Si Elder Patrick Kearon Malipayong Mibalik sa Pilipinas

Pagka-Miyerkules, Mayo 21, si Elder Kearon nakigkita og balik ni Cardinal Pablo Virgilio David sa Diocese sa Kalookan sa San Roque Cathedral compound sa Caloocan City. Nagkuyog, ang duha ka lider sa tinuohan nangalagad ngadto sa 250 ka nahatagan og parol ug kanhi mga binilanggo nga miapil sa Kaagapay Ministry Project sa diocese, usa ka programa sa rehabilitasyon sa druga nga nakabase sa komunidad. Si Elder Kearon nangulo sa pagdonar sa mga materyal nga gimantala sa Simbahan bahin sa emosyonal nga kalig-on ingon man usab mga pagkaon ug mga hygiene kit ngadto sa mga partisipante.

“Nindot kaayo nga gikakita og balik si Cardinal David,” si Elder Kearon miingon, “kanunay siyang nag-atiman niadtong kinsa tingali nahikalimtan.” Ingon man, si Cardinal David mipahayag sa iyang pasalamat ni Elder Kearon ug sa mga paningkamot sa Simbahan: “Ang mga elder sa Simbahan ni Jesukristo sa mga Santos sa Ulahing mga Adlaw nahimo na namong mga kauban sa among daghang adbokasiya sukad niadtong auxiliary bishop pa ko sa San Fernando, Pampanga, ug nagserbisyo isip pari sa parokya sa Holy Rosary Parish.”

Pagkasunod adlaw, si Elder Kearon mihatag sa donasyon ngadto sa Caritas Manila, ang makitawhanong kaabag sa Simbahang Katoliko, sa pagtabang sa pagsuporta sa Youth Servant Leadership and Education Program (YSLEP). Ang donasyon gidawat ni Father Anton C. T. Pascual, Executive Director sa Caritas Manila.

Sa BYU-Pathway Worldwide Global Education Center (GEC) sa Cebu City, si Elder Kearon personal nga nagpasalamat sa mga lider sa gobyerno, edukasyon, negosyo, ug komunidad alang sa ilang suporta sa programa sa BYU–Pathway Worldwide, usa ka inisyatiba nga giisponsoran sa Simbahan nga nagtanyag og barato, nakasentro sa ebanghelyo nga mas taas nga edukasyon ngadto sa mga batan-on. Si Elder Kearon gikuyogan ni Elder Nash ug ni Bishop Causse uban sa ilang mga asawa atol sa paniudto sa mga lider ug giinterbiyo usab sa mga representante sa media.

“Kami nanghinaot ug nag- ampo nga inyong makita nga kami kauban ninyo, sa maayo nga mga kawsa,” si Elder Kearon miingon sa dinapit nga mga bisita, “ilabi na kalabot sa edukasyon ug sa pagpalig-on sa komunidad.”

Sa gipahigayon nga Focus Group Discussion nga kauban ang mga Kearon uban sa pinili nga mga YSA, si Jhezrael Punzalan adunay kasinatian nga makapalig- on sa pagtuo. Gibati gayod niya ang Espiritu samtang si Sister Kearon mipaneguro niya sa giya sa Ginoo human sa iyang pagpahayag sa iyang mga kahadlok ug mga pagduhaduha bahin sa pagserbisyo og misyon. “Ang Langitnong Amahan motubag sa atong mga pangutana sa lahi ug talagsaong mga paagi,” siya miingon, “ug ang akoa miabot sa espesyal kaayo nga paagi.”

Pagkasunod adlaw, Mayo 24, sila si Elder Kearon, Elder Nash, ug Bishop Causse mipahigayon og Instruksiyon nga Miting sa Area uban sa mga lider sa pagkapari gikan sa rehiyon sa Visayas, naghatag og dinasig nga tambag ug instruksiyon niadtong anaa sa pundok.

