“Sila nga Ania Uban Kanato,” Liahona, Ago. 2025.
Kababayen-an sa Pakigsaad
Sila nga Ania Uban Kanato
Ang gahom sa Manluluwas mokunsad diha sa Iyang matinud-anong mga katawhan sa pakigsaad.
Ganahan ko sa istorya ni Eliseo ang propeta. Ang hari sa Syria gusto nga modakop ni Eliseo ug mipadala og mga sundalo aron mopalibot sa siyudad nga iyang gipuy-an. Dihang nakita sila sa batan-ong sulogoon ni Eliseo, nahadlok siya ug nangutana kang Eliseo unsay ilang buhaton. (Tan-awa sa 2 Mga Hari 6:11–15.) Ang tubag ni Eliseo mao “Ayaw kahadlok: kay ang ania uban kanato mas daghan kay niadtong uban kanila” (2 Mga Hari 6:16). Ang sulugoon tingali naghunahuna kon sa unsang paagi kini nahimong posible kay iyang nakita nga gipalibotan sila sa kaaway. Apan dayon nag-ampo si Eliseo nga ang Ginoo mobuka sa mga mata niining batan-ong lalaki, ug iyang nakita nga “ang bukid napuno sa mga kabayo ug mga [karwahi] nga kalayo nanaglibot kang Eliseo”(2 Mga Hari 6:17).
Bisan asa man kamo sa kalibotan, hinumdomi kanunay nga kadtong nagauban kanato ug nagtabang kanato ug nagdasig kanato mas daghan pa kay niadtong tingali nagbatok kanato, sa bisan unsa pa man nga paagi makita nato kini. Samtang mopili kita nga magpabiling konektado sa atong Amahan sa Langit ug ni Jesukristo pinaagi sa atong mga pakigsaad Kanila, makaseguro kita niana nga kamatuoran. Ug sila nga ania uban kanato mas daghan pa kaysa niadtong nagabatok kanato. Mopamatuod ako niana!
Sama sa gisangyaw sa bantogan nga misyonaryo diha sa Basahon ni Mormon nga si Ammon human sa iyang daghan nga katuigan sa kalisdanan ug kalipay sa pagsangyaw ngadto sa mga Lamanita, sa moabot nga adlaw kita usab magasangyaw:
“Oo, ako nasayod nga ako walay bili; kon mahitungod sa akong kusog huyang ako; busa dili ako manghambog sa akong kaugalingon, apan ipanghambog nako ang akong Dios, tungod kay sa iyang kusog makahimo ako sa tanang mga butang; oo, tan-awa, daghang kahibulongan nga milagro ang atong nabuhat niini nga yuta, tungod niana kita modayeg sa iyang ngalan sa kahangtoran. …
“… Tan-awa, kinsa ang makahimaya pag-ayo sa Ginoo? Oo, kinsa ang makasulti pag-ayo diha sa iyang dakong gahom, ug sa iyang kaluoy, ug sa iyang pagkamainantoson sa katawhan?” (Alma 26:12, 16).
Usa ka Dios nga May Dakong Gahom ug Kaluoy
Mao kana ang Dios nga atong gisimba! Usa ka Dios nga may dakong gahom ug kaluoy ug mainatoson! Usa ka Dios nga adunay plano sa pagtubos kanato—sa mahinungdanong plano sa kalipay—nga gihimong posible pinaagi sa atong minahal nga Manluluwas ug sa Iyang maulaon nga sakripisyo tungod og alang kanato (tan-awa sa Alma 42).
Ang atong Langitnong Amahan ug ang Iyang Anak, si Jesukristo, kanunay magauban kanato bisan asa kita moadto sa kalibotan, kon atong tugotan Sila pinaagi sa pagpili Kanila ug sa padayon nga pagpili Kanila. Dili nila ipamugos ang Ilang Kaugalingon sulod sa atong kinabuhi. Atoa kini nga pagpili, apan nganong mopili man nga maglakaw niini nga mag-inusara kon pwede man kitang makabaton sa balaang gahom, panalipod, ug mga saad nga Ilang ikatanyag ngari kanato kon kita mopili nga malipayong mohigot sa atong mga kaugalingon ngadto Kanila pinaagi sa relasyon sa pakigsaad? Mao kana ang unsay anaa kang Eliseo, ug tungod niana, wala siya mahadlok, bisan sa dihang gipalibotan siya sa mga sundalo sa daotang hari.
Nakita ni Nephi ang atong panahon:
“Ug nahitabo nga nakakita ako sa simbahan sa Kordero sa Dios, ug ang gidaghanon niini pipila lamang. …
“Ug nahitabo nga ako, si Nephi, nakakita sa gahom sa Kordero sa Dios, nga kini mikunsad diha sa mga santos sa simbahan sa Kordero, ug diha sa katawhan sa pakigsaad sa Ginoo, kinsa nagkatibulaag sa ibabaw sa tibuok yuta; ug gisangkapan sila sa pagkamatarong ug sa gahom sa Dios sa dako nga himaya” (1 Nephi 14:12, 14).
Mga Katawhan sa Pakigsaad nga Gisangkapan og Gahom
Isip mga miyembro sa gipahiuli nga Simbahan ni Kristo sa tibuok kalibotan, diyotay ra ang atong gidaghanon, apan ang saad mao nga ang gahom sa Kordero sa Dios mokunsad diha sa katawhan sa pakigsaad sa Ginoo kinsa nagkatibulaag ibabaw sa tibuok yuta. Mao kana kita! Kon motuman kita sa atong mga pakigsaad sa Dios, ang saad mao nga kita masangkapan sa Iyang gahom.
Mopamatuod ko uban ni Presidente Jeffrey R. Holland, Akting nga Presidente sa Korum sa Napulog Duha ka Apostoles, nga kita adunay mga anghel sa atong palibot diha sa duha ka habig sa tabil. Sigon sa iyang gipamahayag: “Ang Dios dili mobiya kanato nga mag-inusara, dili mobiya kanato nga walay tabang sa mga hagit nga atong giatubang. … Ug sa kanunay anaa kadtong mga anghel kinsa moabot ug maglakaw libot kanato, makita ug dili makita, nailhan ug wala mailhi, mortal ug imortal.”