“Sa Unsang Paagi Kamo Makapangandam alang sa Ikaduhang Pag-anhi,” Liahona, Ago. 2025.
Sa Unsang Paagi Kamo Makapangandam alang sa Ikaduhang Pag-anhi
Si Presidente Russell M. Nelson naghatag og upat ka paagi sa paglig-on sa atong relasyon uban ni Jesukristo agig pangandam sa Iyang pag-abot.
The Second Coming [Ang Ikaduhang Pag-anhi], ni Harry Anderson
Daghang tawo ang mahinamong naghulat sa Ikaduhang Pag-anhi ni Kristo. Mahinamon silang nag-andam alang Kaniya sama sa ilang buhaton kon ang usa ka higala o kaliwat moanha sa pagbisita gikan sa layong dapit. Ang uban tingali mabalaka mahitungod sa mag-unang mga hitabo sa dili pa Siya moanhi. Apan ang pagpangandam alang niining mga hitabo maghimo sa maong panahon sa pag-anhi sa Manluluwas nga usa ka panahon sa kamaya.
Nag-awhag si Presidente Russell M. Nelson kanato sa pag-andam alang sa pag-abot sa Manluluwas pinaagi sa paghimo sa atong “pagkadisipulo nga atong kinatas-an nga prayoridad.” Ania ang upat ka butang nga iyang gitudlo nga atong mahimo aron mapalig-on ang atong relasyon uban sa Manluluwas.
1. Ipahinungod og usab ang inyong kaugalingon ngadto kang Jesukristo
“Si Jesukristo mobalik sa yuta isip ang milenyal nga Mesiyas,” si Presidente Nelson miingon. “Busa karon ako manawagan kaninyo nga ipahinungod pag-usab ang inyong mga kinabuhi ngadto ni Jesukristo.”
Gidapit kita ni Presidente Nelson sa pagduol ngadto kang Kristo ug motanyag sa atong tibuok nga kalag ngadto Kaniya (tan-awa sa Omni 1:26), magpamatuod nga “kini mao ang sekreto sa usa ka kinabuhi nga hingpit ang kalipay!”
Kini nga proseso sa pagpahinungod tingali lahi-lahi ang pagtan-aw sa uban. Apan ang pag-apil sa mga kalihokan ug mga buhat nga mopalambo sa inyong pagpamatuod sa Manluluwas makatabang ninyo sa pagkahimong mas mapahinungoron ngadto Kaniya. Mag-ampo aron makadiskobre og mga paagi nga inyong mapahinungod ang inyong kaugalingon ngadto ni Jesukristo.
2. Mosimba ngadto sa templo
Usa sa labing maayong mga paagi nga kita makapalambo sa atong pagkadisipulo mao ang regular nga pagsimba sa templo. Kon mogahin kita og panahon sa templo, makakat-on kita mahitungod ni Kristo ug mas mahiduol Kaniya. “Ang matag sinsero nga tigpangita ni Jesukristo makakaplag Kaniya diha sa templo, si Presidente Nelson nagtudlo.
Ang pagkaadunay regular nga eskedyul sa pag-adto sa templo makapalambo ug makapalig-on sa inyong pagkadisipulo ug gugma sa Manluluwas. Miingon si Presidente Nelson, “Kon adunay templo nga dili kaayo layo kaninyo, giawhag ko kamo sa pagpangita og paagi sa paghimo og regular nga pakigkita sa Ginoo—moadto sa Iyang balaan nga balay—dayon tumanon kanang pakigkita nga hingpit ug malipayon.”
3. Motabang sa pagpundok sa Israel
Giklaro ni Presidente Nelson nga kinahanglang seryosohon nato ang mahitungod sa pagpundok sa Israel. “Sulod sa mga siglo, ang mga propeta nanagna niini nga pagpundok [tan-awa sa Isaias 11:11–12], ug nanghitabo kini karon gayod! Isip usa ka gikinahanglang pasiuna nga panghitabo sa dili pa ang Ikaduhang Pag-anhi sa Ginoo, kini ang labing importante nga buhat sa kalibotan!”
Ang pagpundok sa nagkatibulaang nga Israel naglakip sa pagtabang sa uban sa paghimo ug pagtuman og mga pakigsaad. Naglangkob kini sa misyonaryo, templo, ug buhat sa family history. Gusto nato nga ang uban moduol kang Jesukristo ug mobati sa Iyang gugma.
4. Tun-i ang sakripisyo sa Manluluwas
Ang dugang nga pagkat-on mahitungod sa Manluluwas usa ka lahi nga paagi sa pagpalambo sa inyong pagkadisipulo. Miingon si Presidente Nelson, “ako moawhag kaninyo sa paggahin og panahon matag semana—alang sa tibuok ninyong kinabuhi—sa pagdugang sa inyong pagsabot sa Pag-ula ni Jesukristo.”
Ang regular nga pagtuon sa Pag-ula ni Jesukristo makatabang nga inyong malig-on ang inyong pagpamatuod sa Iyang gahom. Makaawhag kini kaninyo sa paghinulsol ug pagkahimong mas mahisama sa Manluluwas.
Uban sa Iyang tabang, mas momaayo kita. “Walay kinutoban ang kapasidad sa Manluluwas sa pagtabang kaninyo,” mitudlo si Presidente Nelson. “Ang Iyang dili matugkad nga pag-antos sa Getsemani ug sa Kalbaryo kadto para kaninyo! Ang Iyang walay kinutoban nga Pag-ula kadto para kaninyo!”
Usa ka Malipayong Adlaw
Sama sa gitudlo ni Presidente Nelson:
“Karon ang panahon alang kaninyo ug kanako sa pag-andam alang sa Ikaduhang Pag-anhi sa atong Ginoo ug Manluluwas, si Jesukristo. Karon ang panahon nga atong himoon ang atong pagkadisipulo nga atong kinatas-an nga prayoridad. …
“… Ang labing maayo moabot pa samtang kita hingpit nga motugyan sa atong mga kasingkasing ug sa atong mga kinabuhi ngadto ni Jesukristo.”
Samtang magpaduol kita Kaniya, Siya mopaduol kanato (tan-awa sa Doktrina ug mga Pakigsaad 88:63). Ug kon moanhi na usab Siya, “pahiran [Niya] ang [ilang tanan nga mga] luha” (Gipadayag 21:4). Usa kini ka makalipay nga adlaw.
Ang tagsulat nagpuyo sa Utah, USA.