“Pagbarog Pinaagi sa Kinaugalingong Paningkamot: Pagkahimong Mapahiuyonon ug Makinaugalingon sa usa ka Walay Kaseguroang Kalibotan,” Liahona, Ago. 2025.
Pagbarog Pinaagi sa Kinaugalingong Paningkamot:
Pagkahimong Mapahiuyonon ug Makinaugalingon sa usa ka Walay Kaseguroang Kalibotan
Ang mga grupo sa Simbahan sa pagbarog pinaagi sa kinaugalingong paningkamot makahimo og kalainan alang sa tanan, sa bisan unsang pangedaron o mga kahimtang.
Si Jeff Rebutar sa Pasig Philippines Stake nagtuo nga andam na siya nga moretiro. Human nakatrabaho hangtod sa iyang pag-edad og duol na sa 70, aduna siyay igo nga kinitaan nga ikasuporta sa kaniya ug sa iyang asawa nga walay tabang sa gobyerno.
Dayon giatake og stroke ang iyang asawa. Mga balayranan sa pagpatambal nagpatong-patong, ug ang paggasto mihurot sa ilang kinitaan. Dihang wala nay kwarta mikuha si Brother Rebutar sa kurso sa Simbahan nga “Pagsugod ug Pagpalambo og Akong Negosyo alang sa Pagbarog Pinaagi sa Kinaugalingong Paningkamot.” Human sa pipila ka pagsulay ug pagkasayop, nagmugna siya og usa ka panglimpiyo nga magamit sa mga panimalay ug sa mga buhatan.
“Ang kurso sa pagbansay ug ang mga binulan nga miting mapuslanon alang sa pagsugod,” miingon si Brother Rebutar. “Kinahanglan maningkamot ko sa pagsangkap sa akong pamilya, mao nga padayon kong naningkamot. Human sa pipila ka dihadiha dayon nga kalamposan, nahimo ko nga lider sa dili pormal nga grupo ngadto sa uban. Walay makatupong sa aktuwal nga kasinatian sa usa ka bag-ong negosyo. Makakat-on kita pinaagi sa paglihok, dili lang basta motambong og miting.”
Ang mga kurso sa Simbahan sa pagbarog pinaagi sa kinaugalingong paningkamot gituyo aron magamit sa praktikal nga paagi. Gitugotan niini ang mga sumasalmot aron gamiton ang mga baroganan sa edukasyon, pagkugi, ug hugot nga pagtuo ug pagsalig diha sa Ginoo.
“Igo Ba ang Gihimo Nakong Pagpakigbahin?”
Didto sa Plano Texas Stake, kapin sa 900 ka miyembro ang miapil sa mga grupo sa pagbarog pinaagi sa kinaugalingong paningkamot sa bag-o lang nga katuigan. Ang uban moadto isip mga tigkat-on aron makakita og mga kapanguhaan o bag-ong mga ideya. Ang uban moadto isip “tigbayaw” sa pagsangkap og giya, mga sugyot, o suporta sa uban.
Si Jerry Martin, usa ka sakop sa kapangulohan sa Plano stake, miapil sa usa ka grupo sa pagbarog pinaagi sa kinaugalingong paningkamot alang sa personal nga panalapi aron mapamilyar niya ang proseso ug ang materyal sa kurso. Isip usa ka retiradong opisyal sa panalapi sa dako nga kompanya, nagtuo siya nga wala na kaayo siyay angay makat-onan mahitungod sa pinansiyal.
“Nakakita ko og mga oportunidad nga matabangan ang pipila ka partisipante nga mahaw-as sa utang o makapalambo og personal nga mga plano sa pagtigom ug pagpamuhonan nga haom sa ilang lahi nga mga kahimtang,” miingon siya. “Makatagbaw kaayo kadto.” Ug nalingaw siya sa panag-uban sa grupo. Dayon duna siyay usa ka butang nga nabantayan.
“Kanunay kong mobayad sa akong ikapulo ug ubay-ubay nga halad sa puasa, apan dihang miapil ko niini nga grupo, morag mibati ko nga may kulang pa ang akong gibuhat,” miingon si Brother Martin. “Igo ba ang gihimo nakong pagpakigbahin? Igo ba ang gihimo nakong kamapahinungoron?”
Bisan sa iyang personal nga pagserbisyo ug mga kontribusyon sa Simbahan, kining mga pangutana nagpabilin. Samtang mibisita sa India, nakahimamat siya og daghang indibidwal nga aktibong misuporta og lainlaing makitawhanong mga paningkamot. Sama sa giingon ni Presidente Dallin H. Oaks, Unang Magtatambag sa Unang Kapangulohan, “Ang Simbahan ni Jesukristo sa mga Santos sa Ulahing mga Adlaw nakatutok sa pagserbisyo niadtong nanginahanglan, ug nakatutok usab kini sa pakigtambayayong sa uban niana nga paningkamot.” Tungod niini, si Brother Martin nagsugod sa pagpangita og ubang mga oportunidad nga makaserbisyo ug makipagtambayayong sa sama og tumong nga mga indibidwal. Wala niya dahoma ang unsay sunod nga mahitabo.
