Paglaom ug Tabang pinaagi sa Edukasyon
Ang Simbahan nagpanalangin og liboan ka kabatan-onan ug batan-ong mga single adult pinaagi sa mga inisyatibo sa edukasyon sa West Africa ug sa ubang kanasoran.
Napanalanginan pinaagi sa usa ka magtutudlo sa institute kinsa mitabang niya sa pagkat-on og French ug maandam alang sa usa ka misyon, si Bishop Darmande Legbanon (dapit sa wala) nag-awhag sa batan-ong mga tawo sa West Africa sama ni Alexis Ahouayito (dapit sa tuo), nga karon nagserbisyo og misyon sa Zambia. aron makapahimulos sa mga programa nga sama sa Paglampos sa Pag-eskwela [Succeed in School]. Miingon siya nga ang Paglampos sa Pag-eskwela mopadako sa ilang mga oportunidad.
Dihang si Darmande Legbanon mipasakop sa Ang Simbahan ni Jesukristo sa mga Santos sa Ulahing mga Adlaw, dili siya makabasa, makasulat, o gani dili makasulti og French, nga opisyal nga pinulongan sa Benin. Apan pinaagi sa tabang sa presidente sa stake, nakakat-on siya og French atol sa institute pinaagi sa pagbasa sa Basahon ni Mormon ug miadto sa pagserbisyo og usa ka mission nga French ang pinulongan. Karon, nanag-iya na siya og usa ka malamposon nga mga negosyo sa pagpang-welding, pagpanudlo og mga aprentis, ug nagserbisyo isip bishop sa iyang ward.
Tungod kay nakakat-on siya og pinulongan ug mga kahanas sa kinabuhi pinaagi sa Simbahan, si Bishop Legbanon karon nag-awhag sa iyang kabatan-onan sa West Africa sa pagsunod sa iyang mga lakang. Ang duha ka managlahing inisyatibo sa edukasyon nga—“Paglampos sa Pag-eskwela” alang sa kabatan-onan nga nag-edad og 11 ngadto sa 18 ug ang “Gathering Place” alang sa mga young single adult—nagtabang sa batan-ong mga tawo nga molambo sa akademiya, sa espirituhanon, ug sa sosyal nga paagi. Gikoordinar pinaagi sa mga Kapangulohan sa Area ug mga lokal lider, kining duha ka paningkamot nagpanalangin sa liboan didto sa West Africa ug sa ubang mga bahin sa kalibotan.
Ang mga young single adult gikan sa Tema Ghana Stake nagpakita sa ilang mga pag-catering nga kahanas ngadto sa mga lider sa gobyerno ug sa mga lider sa komunidad sa usa ka komperensiya sa Gathering Place sa Accra.
“Paglampos sa Pag-eskwela,” Paglampos sa Kinabuhi
Ang human sa klase nga programa nga Paglampos sa Pag-eskwela nakatabang sa kabatan-onan nga molambo sa pag-eskwela, pag-andam sa mas taas nga edukasyon, ug pagbarog sa kinaugalingong paningkamot. Sa karon, naimplementar na kini sa daghang mga nasod sa West Africa, diin ang kadaghanan sa mga programa gibanabana nga 30,000 ka estudyante ang nangapil. Anaa na usab kini sa Mexico, Haiti, Papua New Guinea, Vanuatu, ug dapit sa habagatang kapupud-an sa Estados Unidos.
Inubanan sa Paglampos sa Pag-eskwela, “kami nagpahibalo sa … kabatan-onan sa Simbahan nga ang: Edukasyon mahinungdanon. Kami nagmahunahunaon kaninyo, ug kami nagmahunahunaon mahitungod sa pagkat-on,’” miingon si Elder Clark G. Gilbert, Commissioner sa Edukasyon sa Simbahan. Siya ug ang ubang mga lider nag-ingon nga ang Paglampos sa Pag-eskwela usa ka puno sa gahom nga paagi sa pagtabang sa nagtubo nga henerasyon nga molambo ang ilang akademikanhon ug espirituhanong kapasidad.
