Naglingkod dapit sa Agianan sa Manluluwas

Tulo ka tuig ang milabay, nadayagnos ko nga dunay Parkinson’s disease—usa ka sakit nga adunay magkagrabe nga pagpangurog ug pagpanakit sa kaunoran. Makasagmuyo kaayo kadto nga balita, ug abi nako ug matapos na ang akong kinabuhi.

Atol sa misunod nga pipila ka bulan, napalgan na lang nako ang akong kaugalingon nga anaa na sa kangitngit, kahingawa, ug depresyon. Nahadlok ko sa mga hagit nga moabot. Naghunahuna ko nga dili na ko mabuhi og dugay tungod sa padayong pagpanakit sa akong mga bukton ug pagpangurog sa akong mga kamot. Nangandoy na lang gayod ako nga molingkod dapit sa agianan sa Manluluwas ug mohikap sa Iyang sapot, sama sa gibuhat sa babaye nga nagtalidugo!

“Kay miingon siya, bisan og mahikapan ko lamang ang iyang bisti, mamaayo gayod ako” (Mark 5:28).

Bisan sa medikal nga pagtambal ug sa daghang pag-ampo sa paghangyo alang sa kahupayan, ang pagkaayo wala moabot. Usa ka adlaw, dihang giablihan nako ang akong kasingkasing ngadto sa Langitnong Amahan, nakaangkon ko og mas lawom nga panabot. Ang Ginoo nag-ayo kanako—dili sa pisikal nga pagkaayo nga akong gipangandoy apan sa pagkaayo nga akong gikinahanglan: espirituhanong pagkaayo.

Mao kadto ang panahona nga akong naamgohan nga ang akong pagsalig sa “espirituhanong pagtudlo” sa Dios nagtubo. Ang akong mga pag-ampo ug pagbati sa unsay gibati sa uban nahimong mas mainiton. Nagsugod ko sa paggahin og panahon matag adlaw sa pagpamalandong ug sa pagpalayo sa mga makabalda, nangita og mga leksiyon nga akong makat-onan gikan sa akong mga hagit. Ang Pag-ula ni Jesukristo nahimong makahuloganon kanako sa bag-ong mga paagi, ug ang akong panginahanglan alang sa paghinulsol nahimong mas dinalian.

Bisan sa akong kasakit, dihang mibati ko nga wala na koy lain pang ikatampo, nasoprisa ko sa usa ka tawag nga moserbisyo isip presidente sa Relief Society sa ward. Ang pagkahikalimot bahin sa akong mga problema samtang nagserbisyo sa ubang kababayen-an maoy usa ka panalangin gikan sa mapinanggaong Amahan, sama og nag-ingon Siya nga Siya misalig gihapon kanako. Agig balos, nakadawat ko og gugma ug malumong pagbati sa mabinationg mga sister kinsa nakasabot sa akong mga hagit.

Karon mibati ko nga naglingkod dapit sa agianan sa Manluluwas. Samtang nagahulat ako Kaniya, ang akong mga hagit naghashas kanako.

Ang Ginoo makaalim sa atong mga kasakit, mapisikal man, emosyonal, o espirituwal, apan kinahanglan nga mopakita kita og pagtuo sa Iyang pagpang-ayo ug mapailubon nga maghulat. Didto sa usa ka dapit subay sa dalan, ang Manluluwas duol ra kaayo nga kita makahikap sa Iyang mga sapot ug makadungog Kaniya nga moingon, “Anak, naayo ka gumikan sa imong pagtuo. Pauli nga malinawon kay dili ka na mag-antos” (Marcos 5:34).