Ang Kamatuoran sa Atong Kinabuhi,” Liahona, Ago. 2025.
Ang Kamatuoran sa Atong Kinabuhi
Ang atong mahigugmaon nga Langitnong Amahan mipadayag og mga kamatuoran sa atong mga nangagi, karon, ug sa umaabot, lakip ang kon unsaon sa pagkadawat sa labing talagsaon sa tanang mga gasa.
Ibabaw sa hagdanan sa gamay, huot nga kwarto ibabaw sa Newel K. Whitney’s store sa Kirtland, Ohio, niadtong Enero 22, 1833, ang mga elder sa Simbahan nagkapundok kauban ni Propeta Joseph Smith. Pagka-Disyembre sa milabayng tuig, nakadawat si Joseph og usa ka pagpadayag nga nagsugo kaniya sa pag-establisar og usa ka eskwelahan nga ang pangunang tuyo mao ang pag-andam sa kaigsoonan alang sa mga misyon.
“Akong ihatag kaninyo ang usa ka sugo,” miingon ang Ginoo, “nga kinahanglan kamong motudlo sa usag usa sa doktrina sa gingharian.
“Pagtudlo kamo nga makugihon ug ang akong grasya magauban kaninyo, aron kamo mas hingpit nga matudloan sa teyoriya, sa baroganan, sa doktrina, sa balaod sa ebanghelyo, sa tanang butang mahitungod sa gingharian sa Dios, nga angay ninyong masabtan; …
“Aron makaandam kamo sa tanang butang kon ipadala ko kamo pag-usab sa pagpalambo sa balaan nga tawag diin ako mitawag kaninyo, ug sa misyon nga akong gisugo kaninyo” (Doktrina ug mga Pakigsaad 88:77–78, 80).
Kini nga “Eskwelahan sa mga Propeta,” sigon sa unsay tawag niini, naghatag og talagsaong pagbubu sa espirituhanong mga gasa ug espirituhanong mga kasinatian. Daghan sa nag-unang mga lider sa Simbahan gitudloan didto. Karon ang kalibotan labihan na ka lahi nga dapit, apan ang giya nga gihatag sa Ginoo kaniadto sa gihapon magamit kaayo. Kita, usab, kinahanglan nga magtinguha og kahibalo ug kamatuoran “sa mga butang kon unsa sila karon, ug unsa sila kaniadto, ug unsa sila sa umaabot” (Doktrina ug mga Pakigsaad 93:24).
Ang atong Pagsiksik sa Kamatuoran
Niining kapanahonan nga atong gipuy-an, aduna kita sa daghang kahibalo nga mahimo natong maangkon kaysa bisan unsang panahon kaniadto. Kaniadto, kon gusto nimong mahibaloan ang usa ka butang, kinahanglan kang moadto sa librarya ug pangitaon kini. Karon, ang internet ug ang madaladala nga mga device naghatag og sayon nga akses sa hapit walay kinutoban nga impormasyon nga hapit sa dihadiha makaplagan dayon.
Mahimuot ang Ginoo kon gamiton nato sa maalamong paagi ang mga kapanguhaan nga anaa para kanato, apan naghatag Siya niining walay paglubad nga tambag: “Pagkugi kamo sa pagpangita ug tudloi ang usag usa sa mga pulong sa kaalam; oo, pangitaa ninyo gikan sa labing maayo nga mga basahon ang mga pulong sa kaalam; tinguhaa ang pagkat-on, gani pinaagi sa pagtuon ug usab pinaagi sa pagtuo” (Doktrina ug mga Pakigsaad 88:118). Nag-awhag Siya kanatong tanan sa pagkat-on mahitungod sa kalibotan sa atong palibot (tan-awa sa Doktrina ug mga Pakigsaad 88:79; 93:53), apan sa atong pagsiksik sa kamatuoran, kinahanglan nga modangop kita sa Dios, kinsa “[nakasabot sa] tanang butang, ug ang tanang butang anaa sa iyang atubangan, … ug siya labaw sa tanang butang, … ug ang tanang butang gihimo pinaagi kaniya, ug gikan kaniya” (Doktrina ug mga Pakigsaad 88:41).
Sa tanang mga kamatuoran nga gihatag sa Dios kanato, usa sa labing mahinungdanon sa atong kinabuhi dinhi sa yuta mao nga Siya ang atong Langitnong Amahan. Kita ang Iyang espiritung mga anak nga lalaki ug mga babaye. Siya nakaila ug nahigugma kanato sa hingpit. Ug isip Iyang espiritung mga anak, aduna kitay balaanong kinaiyahan ug padulngan. Ang pagsabot ug paghangop niining mahangtoron nga kamatuoran naghatag kanato og kailhanan, bili, ug katuyoan nga nagpanalangin ug nagdirekta kanato sa atong kinabuhi sa wala pa kita dinhi sa yuta ug magpadayon karon ug sa kahangtoran.