Ang mga lider sa lokal nga mga seminary ug institute of religion nagpadagan sa programa, ug ang mga lider sa stake ug district mohukom asa sa kapanguhaan ang labing makatabang sa ilang tinagsa-tagsang mga dapit. Ang mga leksiyon ug mga kalihokan gibase sa tibuok nga sumbanan nga kurikulom sa edukasyon. Ang mga leksiyon nagdugang og regular nga mga subject ug nagtabang nga magpabilin ang mga estudyante sa pag-eskwela. Ang mga boluntaryong mga titser gikan sa lokal nga mga stake motudlo sa pagbasa, pagsulat, matematika, ug mga kahanas sa kinabuhi nga mga klase diha sa lokal nga mga bilding sa simbahan.
Si Elder D. Todd Christofferson sa Korum sa Napulog Duha ka Apostoles mipahinungod sa kalamposan sa Paglampos sa Pag-eskwela ngadto sa “espirituhanong elemento” inubanan sa mga akademika. “Among nakita sa daghang mga dapit sa Africa nga ang mga grado [sa mga estudyante] sa nasyonal nga mga eksamin, sa tinuod, midagko pinaagi lang nianang gamayng ekstra nga pagtagad nga nagsuplemento pinaagi sa labing importanting paagi sa unsay ilang nakuha gikan sa eskwelahan.”
Lain pa nga tumong mao ang pagtabang sa mga batan-on aron mopadayon sa mas taas nga edukasyon, sama sa BYU–Pathway Worldwide o bokasyonal nga pagbansay.
Ang mga klase nga Paglampos sa Pag-eskwela gipasabot og maayo:
-
Ang paglaom ug pagtuo kang Jesukristo ug pagkakabig ngadto sa Iyang gipahiuli nga ebanghelyo.
-
Ang kaimportante sa pagkahimong tibuok kinabuhi nga mga tigkat-on.
-
Ang kamahinungdanon ug kaimportante sa mga gitudlo nga mga hilisgotan.
-
Pagkahisakop ug pagtampo ngadto sa usa ka tinambayayongan nga kasinatian sa pagkat-on.
Samtang ang mga estudyante molambo sa ilang akademika, trabaho, ug mga kahanas sa kinabuhi, sila molambo usab sa ilang paglaom sa umaabot ug makapalambo sa ilang potensiyal alang sa mas taas nga edukasyon ug panarbaho.
“Nangandam Ako sa Matag Adlaw”
Samtang nagtambong sa Paglampos sa Pag-eskwela, si Alexis Ahouayito, sa Republika sa Benin, Kasadpang Africa, nakakat-on og mga kahanas nga nakatabang niya sa pag-andam alang sa usa ka misyon. Mobasa siya sa Basahon ni Mormon matag adlaw, nagtuon, ug nag-ampo alang sa Espiritu Santo nga makig-uban kaniya. Iyang nakat-onan sa programa “unsaon sa pagtudlo pinaagi sa Espiritu ug unsaon sa pagtudlo dala ang awtoridad.” Karon siya na si Elder Ahouayito, nga nagserbisyo isip mamulong og Iningles nga misyonaryo sa Zamba Lusaka Mission.
Ang iyang mentor, si Bishop Legbanon, miawhag kaniya sa pagtambong sa usa ka Paglampos sa Pag-eskwela samtang nag-aprentis siya sa welding shop sa bishop.
Laing aprentis usab, si Kodjo Dick Amenyovo, miingon, “Ang kinaiya nga gipakita sa among lider kanamo—giunsa nila kami sa pagpakig-istorya ug giunsa nila kami sa pagtudlo—nagdasig kanamo sa pagkat-on ug pag-adto og mga misyon.”
Dihang pipila sa iyang mga aprentis nagsugod sa pag-abag kaniya, miingon si Bishop Legbanon, dunay uban nga kulang sa mga kahanas sa French nga kaniadto wala kaniya.
“Apan karon mas sayon na kaniya ang pagbasa ug pagsulat, paghimo og matematikal nga mga kalkulasyon, ug paghimo og daghang uban pa nga butang,” lakip ang pag-andam nga mahimong malamposong mga misyonaryo. Ang Paglampos sa Pag-eskwela adunay daghan nga “maayong butang niini, ug nakatabang kini sa akong mga pag-aprentis.”
Usa ka Dinasig nga Programa
“Nasayod ko nga ang atong Langitnong Amahan naghunahuna kaayo mahitungod kanamong mga batan-on. Agig dugang sa seminary, aduna kita niini nga programa,” miingon sa Marie Aimée Judith Ake nga taga Abidjan Côte d’Ivoire Niangon South Stake.
