at magandang floral arrangement. Hindi nagtagal natanto ko na nagdadala siya ng mga floral arrangement linggu-linggo.

Nang tanungin ko siya kung bakit, sabi niya, “Magandang lugar kasi ang simbahan.” Apatnapu’t limang taon na niyang dinedekorasyunan ang pulpito ng chapel.

Ipinaalala sa akin ng paglilingkod niya linggu-linggo ang sinabi ni Pangulong Gordon B. Hinckley (1910–2008) sa panalangin sa paglalaan para sa Seoul Korea Temple noong 1985: “Inilalaan namin ang bakuran, kasama ang buong kagandahan nito, bilang isang angkop na lugar para sa banal na gusaling ito.” Ipinakita ni Sister Choi ang halimbawa ng simpleng pahayag na ito sa pamamagitan ng pagpaparangal sa aming meetinghouse at pagpapaganda nito.

Isang araw pagkatapos ng simba, natagpuan ng bishop namin sina Brother at Sister Choi sa bahay nila na dinidiligan ang mga halaman at binubunutan ng damo ang taniman ng mga bulaklak.

“Sister Choi, hindi pa sumisibol ang karamihan sa mga bulaklak mo,” sabi ng bishop. “Paano ka nakapagdadala ng mga nakabukadkad nang bulaklak tuwing Sabbath?”

Sagot niya, “Tuwing Linggo ng umaga, binibisita ko ang hardin at tinatanong ang mga bulaklak, ‘Sino ang may gustong pasayahin ang Panginoon ngayon?’ Pagkatapos ay nararamdaman kong isinisigaw ng mga bulaklak, ‘Ako, gusto kong sumama! Ako naman.”

Nang bisitahin naming mag-asawa si Sister Choi, pinapasok niya kami sa isang gate papunta sa likod-bahay niya. Daan-daang halaman na maingat na nilinang—mga prutas, bulaklak, at gulay—ang nakakalat sa isang makipot na lugar.

Ang libangan ni Sister Choi na paghahalaman ay tumutulong sa kanya na maalala si Jesucristo sa buong linggo (tingnan sa Doktrina at mga Tipan 20:77, 79). Sa bawat arrangement na inihahanda niya, naghahatid siya sa Kanya ng makabuluhang kaloob ng sakripisyo at parangal. Isa siyang bulaklak sa lungsod ng Los Angeles, na nagbabahagi ng liwanag at pagmamahal ni Jesucristo sa pamamagitan ng kanyang dedikasyon.