Gikan sa YA Matag Semana
Ako Natanggong sa Akong Sitwasyon. Ang Dios Naghimo og Paagi nga Makapadayon
Sa dihang ang akong igsoong lalaki ug ako nabinlan og utang sa among mga ginikanan, wala kami masayod kon unsaon kaha namo pagtukod sa mas maayong kaugmaon.
Human ang among mama namatay sa wala damha, ang akong igsoong lalaki ug ako wala lamang nagbangotan—kami usab nahibilin nga nag-atubang sa kalisod sa pinansiyal.
Ang among amahan namatay mga tuig na ang milabay, ug samtang ang among mama nagbuhi namo, kanunay siyang magpahulam og kwarta sa uban sa panahon sa ilang panginahanglan. Subo lang, ang iyang kamanggihatagon miresulta nga wala na siyay ikabayad sa iyang kaugalinong utang, nga nabinlan ang akong igsoong lalaki ug ako nga nahimong responsable sa pagbayad sa iyang mga utang.
Kaming duha wala pa mahuman sa among mga pagtungha ug wala pa makatrabaho, mao nga kami nabalaka mahitungod sa pagbayad sa utang samtang nagbayad usab sa among binulan nga mga galastohan.
Wala kami masayod unsay buhaton, mao nga midangop kami sa Langitnong Amahan alang sa tabang.
Pagpangita og Paagi aron Makapadayon
Human sa mga pag-ampo, ang akong igsoon ug ako mibati og kadasig nga mangayo og pinansiyal nga tambag gikan sa usa ka higala kinsa maayo sa pagbadyet. Among gikonsiderar ang pagbaligya sa among balay tungod kay wala kami igong kwarta nga pangbayad niini ug sa among mga utang matag bulan. Apan pinaagi sa ilang tabang, kami nakahukom nga ibaligya ang among bililhong mga butang sa among panimalay aron makabayad hangtod nga ako makagradwar ug makatrabaho.
Sa ngadto-ngadto, kami kanunay nga adunay saktong kwarta aron mabayran ang among mga utang.
Bisan paman niini nga milagro, usahay ako maluya gihapon. Nagtrabaho na ko og maayo ug gusto nga mopadayon sa akong kaugalingong kinabuhi. Aduna koy kaugalingong pangandoy, lakip ang pagserbisyo og misyon, nga murag imposible bisan og nadumula namo ang pagbayad niini nga utang.
Nag-ampo ko sa Langitnong Amahan ug misulti Kaniya sa akong tinguha nga moadto. Ako misaad Kaniya nga akong buhaton kutob sa akong mahimo gikan sa akong kaugalingon nga mahitabo kini, ug ako mihangyo Kaniya nga ipakita nako ang dalan aron ako makaadto ug makaserbisyo.
Ako adunay pagpamatuod sa pagbarog pinaagi sa kinaugalingong paningkamot ug sa ikapulo, apan makapatental kaayo ang dili pagbayad sa ikapulo hangtod nga maimpas na ang among utang. Apan akong gipaningkamotan nga mahinumdoman ang gisaad nga mga panalangin kon unahon ang Ginoo, ug among naimpas ang pagbayad sa kinatibuk-an (tan-awa sa Malaquias 3:10–11). Ako usab nakakaplag og paglaom niini nga mga pulong gikan sa Ginoo: “Mao kini ang akong katuyoan sa pagsangkap sa akong mga santos, kay ang tanang butang akoa” (Doktrina ug mga Pakigsaad 104:15).
Sa kataposan, ako padayon nga nagsalig sa saktong panahon sa Langitnong Amahan, nagbansay sa pagpailob, ug nagtuo nga Siya nag-atiman bahin sa akong kinabuhi.
Paningkamot Uban sa Tabang sa Langit Magdala og mga Milagro
Sa kadugayan ang akong igsoong lalaki nakatrabaho human sa paggradwar. Kami nagpadayong mahunahunaon sa paggasto, nagbutang og bisan pila nga ekstra sa among kwarta alang sa murag dili matapos nga utang.
Human sa upat ka tuig, among nabayran ang kataposan namong bayronon sa mga utang. Ako dili makatuo niini—nga sa ngadto-ngadto nakaya namo nga mabuhi, nahuman sa among pagtuon, ug nakabayad sa mga utang sulod sa gitakda nga panahon. Kalingkawasan kadto nga dili na mobati nianang pinansiyal nga palas-anon sa akong mga abaga. Nasayod ko nga ang Langitnong Amahan nagtabang kanamo.
Tinuod gayod kadto nga milagro.
Pinaagi niini nga kasinatian, ako nakat-on nga ang Ginoo mopadako sa atong mga paningkamot kon kita adunay hugot nga pagtuo ug motrabaho pag-ayo. Sama sa Iyang mga saad nato “Ako anaa sa inyong tuo nga kamot ug sa inyong wala, ug ang akong Espiritu anaa sa inyong mga kasingkasing, ug ang akong mga anghel anaa libot kaninyo, aron sa pagtabang kaninyo” (Doktrina ug mga Pakigsaad 84:88).
Kon ang mga sirkumstansiya murag imposible, ang Ginoo mohatag og paagi (tan-awa sa 1 Nephi 3:7).
Mapailobong Naghulat sa Ginoo
Isip mga young adult, usahay tingali kita naghulat sa Ginoo aron usbon ang mga sirkumstansiya. Seguro kita nag-atubang og mga pakigbisog sa atong pamilya, nangita og bag-ong trabaho o oportunidad, o nagkinahanglan lang nga masayod asa moadto sunod. Ako wala masayod kon ngano nga usahay kita kinahanglang maghulat og dugay sa mga panalangin, apan ako nasayod nga ang Langitnong Amahan nasayod sa atong mga sirkumstansiya ug sa atong mga tinguha.
Human sa akong kanunay, mapadayonon nga mga paningkamot ug sa mga milagro sa Ginoo, sa kataposan ako makaserbisyo og misyon. Sa panahon nga ako nakaamgo nga makab-ot na nako kini usa ka milagro. Wala gayod akoy nakitang paagi kaniadto aron mahitabo kini, apan ako nasayod nga ang akong mga pag-ampo gitubag.
Si Presidente Jeffrey R. Holland, Akting nga Presidente sa Korum sa Napulog Duha ka Apostoles, mitambag:
“Atubanga ang inyong personal nga mga hagit nga nasayod nga uban sa hugot nga pagtuo, magmalamposon ang mga butang sa kataposan. …
“… ako mopanalangin kaninyo, mangamuyo [alang] kaninyo, nga mapailobon nga molahutay samtang ang inyong Amahan sa Langit, sa Iyang kaalam, mangita sa labing maayo nga paagi nga makanunayon nga makahatag kaninyo sa unsay inyong gipangayo apan dili mapakyas sa paghatag kaninyo sa unsay inyong gikinahanglan.”
Ako naghunahuna gihapon kon unsa nay akong buhaton sa akong kinabuhi human niini. Usahay kon kita maghulat sa Ginoo, mahimong lisod ang pagkakita sa Iyang kamot diha sa atong mga kinabuhi. Apan ako nasayod nga uban sa walay pagkapakyas nga hugot nga pagtuo ngadto Kaniya, kamo masayod nga Siya anaa—nga Siya wala mawala sa panahon sa inyong panginahanglan. Hinoon, anaa Siya uban kaninyo, naggiya kaninyo sa hinay-hinay, padulong ngadto sa mahayag nga kaugmaon nga inyong gipaningkamotan.
Tuohi nga Siya mohimo og paagi nga makapadayon. Iya kanang gihimo kanako.