“Ang Manluluwas Midala Kanako Pagbalik,” Liahona, Ago. 2025.
Mga Hulagway sa Hugot nga Pagtuo
Ang Manluluwas Midala Kanako Pagbalik
Kay nakalatas na agi sa makahashas nga kalayo, nasayod ko nga ang Manluluwas makausab kanato—bisan unsa na kalayo ang atong pagkahisalaag.
Mga litrato pinaagi ni Christina Smith
Abi nako og moadto ko alang sa mubo nga biyahe sa kataposan sa semana sa pagbisita sa akong pamilya atol sa kasal sa akong igsoong lalaki. Apan dihang ang akong asawa, si Etelani, mihatod kanako sa airport, mitunol kanako sa usa ka malita, ug giingnan ako nga adto na ko mopuyo kauban sa akong mga ginikanan hangtod nga andam na ko nga mahimong bana, nasayod kong nagkaseryoso ang mga butang. Kinahanglan nga mohimo ko og dakong mga kausaban sa akong kinabuhi.
Dihang nagtan-aw ko niyang nagkalayo, gamay ra kog nahibaloan unsa kadako ang gibati niyang kasakit. Giingnan dayon ko niya nga miadto siya sa usa ka luwas nga dapit aron moparking daplin sa dalan, diin didto siya mibakho. Wala ko makaamgo unsa kangil-ad sa akong kinaiya—pag-inom, ug pag-drugas—nga nakapasakit kaniya, ug wala ko makaamgo unsa kadako ang gihatag niining kasakit ngari kanako.
Parehas kaming nagdako sa Samoa, diin didto kami nagkita. Ang akong pamilya nagpasakop sa Ang Simbahan ni Jesukristo sa mga Santos sa Ulahing mga Adlaw sa nag-high school ko. Apan ang mga sugo nahimong babag sa akong gusto sa kinabuhi ug sa mga party nga ganahan nakong tambongan. Sa panahon dihang ang ubang sakop sa akong pamilya naselyo sa templo, dili ko aktibo sa Simbahan ug mihimo og bisan unsang pasangil aron malayo gikan sa mga kalihokan sa Simbahan.
Human si Etelani ug ako nagminyo, namalhin mi ngadto sa Seattle, Washington, diin didto nagpuyo ang akong pamilya. Dayon namalhin mi palayo kanila ngadto sa Utah. Didto, naningkamot sa labihan si Etelani sa pagtabang nga ako mag-usab sa akong mga kinaiya.
Sa kasagaran, dili ko mouli sulod sa usa o duha ka semana sa pakig-inom ug mag-party samtang naa ra siya sa balay, walay kasayoran kon asa ako. Nasakitan kaayo siya, nakamatikod nga dili siya makausab kanako. Mao kini ang ngitngit ug sakit nga mga adlaw alang kaniya. Nahimo siyang masulub-on, puno sa kabalaka ug kawalay kaseguroan. Naghunahuna siya kon ang dili mabangbang nakong mga lihok bunga sa pagkawalay katakos niya sa pagpanganak.
“Kon kami angay ba gayod nga padayong mag-uban,” nag-ampo siya sa Langitnong Amahan, “palihog tabangi ko unsay buhaton.”
Ang Espiritu miaghat kaniya sa paglihok dihang ang akong mga ginikanan nanawag sa pagpahibalo nga ang usa sa akong mga igsoong lalaki magminyo na. Sa adlaw dihang gihatod ko ni Etelani sa airport, miingon siya, “Tingali mao ni ang maayong panahon nga magbulag ta.” Sa kataposan, milabay una ang 10 ka bulan sa wala pa kami magkauli.
Paghigugmaay sa Pamilya ug Langitnong Tabang
Ang akong mga ginikanan ug mga igsoon mga aktibong miyembro sa Simbahan. Ang akong mama lig-on sa iyang pagpamatuod ug nasayod sa akong sitwasyon. Sulod sa 10 ka bulan nga nagpuyo ko sa akong mga ginikanan, mihatag siya nako og malumo nga mga pagdapit nga mokuyog sa pamilya ngadto sa simbahan ug sa mga kalihokan, ug iya kong gipahinumdoman sa kaimportante nga maselyo kang Etelani sa templo. Kadtong yano nga mga pagdapit, ug tungod sa gugma sa akong pamilya nga nagpalibot kanako, nakatabang nga mobalik ko sa simbahan.
