Usa ka Gasa nga Dili Gayod Nako Makalimtan

Dihang ang full-time nga mga misyonaryo miadto sa akong panimalay sa France sa paghimo og usa proyekto sa pagserbisyo, ang akong mga ginikanan dili aktibong mga miyembro sa Simbahan, ug ako wala mabunyagi. Wala madugay gitudloan ko sa mga misyonaryo sa ebanghelyo, nga akong giganahan. Ug wala madugay ang akong mga ginikanan mibalik sa simbahan.

“Kinsay mobunyag kanimo?” nangutana kanako ang mga misyonaryo.

“Ang akong papa,” mitubag ko.

Ang akong papa, nga naggikan sa Italya, usa ka maayong tawo. Gitudloan niya ako nga tan-awon ang mga tawo sama sa pagtan-aw ni Jesus kanila. Subo lang, namatay siya, pipila ka semana sa wala pa ang akong bunyag.

Milabay ang panahon, dihang nadawat nako ang akong tawag sa pagmisyon, mahinamon kaayo ko nga akong gihangyo ang akong mama sa pag-abli niini.

“Malipay gyod ka niini,” nagsulti siya nga naghilak. “Adto ka sa lumad nga nasod sa imong amahan!”

Nangandoy gayod ako nga moserbisyo sa Italya. Ang mga misyon mahitungod sa pagserbisyo og mga tawo, dili mahitungod sa pagserbisyo sa mga dapit. Apan nag-ampo ko nga makaserbisyo ko sa Italya, ilabi na sa siyudad sa Gaeta, diin ang mga katigulangan sa akong amahan nanagpuyo sukad pa sa ika-10 nga siglo.

Human makaserbisyo sa Roma ug sa Sicily, nakadawat ko og malipayong balita nga mabalhin ko sa erya nga naglakip sa Gaeta. Sa wala pa kana nga pagbalhin sa sayong bahin sa 2023, ang akong kompanyon ug talagsaong higala nga si Elder Jack Beck mihatag kanako og regalo nga dili gayod nako makalimtan. Si Elder Beck usa ka talentado nga artist. Gikan sa usa ka gamay nga litrato sa akong amahan nga akong dala, naghimo si Elder Beck og usa ka drowing nga litrato sa akong amahan.

Motan-aw ako niana nga litrato matag adlaw atol sa personal nga pagtuon. Naghatag kini kanako og kalig-on sa pagpakigbahin sa ebanghelyo.

Diha dayon nga na-assign ko sa Gaeta, gipangita nako ang akong mga kaliwat. Dihang gipakita nako sa magulang nga lalaki sa akong Papa ang litrato, nakahilak siya. Wala na niya igkita ang iyang igsoon sulod sa katuigan ug walay litrato kaniya.

Akong gitudloan ang akong uyoan nga sa moabot nga adlaw makita niya pag-usab ang iyang igsoon—dili sa litrato apan sa personal gayod. Gitudloan nako siya nga pinaagi sa ebanghelyo, makapuyo siya kauban sa iyang igsoon pag-usab diha sa gugma ug kalinaw uban sa Manluluwas.

Nakita nako ang talagsaong mga milagro sa Gaeta dihang akong gipakigbahin sa akong mga sakop sa pamilya ang maayong mga balita nga tungod kay gibuntog ni Jesukristo ang kamatayon, ang pagkawala sa mga minahal temporaryo lamang (tan-awa sa Mosiah 16:8). Mopamatuod ko nga pinaagi sa Iyang maulaon nga sakripisyo, gihimong posible sa Manluluwas alang sa atong mga pamilya nga magkapundok sa kahangtoran.