Ang usa ka espirituhanong makapadasig nga butang sa pagbisita sa Cebu nila ni Elder ug Sister Kearon mao ang pagtungas nilang managtiayon sa bukid aron mobisita sa pamilya Secuya sa Busay 2nd Ward, Cebu Stake. Gikan sa ilang umahan sa bukid, ang mga Secuya moagi sa batoon nga mga dalan ug mga sapa aron lang moabot sa pampubliko nga sakyanan nga modala nila ngadto sa Simbahan matag Dominggo.

“Nalipay kaayo mi nga makita si Elder Kearon, siya mipahinumdom namo kang Jesukristo ug sa Iyang gugma,” miingon si Mitzi Secuya, kinsa uban sa iyang pamilya kinasingkasing nga miabiabi sa apostol ug sa iyang asawa. Samtang ang mga Kearon nangalagad sa pamilya, ang anak nga lalaki nga si Ryle mibati nga nalig-on sa iyang pasalig nga magpabiling aktibo: “Magpadayon mi sa pag-adto sa Simbahan, kay kami nasayod nga ang Ginoo nahigugma namo.”

“Usa kini ka matahom nga handomanan nga magpabilin kanamo sa kahangtoran,” miingon si Elder Kearon ngadto sa pamilya atol sa panapos sa pagbisita. “Maanindot kamo, matag usa ninyo,” si Sister Kearon mahigugmaong mipaneguro sa mga anak sa Secuya, nga nag-atubang og pagpanaugdaog tungod sa ilang kahimtang.

“Si Elder Kearon misulti namo nga ang pagdawat og pagpadayag nahisama sa musika. Ikaw mobati niini ug motuman niini, niana ang tanan mosunod kalabot sa pagdawat og pagpadayag. Kon kita dili motuman, nan ang pagpadayag lisod nga moabot.”

John Tilman Lee
Busay 1st Ward, Cebu City Stake

Sa Davao City, sila si Elder Kearon, Elder Nash, ug Bishop Causse mipahigayon og laing Instruksiyon nga Miting sa Area, niining higayona alang sa mga lider sa pagkapari gikan sa rehiyon sa Mindanao, sa meetinghouse sa Buhangin.

Unya ang mga Kearon nakighinabi sa mga 500 ka YSA atol sa Focus Group Discussion ug sa debosyonal. “Pasudla ang Iyang gugma ug kalinaw, pagawasa ang tanang dili maayo nga butang nga dili usab angay,” matod ni Sister Kearon nga mibati og kadasig nga mopakigbahin atol sa debosyonal. Si Elder Kearon midugang sa pakigpulong sa iyang asawa pinaagi sa pagtambag sa batan-ong mga miyembro nga ayaw itugot nga ang “inyong kahadlok mopakgang ninyo ug mopugong sa inyong mga oportunidad sa pagdawat sa mga panalangin.”

Human nga si Julia Faye Lacre sa Matina 2nd Ward, Davao Stake nakadungog sa ilang mga mensahe, “nakatabang kini kanako nga ipagawas ang tanan nakong negatibo nga mga hunahuna tungod sa kabalaka ug kahadlok,” ug “kini usab mipahinumdom nako sa akong bili sa panan-aw sa Dios.”

Sila si Elder ug Sister Kearon adunay espesyal nga kalihokan uban sa mga estudyante sa Maa Central Elementary School, diin ilang gipasiugdahan ang pag- turnover sa bag-ong gitaod nga mga pasilidad sa tubig ug kuryente. “Espesyal kaayo kini nga eskwelahan,” si Elder Kearon miingon, “kami nahigugma kaninyo, ug ganahan sa diwa ug sa palibot sa inyong eskwelahan.” Ang nahimutangan sa eskwelahan duol ra sa nahimutangan sa Davao Philippines Temple.