Samtang didto si Etelani sa Utah, nga nag-overtime sa pagtrabaho aron makalimtan ang iyang mga kasubo, gipaubos ako sa usa ka pag-usab sa kaugalingon pinaagi sa gugma sa akong mama ug sa maulaon nga grasya sa Manluluwas.
Sulod sa daghang higayon akong gisulayan ang pagpalayo sa daotan nakong mga kinaiya, apan wala akoy nahimo. Sa nangagi, gigamit nako ang bisan unsang pasangil aron magpalayo sa simbahan, apan karon nga nagsagobang ako sa pagkawala sa akong asawa, nasayod kong kinahanglan ako nga mag-usab.
Ang pag-usab dili sayon. “Kinsa ba ako nga luwason?” Naghunahuna ko. Sa nangagi, naningkamot kong mag-usab nga ako ra. Sa pag-inusara, dili nako mabuntog ang akong mga kinaiya, apan uban sa tabang sa Langitnong Amahan ug sa Iyang Anak, kauban sa mga kasulatan, pagpuasa ug pag-ampo, sa sakramento, ug paghinulsol, nasayod ko nga pwede ra kong mausab. Ang pagkahimong aktibo sa Simbahan ug paggamit sa pagtuo kang Jesukristo miusab sa akong kasingkasing ug sa akong pamaagi sa paghunahuna (tan-awa sa Mosiah 5:7; Alma 5:12–13). Akong nakita nga mahimo na nako ang mga butang nga kaniadto dili.
Pinaagi sa pagpadayon, paglabay sa panahon akong gibati ang kalooy sa Manluluwas. Nahibalo siya mahitungod ni Etelani ug kanako. Akong gibati nga Siya nahigugma kanamo. Ang Iyang gugma miusab sa kon unsa may akong mga gitinguha. Wala na nako batia ang naandan nakong mga bisyo. Dihang sa kataposan duna na akoy pagpamatuod sa ebanghelyo, gusto na nakong ikauban og balik sa Etelani.
Dihang nakita niya nga duna na koy permanenteng trabaho ug nakatigom na og kwarta alang sa usa ka dapit nga kapuy-an, nakig-uli siya nako didto sa Seattle. Gusto gihapon siya nga magkauban kami. Human nga akong gipakita nga tinud-anay ang akong debosyon ngadto niya ug sa ebanghelyo, nagsagop mi og usa ka anak nga babaye. Ang pagkaadunay anak nakatabang nako sa pagpasalig nga mag-usab diin akong gihimo. Nasayod ko nga kinahanglan kong mahimo nga usa ka maayong amahan kaniya. Ganahan ko sa akong gipadulngan, ug gusto nga ikakuyog nako ang akong pamilya. Naselyo ko sa akong mga ginikanan. Si Etelani ug ako nagsagop og usa ka anak nga lalaki. Ug naselyo kami sa templo isip usa ka pamilya. Ang Dios buotan ngari kanamo.
Si Tony uban sa iyang anak, nga si Tony Jr.
Kay nakalatas na sa makahashas nga kalayo, nasayod ko sukad sa unang kasinatian nga ang Manluluwas makausab kanato. Apan una, kinahanglan nga makigsuod kita Kaniya. Mahingangha ka sa unsay Iyang mahimo. Ang pagbati sa Iyang balaanong gugma mosangpot sa sinserong paghinulsol, ug kana makausab kaninyo—bisan unsa na kalayo ang atong pagkahisalaag.
Mapasalamaton ko alang sa ikaduhang kahigayonan. Mapasalamaton ko sa ebanghelyo. Mapasalamaton ko nga ang Manluluwas midala kanako pagbalik. Ug mapasalamaton ko nga Siya mitabang nako nga mahimong mas maayo nga bana sa akong asawa ug amahan sa akong mga anak.
Kon duna kitay pagtuo sa Manluluwas ug pagsalig Kaniya, matingala kita sa mga kausaban nga Iyang mahimo ngari kanato.
Si Tony padayong nagmapasalamaton nga ang Ginoo mitabang niya nga mahimong mas maayo nga bana sa iyang asawa, kang Etelani, ug amahan sa iyang mga anak, si Tony Jr. ug Prelain.