Ang Makagiya nga Kamot sa Dios

Paghulagway pinaagi ni Brian Call

Dihang nagmabdos ang akong asawa sa among ikatulo nga anak, nadayagnos siya sa kondisyon nga naghimo kaniya nga maglisod sa paglakaw. Kini ug ang ubang mga komplikasyon naghimo kaniya nga anaa ra sa higdaanan sa kadaghanang panahon sa iyang pagmabdos.

Ang pagpanganak nahimong malisod, ug migahin siya og walo ka adlaw sa ospital. Bisan gani og nauli na siya sa balay, nagpadayon gihapon ang iyang kondisyon. Wala madugay nakadiskobre pa og daghang problema ang mga doktor. Ang among pamilya kinahanglan nga mag-adjust ug magkat-on sa among bag-o nga normal.

Ang resulta, migahin ko og daghang oras sa gabii sa among bag-ong natawo. Tibuok adlaw kong magtrabaho, ug hagit kaayo ang padayong magmata inig ka gabii. Aron malikay nga masagmuyo, nagsugod ko sa pagbasa sa mga kasaysayan sa akong mga pioneer nga mga katigulangan samtang magmata pa ko. Duna koy nakita nga pamilyar ngadto kanila, apan dihang akong gibasa ang mga sugilanon sa akong mga apohan sa tuhod ug niadtong nanag-una pa kanila, natingala ko unsa kadali nga makonekta ang ilang kinabuhi sa akoa.

Dihang mas nadiskobrehan pa nako ang mahitungod sa akong pamilya, akong nakita ang ilang pagtuo nga makadasig. Ang kalipay nga akong gibati hapit dihadiha dayon. Ang pagtukaw dili na mabati nga usa ka palas-anon. Gani, kinahanglan nakong pugson ang akong kaugalingon aron makatulog samtang kalma na ug tulog na ang among anak nga babaye.

Nakapalambo ako og lawom kaayong pasalamat niadtong mga nanag-una kanako. Ang akong kasingkasing sa tinuod nabaling ngadto sa akong mga amahan (tan-awa sa Doktrina ug mga Pakigsaad 110:14–15; Malaquias 4:6). Akong nakita ang makagiya nga kamot sa Dios sa ilang kinabuhi, ug akong mabatyagan ang ilang gugma alang Kaniya.

Ang akong panglantaw sa kinabuhi nag-anam sa paglambo samtang nakita nako ang mas dako nga hulagway kay sa kaniadto. Samtang nagbasa ko sa lisod nga mga kahimtang nga giantos sa akong mga katigulangan, ang ilang paglahutay naghupay kanako sa kaugalingon nakong sitwasyon.

Daghang panahon sukad niana akong gibati ang impluwensiya niadtong mga nanag-una kanako sa personal nga mga paagi nga nagdasig kanako. Sa pagsinati og sama niana ka labihan nga epekto, nakakaplag ko og mga paagi sa pagpangita, pagtigom, ug pagpakigbahin og daghan pa nga mga kasaysayan sa akong pamilya aron ilang masinati ang sama nga mga panalangin.

Ang akong tinguha sa pag-adto sa templo nagkadugang. Mibati ko sa panginahanglan nga tahoron ang matinud-anong legasiya sa akong mga katigulangan. Gusto nakong hatagan sila sa oportunidad nga makahimo og mga pakigsaad uban sa atong Manluluwas. Dihang gidala nako ang mga ngalan niining mga patay nang mga katigulangan ngadto sa templo, ang akong relasyon sa pakigsaad ngadto sa Manluluwas nalig-on, ug akong gibati ang Iyang makahashas nga impluwensiya sa akong kinabuhi.