Pagka-Mayo 27, ang mga Kearon gikuyogan nila ni Elder ug Sister Strong alang sa usa ka paniudto uban sa lainlaing mga tinuohan. “Usa kini ka kalihokan nga nagsaulog sa panaghigalaay, panagsama og mga mithi, ug nagkahiusa nga tinguha sa pagpasiugda og kalinaw ug pagserbisyo,” nga gihatagan ni Elder Strong og gibug-aton sa iyang pagtimbaya sa mga lider sa lainlaing relihiyon nga nagpundok alang sa kalihokan. “Palihog ayaw og hunong sa pagdapit namo sa matag panagpundok nga kamo aduna, ilabi na kon kamo gusto nga makigsulti namo,” si Sultan Ubpon, tsirman sa Islamic Studies at Ateneo de Davao University mipahayag og pasalamat atol sa iyang mensahe.

“Sila si Elder ug Sister Kearon mitudlo nako og importante nga baroganan: usahay ang Ginoo direkta nga mopakita kanato sa tubag, ug usahay Siya mogiya nato aron masayod sa husto nga dalan.”

Addison Katrin Miraflor
Buhangin 2nd Ward, Buhangin Stake

Sila si Elder Nash ug Elder Kearon parehong namulong atol sa usa ka debosyonal sa Philippines Missionary Training Center (MTC) pagka-Mayo 29. “Sa atong pagdapit nila sa pag-ampo ug pagbasa,” si Elder Nash misulti sa mga misyonaryo bahin niadtong ilang tudloan, “kita nagtugot nila sa paghimo og koneksiyon ngadto ni Jesukristo ug sa Langitnong Amahan.”

Alang ni Elder Tungpalan, “ang mga pulong ni Elder Nash nasilsil sa akong hunahuna kon unsa ka importante ang among tahas sa kinabuhi sa mga tawo nga among tudloan.” Samtang naghunahuna siya niadtong iyang matabangan sa Philippines Angeles Mission, iyang naamgohan “kon unsa ka importante ang among tahas sa kinabuhi sa mga tawo nga among tudloan, ug pinaagi sa tabang sa Espiritu Santo, kami makadasig sa ilang panaw paingon sa Manluluwas.”

Human sa pagpasabot ni Elder Kearon ngadto sa mga misyonaryo nga “kamo ang mensahe sa kalipay nga inyong gidala,” si Sister Cinco napahinumdoman sa “kalipay nga akong gibati sa dihang gidawat nako ang ebanghelyo, nga kini usa ka mensahe sa paglaom ug kahupayan.” Sa iyang pagpangandam nga moserbisyo sa Japan Tokyo South Mission, siya midugang nga ang mensahe “nakahatag nako og kasegurohan nga uban sa Ginoo, ako makahimo sa tanang butang.”

Pagka-Biyernes, Mayo 30, sila si Elder ug Sister Kearon mitabang sa mga bata sa Primary sa pagputos sa mga hygiene kit alang sa lisod og kahimtang nga mga bata sa Las Piñas Stake Center. Si Elder Kearon mipakigbahin nga siya “mapasalamaton kaayo nga makita kanang talagsaon nga mga bata nga nagpakita sa bili sa pagserbisyo,” ug mipahayag og panghinaot nga “daghan pa nga mga bata sa atong simbahan sa tibuok kalibotan ang makahimo sa pagtabang ug sa paghatag niana nga pagserbisyo ngadto sa mas daghan pang tawo."

Kadto nga mga pulong nakapahinumdom sa nuybe anyos nga si Natalie Sumagpao: “Nahinumdom ko nga usa ka Pasko, ang akong pamilya ug ako milibot sa pagpanghatag og pagkaon sa mga bata nga anaa sa kadalanan. Mapasalamaton ko nga makahimamat nila ni Elder ug Sister Kearon, nga naggiya namo sa pagserbisyo ug pagdala kanamo paduol kang Jesukristo.”

