“Sa Unsang Paagi ang Makasuporta nga mga Relasyon Makatabang sa Mental nga Kahimsog,” Liahona, Ago. 2025.
Sa Unsang Paagi ang Makasuporta nga mga Relasyon Makatabang sa Mental nga Kahimsog
Kadtong mga makahatag og paglaom, motanyag og dalunggan nga maminaw, ug makahatag og maayong tambag mamahimo nga kalig-on sa pagtabang nga imong masagubang ang imong mga hagit.
Mga paghulagway pinaagi ni David Green
Depresyon. Kahingawa. Kabalaka. Perpeksyonista. Kaguol. Ang kinabuhi posibleng puno sa mga panlimbasog sa mental ug emosyonal nga kahimsog nga maghimong lisod ang pagbati og kalipay ug kalinaw.
Daghang kapanguhaan ang imong magamit kon nanglimbasog ka sa mental o emosyonal nga kahimsog. Sigon sa gihisgotan diha sa unang duha ka artikulo niini nga mga serye, mahimo kang makagamit sa kapanguhaan sa Simbahan ug sa personal aron mapalambo ang imong mental nga kahimsog. Mahimo kang mag-ampo sa Langitnong Amahan alang sa pagpang-ayo Manluluwas, makapabag-o nga gahom sa pagtabang kanimo. Ug mahimo kang makakaplag og makasuporta nga mga tawo diha sa imong pamilya, mga higala, ug mga miyembro sa ward o branch nga makatabang.
Si Carolina Perego, usa ka terapista sa Family Services sa Chile, mikompara sa makasuporta nga mga relasyon nga sama niini ngadto sa usa ka taming nga moprotekta kanato sa lisod nga mga panahon: “Ang mga relasyon, mga kapanguhaan gikan sa mga relasyon, ug pundok sa mga tawo nga kakuhaan og suporta importante kaayo alang sa kaayohan sa atong mental ug emosyonal nga kahimsog. Ang pagkaadunay mga tawo nga kasaligan, mahinungdanong mga tawo nga makasuporta kanato sa mga panahon sa pag-antos o kalisod, makahatag og seguridad, kaseguroan, pagsalig.”
Mangayo og Suporta
Ang mga pakigrelasyon malig-on sa “gagmay ug yanong” mga paagi (Alma 37:6). Nagkinahanglan og panahon ug paningkamot ang pagpakigsuod og usa ka tawo. Ang pagkaadunay inisyatibo sa pakigkonektar ngadto sa uban tingali mas makatabang kanimo labaw pa sa imong gihunahuna. “Samtang kita nagpalambo og mahigugmaong mga relasyon sa uban, ang atong pisikal, emosyonal, ug espirituhanong panglawas nalig-on.”
Tanan kita nagkinahanglan og mga pagpakigrelasyon kay makatabang kini nga malikay kita sa pagbati nga malahi kita gikan sa uban. “Ang kaaway gusto nga ipalain kita gikan sa uban ug gusto kanato nga mobati nga nawagtangan sa mga panalangin nga moabot gikan sa mga relasyon.” Ang pagbati nga gipalahi gikan sa uban maghimo kanimong mas mobati og kasubo. Ang pagpalibot nimo sa imong kaugalingon og mga minahal sa kinabuhi usa ka maayo kaayong paagi nga mabatokan ang pagbati nga gipalahi gikan sa uban ug makadawat og tambag, pahimangno, o pagmatikod sa pagbati sa uban.
Apan, kon ikaw naglisod, ang pagpangayo niini nga suporta malisod. Si Nicole De Klerk, usa ka Santos sa Ulahing-adlaw nga terapista sa South Africa, miingon, “Usa sa labing lisod nga butang mahitungod sa mga hagit sa mental nga kahimsog mao nga ang tawo nga nagsinati niini sa kasagaran mobati nga nag-inusara sila, nahibulag, dili kayang higugmaon, depektoso, lahi, usa ka palas-anon.” Ang pakigkonekta sa uban makatabang nga imong makita nga adunay paglaom ug nga ang imong bili walay kinutoban sa panan-aw sa Dios.
Tabang gikan sa inyong Ward o Stake
Usa pa ka lahi nga tinubdan sa tabang nga imong magamit mao ang imong ward o branch. Si Susan Neiva, usa ka Santos sa Ulahing mga adlaw nga terapista sa Portugal, mihulagway kon sa unsang paagi ang lokal nga mga lider makatabang: “Ang mga bishop maminaw sa manggiluy-ong paagi ug tingali makatanyag og ubang kapanguhaan o mga kaadtoan nga mga propesyonal nga magtatambag o mga terapista kon gikinahanglan.” Dungan sa padayon nga panginahanglan, ang inyong bishop o branch president morekomendar nga makigkita ka sa ubang mga lider sa ward o branch, sama sa usa ka sakop sa kapangulahon sa elders korum o kapangulohan sa Relief Society. Kini nga mga lider gitawag aron sa pagpangalagad sa mga miyembro sa ward ug mahimong madasig aron masayod kon unsaon sa pagtabang.
Si Sister Neiva nagrekomendar usab sa pagdawat og mga pagbisita gikan sa tigpangalagad nga mga brother o mga sister. “Kini nga mga pagbisita nagtanyag og mga oportunidad alang sa pagpakig-uban, pagpaminaw, ug praktikal nga tabang, nga makahatag og kaayohan niadtong nagsinati og mga hagit sa mental nga kahimsog.” Ang pagpangalagad usa ka paagi nga ang mga miyembro makapakita sa gugma sa Manluluwas diha kanimo, kon imong dawaton ang ilang mga paningkamot. Kon dili regular ang mga pagbisita gikan sa imong tigpangalagad nga mga brother o mga sister, adtoa ug hangyoa ang ilang suporta.
Ang Makaayo nga Kamot sa Manluluwas
Samtang ang makasuporta nga mga relasyon mahimong usa ka panalangin, ang mahagiton nga mga relasyon mahimong usa ka tinubdan sa kalisod, lakip sa usa ka kapikas, anak, o kauban sa trabaho, isip sanglitanan. Ang makaluya ug ang mabingkilon nga mga relasyon makadugang sa mental nga sakit ug kasamok sa emosyon.
Ang mga tawo sa imong kinabuhi tingali dili kanunayng masangkapan aron sa pagtabang sa imong mga hagit sa mental nga kahimsog, apan ang Manluluwas kanunayng andam nga motabang. Sama sa gitudlo ni Elder Juan Pablo Villar nga sakop sa Seventy, “Ang Iyang mga kamot kanunayng maanaa alang kanato, bisan og dili nato kini makita sa sinugdanan, kay Siya gipili sa atong Langitnong Amahan nga mahimo natong Manluluwas, ang Manunubos sa tanang tawhanong binuhat.”
Ang Langitnong Amahan ug si Jesukristo nahigugma kanimo binsa unsa pang mga pagsulay ang imong giatubang. Kanunayng nakatuyhad ang Ilang mga kamot. Mahimo kang makigsulti sa Langitnong Amahan pinaagi sa pag-ampo. Makigsulti Siya kanimo pinaagi sa mga kasulatan, pinaagi sa Espiritu Santo, pinaagi sa impluwensiya sa uban, ug sa uban pang mga paagi aron makatabang sa pagdala og kalinaw sa imong kinabuhi. Ikonsiderar ang pagpangayo og tabang sa usa ka tawo diha sa imong palibot nga makatanyag og emosyonal og sosyal nga suporta nga makatabang kanimo nga magmalig-on sa oras sa panginahanglan.