Nagpasalamat siya sa Paglampos sa Pag-eskwela nga nakatabang kaniya sa pagkahimong masaligon.
“Dili na ko maulaw nga mamulong atubangan sa akong mga klasmet, ug dili na ko maulaw nga mohisgot mahitungod sa akong simbahan. Gani akong gibati ang panginahanglan nga moserbisyo og full-time misyon,” miingon siya.
Mapasalamaton sa gihiusa nga programa sa espirituwal ug sekyular nga pagkat-on, dugang pa ni Marie, “nasayod ko nga kini nga programa dinasig sa akong Langitnong Amahan, ug alang kini sa atong kaugalingong kaayohan.”
Si Lawson Kingnadja Mintotibe nagtudlo sa mga estudyante sa Lomé, Togo, unsaon sa paglampos sa pag-eskwela.
Panagpundok, Pagpangandam, Pagkahimo
Ang ebanghelyo ni Jesukristo nagdala og paglaom ug oportunidad sa liboan ka batan-ong mga single adult samtang dungan silang nangadto sa mga Gathering Place.
Ang mga young adult mao “ang kaugmaon sa mga pamilya ug sa mga nasod,” miingon si Elder Alfred Kyungu, Presidente sa Africa West Area. Uban niana nga panan-awon, ang mga lider sa Simbahan, mga young single adult, ug mga senior nga misyonaryo sa Africa West Area nag-establisar og mga Gathering Place aron matabangan ang mga young single adult sa pagkaplag ug magpadayon sa dalan sa pakigsaad, mokwalipikar alang sa panarbaho, ug magminyo sulod sa templo.
“Ang Gathering Place usa ka dapit diin sila makapangandam sa pagkahimong mga lider sa Simbahan ug sa ilang mga pamilya, ug mamahimong mga tawo nga maoy gikinahanglan sa Ginoo ug gusto nga ilang maabot,” miingon si Shirlene Wade, nga nagserbisyo isip young single adult nga misyonaryo sa area nga nagserbisyo sa Africa West Area kauban sa iyang bana, si Alan.
Ang Gathering Place, sa kasagaran adto himoon sa usa ka simbahan o bilding sa institute, mohugpong sa mga young single adult ug sa ilang mga higala samtang mag-abot sila sa paglingaw-lingaw, sa edukasyon, ug espirituwal nga mga kalihokan—kausa matag semana o kaunom matag semana, depende sa panginahanglan ug interes. Ang mga young single adult magtubo nga mas duol sa Ginoo, maglingaw sa himsog nga pagpakig-asosasyon, magkat-on sa pagpanginabuhi, ug mopalambo sa pagbarog pinaagi sa kinaugalingong pagpaningkamot. Moapil sila ug matudloan sa:
-
Relihiyoso nga edukasyon ug magkat-on sa ebanghelyo lakip na sa institute.
-
Edukasyonal nga mga oportunidad, lakip ang teknikal ug bokasyonal nga pagbansay ug sa BYU–Pathway Worldwide.
-
Mga serbisyo ug sosyal nga mga kalihokan.
-
Mga kalihokan sa templo ug family history.
-
Pagpangandam sa pagkamisyonaryo ug pag-apil sa mga kalihokan sa komunidad.
Pagbati sa Gugma sa Dios
Si Zachery ug Rebecca Poulter, nga nagserbisyo isip misyonaryo para sa mga young single adult sukad 2022 hangtod 2024, nakakita mismo sa unsang paagi ang Gathering Place nagpanalangin sa mga young single adult sa Kasadpang Africa. Ang inisyatibo milambo gikan sa usa ka pagtesting sa programa hangtod miabot og 180 ka mga Gathering Place dapit sa ulahing bahin sa 2024 sa Benin, Ghana, Ivory Coast, Liberia, Nigeria, Senegal, Sierra Leone, ug Togo.
“Ang ebanghelyo ni Jesukristo nagdala og paglaom,” miingon si Rebecca, “ug nagdala kini og paglaom pinaagi sa Gathering Place ngadto sa mga young single adult.”
Sigon sa giaprobahan sa mga Kapangulohan sa Area, ang Gathering Place pangulohan sa usa ka stake young single adult committee nga pagasusihon sa presidente sa stake o district.