Ang laing Primary nga partisipante, si Kief Markus Tiu, mibati nga napanalanginan nga makig-istorya ni Elder Kearon, nag- ingon nga “iyang gipasabot og maayo ang kaimportante sa pagserbisyo sa uban sa samang paagi nga gihimo ni Jesukristo, ug nagpahinumdom kanako nga si Kristo mao ang hingpit nga ehemplo nga atong sundon.”

Sa kaulahian nianang adlawa, si Elder Kearon nangulo sa usa ka seremonya sa pag-turnover sa donasyon sa Elsie Gaches Village, usa ka pasilidad nga kapuy-an sa mga bata nga adunay kakulangan sa panglawas sa Muntinlupa City. Ang ubay-ubay nga donasyon sa Simbahan naglakip sa gipahaom [customized] nga mga wheelchair alang sa mga indibidwal nga adunay cerebral palsy, mga hygiene kit, ug mahinungdanong mga suplay sa pagsuporta sa mga residente ug mga kawani.

Pagkasunod adlaw, sila si Elder Kearon, Elder Nash, ug Bishop Causse, sa makausa pa mihatag og importante nga pagbansay sa pagpangulo sa laing Instruksiyon nga Miting sa Area, niining higayona uban sa mga lider sa pagkapari gikan sa tanang dapit sa Luzon.

Sa wala pa mobiya sa Pilipinas, si Elder Nash namulong ngadto sa mga miyembro sa Valenzuela Stake atol sa espesyal nga komperensiya sa stake, naghisgot sa kaimportante sa ikapulo pinaagi sa pagkutlo sa Malaquias 3:10: “Dad-a ang tibuok nga ikapulo ngadto sa Templo aron adunay pagkaon didto. Sulayi ako ug makita ninyo nga ablihan ko ang mga bintana sa langit ug ibubo ko kaninyo sa madagayaon gayod ang mga panalangin”

Ang kinutlo mipahinumdom ni Marifi dela Cruz, presidente sa Relief Society sa Meycauayan 1st Ward, sa panahon nga ang iyang pamilya naglisod sa pinansyal. “Aduna koy anak nga babaye nga didto sa misyon. Misaad mi nga mobayad og tibuok nga suporta sa iyang misyon, ug matinud-anon mi sa pagsunod sa balaod sa ikapulo,” siya miingon. “Sa kaulahian, nasugakod namo ang among mga kalisod ug nadawat ang gisaad nga mga panalangin sa Ginoo, kay giablihan gayod Niya ang mga bintana sa langit.”

“Si Elder Kearon miingon nga Ang Simbahan ni Jesukristo sa mga Santos sa Ulahing mga Adlaw mao ang Simbahan sa bag-ong mga sinugdanan. Ang Langitnong Amahan nasayod nga kita makahimo og mga sayop; mao nga kita adunay atong Manluluwas nga si Jesukristo, aron makabalik kita ngadto Kaniya, bisan kon pila pa ka sayop ang atong nahimo.”

Elisha Kyle Canoy Nalangan
Matina 2nd Ward, Davao Stake

Agi og dugang sa mga kalihokan nga nahisgotan dinhi, si Elder Kearon nakighimamat usab sa mga Area Seventy ug sa ilang mga asawa, mibisita sa mga nahimutangan sa templo sa Cebu ug sa Davao, mihimo og matinahorong pagbisita sa Technical Education and Skills Development Authority (TESDA), ug giinterbiyo sa news portal Rappler. Si Elder Nash nakighimamat sa mga lider sa misyon ug sa mga misyonaryo sa Quezon City North Mission, nagpahigayon og My Plan nga komperensiya uban sa nauli na nga mga misyonaryo, ug nakighinabi sa kabatan-onan atol sa FSY nga komperensiya sa Tanay, Rizal, samtang si Bishop Causse misuroy sa nahimutangan sa templo sa Alabang ug miinspeksyon sa mga pasilidad sa Simbahan ug sa mga planta sa produksiyon.