Kinsay Gustong Mopahimuot sa Ginoo Karon?

Matag Dominggo sa buntag sa higayon nga ang akong asawa ug ako makig-uban sa grupo nga Korean ang pinulongan nga sakop sa among ward, ang kahumot sa mga bulak motadlas sa chapel. Dapit sa tuo sa pulpito kanunay nga adunay matahom pagkahan-ay humot nga mga freesia nga gipatuyokan sa mabulukon nga nagbuskad nga globe amaranth nga gipalibotan og berdeng mga dahon.

Dihang mibalhin ko ngadto sa ward pipila ka tuig ang milabay, akong namatikdan si Sister Geum-oak-Choi nga nagdala og talagsaon ug matahom pagkahan-ay nga mga bulak. Wala madugay akong naamgohan nga magdala siya og hinan-ay nga mga bulak matag semana.

Dihang gipangutana nako siya ngano, miingon siya, “Tungod kay ang simbahan usa ka matahom nga dapit.” Nangadorno na siya sa pulpito sa chapel sulod sa 45 ka tuig.

Ang iyang sinemana nga serbisyo nagpahinumdom kanako sa unsay gisulti ni Presidente Gordon B. Hinckley (1910–2008) sa pagpahinungod nga pag-ampo sa Seoul Korea Temple niadtong 1985: “Atong ipahinungod kini nga mga nataran, uban sa tanan nga katahom niini, isip usa ka tukma nga han-ay alang niining balaan nga edipisyo.” Nagpakita og sanglitanan si Sister Choi niining yano nga pamahayag pinaagi sa pagtahod sa among meetinghouse ug pagpatahom niini.

Usa ka adlaw human sa pagsimba, ang among bishop nakakita ni Brother ug Sister Choi didto sa ilang panimalay nga nagbisbis sa mga tanom ug nanangtang sa mga sagbot gikan sa gitugkan sa mga bulak.

“Sister Choi, daghan sa imong mga bulak wala pa mamulak,” miingon si bishop. “Giunsa nimo sa pagdala og buklad na kaayong mga bulak matag Igpapahulay?”

Mitubag siya, “Matag Dominggo sa buntag, motan-aw ko sa harden ug mangutana ko sa mga bulak, ‘Kinsay gustong mopahimuot sa Ginoo karon?’ Dayon mobati ko nga ang mga bulak managsinggit nga, ‘Ako, gusto kong moadto! Turno na nako.’”

Dihang ang akong asawa ug ako mibisita ni Sister Choi, iya kaming gidala ngadto sa usa ka ganghaan padulong sa iyang likod nga tugkaran. Gatosan ka maayo kaayong pagkaugmad nga mga tanom—mga prutas, ug mga utanon—nagkatap tadlas sa hagip-ot nga luna.

Ang naandang buhaton ni Sister Choi nga pagpang-garden nagtabang kaniyang mahinumdom kang Jesukristo sa tibuok semana (tan-awa sa Doktrina ug mga Pakigsaad 20:77, 79). Diha sa matag hinan-ay nga iyang giandam, siya nagdala ngadto Kaniya og usa ka makahuloganong gasa nga nahimo gumikan sa sakripisyo ug pasidungog. Siya usa ka bulak sa siyudad sa Los Angeles, nagpakigbahin sa kahayag ug sa gugma ni Jesukristo pinaagi sa iyang dedikasyon.