Gikan sa YA Matag Semana
Unsay Gitudlo sa Pagbalhin ngadto sa Langyaw nga Nasod ngari Nako mahitungod sa Espirituhanong Pagbarog pinaagi sa Kinaugalingong Paningkamot
Ang espirituhanong pagbarog pinaagi sa kinaugalingong paningkamot wala magpasabot nga mosalig sa kaugalingon; nagpasabot kini nga mosalig sa Ginoo.
Litrato sa maayong kabubut-on sa tigsulat
Sa dihang mibalhin ko gikan sa Peru ngadto sa Estados Unidos aron mahimong yaya, ang tanan morag lahi ra. Ang pinulongan, kultura, pagkaon, ug ang klema lahi ra usab kaayo.
Mao usab kadto ang unang higayon nga ako na lang, layo sa akong pamilya. Sa akong pagdako, ang pagsimba yano lang nga kabahin sa kinabuhi sa akong pamilya. Ganahan ko niini, apan sayon ra kaayo nga mosalig sa akong pamilya aron magpabiling lig-on sa espiritu.
Hangtod nga sa dihang nibalhin na ako nagsugod ko sa pagkasabot sa kahulogan sa espirituhanong pagbarog pinaagi sa kinaugalingong paningkamot.
Pagkaplag og Kalig-on diha sa Simbahan
Dihang mibalhin ko, wala koy kaila ug dili ko makasulti og Iningles. Gibati nako ang kalibog, kawalay koneksiyon, ug pag-inusara. Makahahadlok kadto.
Sa dihang akong gisulti ang akong mga kabalaka mahitungod sa pagpuyo sa laing nasod ngadto sa akong mama, mitambag siya nako, “Bisan asa ka moadto, pangitaa ang Simbahan.”
Busa mao gayod kana ang akong gibuhat: akong gipangita ang labing duol nga chapel ug nakaplagan ang akong ward. Wala lang nako mahibaloi nga kining simple nga lakang mahimong mahinungdanong punto sa kausaban sa akong panaw sa espirituhanong pagbarog pinaagi sa kinaugalingong paningkamot.
Ang akong unang Dominggo niining bag-ong nasod lisod kaayo, apan ang pag-abi-abi sa mga miyembro sa akong bag-o nga ward tinuod nga usa ka milagro. Usa ka sister midapit nako sa pagtambong sa institute, ug pinaagi niana, dili lang kay milambo ang akong Iningles apan usab mipadako sa gidaghanon sa akong mga higala.
Salamat sa institute, nakatambong ko sa duol nga komperensiya alang sa batan-on nga mga single adult sa Simbahan ug nakakonekta sa ubang mga young adult nga naningkamot sa pagsunod sa ebanghelyo.
Gibati gyod nako nga nagtubo ang akong espirituhanong pagbarog pinaagi sa kinaugalingong paningkamot samtang mainampoon nakong gituman ang akong mga pakigsaad, miambit sa sakramento matag Dominggo, ug miserbisyo sa uban.
Pagsalig sa Ginoo
Bisan pa niining tanan nga mga panalangin, nag-atubang gihapon ko og mga hagit.
Ang pagtrabaho isip usa ka yaya nga nagpuyo sa balay sa amo dili kaayo maayo sama sa akong gilaoman. Ang pamilya nga akong gisak-an wala motuman sa ilang saad sa kontrata, ug nakahukom ko nga mangita og bag-ong trabaho ug bag-ong dapit nga kapuy-an.
Dunay daghang mga gabii nga wala ko mahibalo kon asa ko moadto. Walay kataposan ang akong pagpangita, ug ang dili maayong buot sa pamilya nga akong gisak-an maoy hinungdan nga nakapangutana ko sa tanang butang nga nahitabo.