“Duna koy bililhon nga tinigom nga mga sensilyo,” miingon si Brother Martin. “Dihang nag-ampo ko sa India mahitungod sa kon unsaon ug kon asa kaha ako makatabang sa buhat nga gihimo sa uban, usa ka pag-aghat miabot kanako nga ako usab kinahanglang mokonsidera sa tinubdan sa potensiyal nga mga kontribusyon—dili gikan sa akong account nga ipuhonan apan gikan sa akong tinigom nga mga sensilyo. Niadtong panahona akong naamgohan nga: panahon na nako kini sa pagpahinungod. Unsa kamakahuloganon kana nga kinolektang mga sensilyo ngari kanako?”
Sa kataposan, gibaligya ni Brother Martin ang iyang kinolektang mga sensilyo ug gigamit ang halin nga ipundo ngadto sa makitawhanong mga proyekto sa gawas sa nasod ug mga pagpang-eskolar sa lokal nga mga kolehiyo. “Kon wala ko moapil sa grupo sa pagbarog pinaagi sa kinaugalingong paningkamot, dili gyod tingali ko makahunahuna unsaon nako nga makabayaw sa uban pinaagi sa akong panahon ingon man sa akong kwarta,” mipasabot siya. “Maayo kaayo ako niini.”
“Ang Inyong Tahas Mao ang Paghigugma ug Pagpangalagad”
Didto sa St. George Utah Green Valley Stake, si Troy ug Sue Olsen nagsugod sa pagtambong sa usa ka grupo sa pagbarog pinaagi sa kinaugalingong paningkamot bahin sa pagpalig-on sa emosyon, naghunahuna nga sila makatabang sa uban. Ang ilang bishop mihangyo sa mga sakop sa konseho sa ward nga moapil sa usa ka grupo aron mopakigbahin nila ang unsay ilang nakat-onan ngadto sa uban.
Ang pamilyang Olsen nag-atubang og pipila ka hagit sa pagtipon og puyo sa pamilya nga dunay hingkod nang mga anak. “Dunay sakop sa among pamilya nga nagsagobang og lisod kaayong mga panahon,” mipasabot si Sister Olsen. “Nasagmuyo ako nga wala kaayo ako makatabang.” Ang mga diskusyon mahitungod sa mga “tradisyonal nga sugilanon” ug mga “reyalidad” gikan sa workbook nakatabang sa mga Olsen nga matan-aw sa lahi nga paagi ang sitwasyon sa ilang pamilya.
Dayon laing sakop sa grupo mipakigbahin sa gibati niyang sad-an ug kawalay paglaom dihang ang iyang igsoong lalaki naghikog. Namatikdan ni Sister Olsen nga ang uban usab adunay emosyonal nga mga palas-anon nga siya sa hingpit wala makamatikod sa gikinahanglan nga pagpangalagad sa lahi nga paagi.
Tingali dili niya kayang pas-anon ang palas-anon, apan ang Manluluwas makahimo. Gipasabot sa workbook nga, “Ang inyong tahas mao ang paghigugma ug pagpangalagad ngadto sa mga tawo, ug ang Manluluwas ang mohimo sa pagpang-ayo.” Miingon si Sister Olsen, “Pinaagi sa pagbutang sa atong mga palas-anon ngadto Kaniya, atong makita pinaagi sa bag-ong panan-aw, madungog ang karaang mga mensahe sa bag-ong mga paagi, ug makaangkon og nabag-ong panabot bahin sa ebanghelyo ug sa Iyang makaayo nga gahom.”
Ang mga diskusyon sa grupo, mga sanglitanan sa workbook, ug personal nga empatiya tanan makatabang og dako sa pagpalambo usab sa ilang sitwasyon. Si Sister Olsen padayon nga dunay pipila ka mabalak-ong mga gutlo ug daghang kinasingkasing nga mga pag-ampo. Labaw sa tanan, nakita niya karon sa lahi nga paagi ang iyang tahas—sa paghigugma ug pagpangalagad—dili ang pag-ayo o pagsulbad sa mga problema sa uban.
Ang mga grupo sa pagbarog pinaagi sa kinaugalingong paningkamot mohiusa sa mapuslanong mga kahanas ngadto sa espirituwal nga mga baroganan aron matabangan ang mga miyembro sa pagtabang sa ilang kaugalingon. Nagsangkap kini og usa ka estraktura aron masabtan ang mga problema sa personal ug pamilya. Nagpasiugda kini og usa ka pagbati sa pagkahisakop, magsangkap og pagsuportahay ug kahimoan, ug magsangkap og luwas nga dapit diin ang mga miyembro mopakigbahin og mga kasinatian ug magkat-on sa usag-usa, mosalig sa walay kinutoban nga Pag-ula. Ug kon mosalig kita sa Manluluwas, maatoa kini nga saad gikan ni Presidente Russell M. Nelson: “Samtang kamo tinud-anay nga maghinulsol ug mangayo sa Iyang panabang, kamo makabuntog sa mga hagit sa walay kasegurohan nga kalibotan karon.”
Ang tagsulat nagpuyo sa Utah, USA.