“Ang mga miyembro sa komitiba sa stake YSA makigkita sa ilang presidente sa stake o district sa pagtino sa mga panginahanglan sa mga young single adult sa ilang stake, ug makakuha sila og mga kapanguhaan nga mohaom niana nga mga panginahanglan,” miingon si Zachery.
Si Elder Adeyinka A. Ojediran, Unang Kapangulohan sa Africa West Area, miingon nga, “Ang komitiba sa young single adult motabang sa mga young single adult sa pagbati sa gugma sa Dios samtang magdapit sila ug mosuporta kanila subay sa dalan sa pakigsaad.” Ang mga lider magtutok sa:
-
Pagtabang sa mga young single adult sa pagsunod sa ebanghelyo ug pagdawat sa makaluwas nga mga ordinansa.
-
Paglig-on kanila sa espirituhanon, sa intelektuwal, sa sosyal, ug sa pisikal nga paagi.
-
Paghigugmaay, pagpakigbahinay, ug pagdapit sa uban sa pagduol ngadto ni Kristo.
-
Paghiusa sa mga pamilya sa duha ka habig sa tabil pinaagi sa buhat sa templo ug family history.
Ang mga young single adult nagkat-on og mga kahanas sa pagluto og pan sa usa ka Gathering Place sa Kumasi Ghana Bantama Stake.
Mga Klase ug Pagkamasaligon
Ang mga klase nga itanyag sa usa ka Gathering Place magsugod sa pagpanghimo og sabon, pagpanghimo og mga sapatos, pagpangluto og pan ngadto sa pagpanupi, pag-computer coding ngadto sa pagpanghimo og mga sinina, ug graphic design ngadto sa pagkahimong negosyante.
“Ang Gathering Place makahatag sa mga young single adult ug mugbo nga mga pagbansay aron sa sulod sa duha o tulo ka bulan makatrabaho na gayod sila,” miingon si Rebecca. “Ug naghatag kini kanila og pagsalig sa pagtan-aw sa butang sama sa BYU–Pathway o sa ubang matang sa edukasyon nga mas labaw sa usa ka taas og tagal nga tumong.”
Ang ginagmay nga district tingali mag-abot lamang matag Sabado, nga adunay mga 15 ngadto sa 20 ka young single adult nga magtambongan sa pipila lamang ka managlahi nga klase. Ang mas dagko nga stake nagtanyag og 25 ngadto sa 30 ka klase matag semana, nga dunay kapin sa 100 ka young single adult nga magtambongan.
Agig dugang sa pagkat-on og mga kahanas ug mga pagnegosyo, ang mga young single adult magdungan sa pagpangaon, managdula, mogamit sa internet, mag-home evening, ug motambong og mga miting sa Simbahan. Ug ang mga partisipante kinsa modala sa ilang mga higala kanunayng makasinati sa kamaya nga makita kadtong mga higala nga mabunyagan.
Mga Bunyag, Mga Trabaho, ug Mga Kaminyoon
“Sulod lamang sa duha ka tuig, duna nay kapin sa 8,000 ka mga bunyag sa West Africa isip resulta sa pagpangimbitar sa mga young single adult og mga higala ngadto sa ilang Gathering Place,” miingon si Alan Wade. “Atol niadtong mao gihapon nga duha ka tuig, adunay kapin sa 11,000 ang nakatrabaho ug kapin sa 6,000 ka mga negosyo ang nasugdan. Ug adunay kapin sa 1,500 ang naminyo. Maingon og nagsugod pa lang kita, uban sa daghan nga single adult nga mipili sa pagbaton og pagtuo ug pagsubay sa dalan sa ebanghelyo.”
Usa ka talagsaong butang mahitungod sa Gathering Place, dugang pa sa mga Poulter, mao nga dili lang kini usa ka lahi nga programa o organisasyon nga naghatag og tabang sa Africa. Kondili, miingon si Rebecca, “ ang Gathering Place nakatabang sa mga young single adult sa pakigtambag sa ilang mga lider ug pagtambayayong aron makakuha sa pagbansay nga ilang gikinahanglan aron molampos sila.”
Ang makausab sa mga kasingkasing sa katawhan dili lang maggikan sa temporaryong tabang, dugang pa ni Zachery, kondili gikan sa pagbarog pinaagi sa kinaugalingong paningkamot nga nakab-ot pinaagi sa mga baroganan sa ebanghelyo.