Nahibalo ko nga ang unang lakang mao ang pag-ampo ngadto sa Langitnong Amahan mahitungod sa akong sitwasyon. Sama sa gitudlo ni Elder Clement M. Matswagothata, sa Area Seventy: “Pagmainampoon samtang mangita kamo og mga paagi nga makabarog pinaagi sa kinaugalingong paningkamot. Ako mopasalig kaninyo nga ang Langitnong Amahan mopadala og mga hunahuna ngadto sa inyong alimpatakan ug mopanalangin kaninyo.”
Matag gabii, modangop ko sa Langitnong Amahan pinaagi sa pag-ampo, naghangyo dili lang sa kasulbaran sa akong problema apan sa kusog nga molihok sumala sa mga pag-aghat. Nasayod ko nga “patay ang pagtuo nga walay binuhatan” (Santiago 2:26).
Sa dihang akong gipahibalo ang akong sitwasyon ngadto sa akong mga higala sa ward, usa ka sister mitanyag nako og part-time nga trabaho, nagtabang kanako aron makatigom og ekstra nga kwarta nga ikasuporta sa akong kaugalingon. Nalipay kaayo ko nga gipangita nako ang akong ward ug makasalig nila atol niining malisod nga panahon.
Paghangop sa Espirituhanong Pagtubo
Sa kataposan, nakakita ko og usa ka bag-ong kasak-an nga pamilya didto sa Utah. Human sa daghang pag-ampo, kusog ang akong pagbati nga mao kini ang dapit nga kinahanglan akong adtoan. Mibalhin na usab ako, nakakaplag og YSA nga ward diin makapadayon ko sa pagserbisyo ug pagtubo.
Kini nga kasinatian nagtudlo nako nga ang pagbarog pinaagi sa kinaugalingong paningkamot—espirituwal o temporal—wala magpasabot nga mosagubang sa tanang butang nga kita ra. Sama sa gitudlo ni Elder Gerrit W. Gong sa Korum sa Napulog Duha ka Apostoles: “‘Ang pagbarog pinaagi sa kinaugalingong paningkamot wala magpasabot nga mosalig lamang sa atong kaugalingon. Sa kataposan, nagpasabot kini sa pagtuo og pagsalig ngadto sa Ginoo. Ang pagbarog pinaagi sa kinaugalingong paningkamot usa ka pagpili nga atong gihimo aron moduol ngadto sa Ginoo aron makatabang Siya kanato sa pagtabang sa uban.”
Pinaagi sa pagtuo ug pagpaubos, atong matugyan ang atong mga kahuyang, ug ang Ginoo mohimo sa “mahuyang nga mga butang nga malig-on” (Ether 12:27). Ang akong mga kahuyang nahimong mga oportunidad para nako aron magkaduol ngadto sa Dios, mosalig Kaniya sa pagtabang nako nga “molihok, aron makabarog nga magkinaugalingon, ug mahimong sama Kaniya.”
Sa matag higayon nga bation nako ang kawalay kaseguroan o kahadlok mahitungod sa umaabot, ang paghatag og prayoridad sa akong relasyon ngadto sa Langitnong Amahan ug ni Jesukristo pinaagi sa pag-ampo, pagkonekta ngadto sa akong mga isig kadisipulo, ug pagbag-o sa akong mga pakigsaad nakatabang nako nga mobati og kalinaw.
Sa paglantaw og balik sa akong kasinatian, akong nakita nga ang matag hagit maoy usa ka oportunidad sa espirituwal nga pagtubo. Sama nga ang akong temporal nga pagbarog sa kaugalinon mitubo, ang akong espirituhanong pagbarog pinaagi sa kinaugalingong paningkamot mitubo samtang milihok ko aron mapalig-on ang akong relasyon sa Dios.
Bisan asa ko dad-on sa kinabuhi, kanunay nakong hinumdoman ang tambag sa akong mama nga pangitaon ang Simbahan—pangitaon si Kristo. Nasayod ko nga ang Langitnong Amahan ug si Jesukristo hingpit nga nahibalo sa akong mga kahimtang. Bisan asa ako moadto, ang pagdangop ngadto Kanila kanunayng motultol nako sa sakto nga direksiyon.