Didto Kita kauban sa Amahan sa Sinugdanan
Samtang magtinguha kita sa kamatuoran sa mga butang nga “diha na sa sinugdanan,” atong madiskobrehan kini nga mga pulong gikan sa atong Manluluwas, si Jesukristo: “Ug karon, sa pagkatinuod sultihan ko kamo, ako diha na sa sinugdanan uban sa Amahan, ug ako mao ang Unang Natawo,” ug “kamo usab diha na sa sinugdanan uban sa Amahan” (Doktrina ug mga Pakigsaad 93:21, 23).
Sa wala pa ang atong kinabuhi dinhi sa yuta, mitambong kita og usa ka konseho didto sa langit diin gipresenta sa Langitnong Amahan ang Iyang talagsaong plano sa kalipay. Si Propeta Joseph Smith mitudlo nga ang pagdasig sa Dios alang sa Iyang plano mao ang paghatag kanato og “usa ka kahigayonan sa pag-uswag sama sa iyang kaugalingon [ug] … mahimaya uban sa iyang kaugalingon.” Ang Iyang buhat ug himaya mao “ang pagpahinabo sa pagka-imortal ug kinabuhi nga dayon sa tawo” (Moises 1:39).
Migamit kita sa atong kabubut-on sa pagpili ug mipili sa pagsunod sa plano sa Langitnong Amahan. Napanalanginan kita nga matawo niini nga kinabuhi, diin makapadayon kita sa pag-angkon og kabubut-on ug makasinati og mortalidad, makakat-on, ug mouswag ngadto sa kinabuhing dayon.
Atol sa atong mortal nga panaw, makasinati kita og mga hagit ug mga kapakyasan. Apan wala kinahanglana nga atubangon nato ang mga kalisod sa kinabuhi nga mag-inusara. Si Joseph Smith mitudlo nga ang Langitnong Amahan, “ang Halangdong Ginikanan sa uniberso[,] nagtan-aw sa kinatibuk-ang tawhanong pamilya uban sa inamahan nga pag-atiman ug amahanon nga pagtagad.”
Ang atong Langitnong Amahan, “ang maluluy-ong Amahan, ug Dios nga tinubdan sa tanang pagdasig,” mopanalangin kanato, modasig kanato, ug mohupay kanato “sa tanan natong kalisdanan, aron kita makadasig usab niadtong anaa sa tanang kalisdanan pinaagi sa samang pagdasig nga nadawat nato gikan sa Dios” (2 Mga Taga-Corinto 1:3–4). Isip usa ka mahinungdanong bahin sa Iyang plano, ang Langitnong Amahan nag-andam og paagi nga kita makabalik ngadto Kaniya.
Ang Dalan ngadto sa Atong Amahan
Ang kamatuoran sa “mga butang kon unsa gayod ang ilang tinuod nga kinaiyahan karon” (Jacob 4:13) kay tataw nga: dili nato makab-ot ang atong hingpit nga potensiyal isip mga anak sa atong Langitnong Amahan nga mag-inusara. Si Jesukristo, ang Unang natawo nga Anak sa Amahan sa espiritu, nakigsaad nga mahimo natong Manluluwas ug Manunubos.
Si Jesukristo, “ang Bugtong Anak sa Amahan, puno sa grasya ug kamtuoran, gani ang Espiritu sa kamatuoran, … mianhi ug mipuyo sa unod, ug mipuyo uban kanato” (Doktrina ug mga Pakigsaad 93:11). Mianhi Siya aron ipakita kanato ang dalan sa pagkaplag og kalipay, kahulogan, ug kamaya niining kinabuhia ug sa kahangtoran.
“Kay gihigugma gayud sa Dios ang kalibotan, nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kondili may kinabuhing dayon.
“Kay gipadala sa Dios ang iyang Anak nganhi sa kalibotan, dili aron ang kalibotan iyang pagahukman sa silot, kondili aron ang kalibotan maluwas pinaagi kaniya” (Juan 3:16–17).
Ang yutan-ong kasinatian sa Manluluwas mahinungdanon. “Wala niya madawat ang kahingpitan sa sinugdanan, apan nakaangkon og grasya ug alang sa grasya” (D&P 93:12). Mitubo siya hangtod “siya nakadawat sa usa ka kahingpitan sa himaya sa Amahan” ug “ang tanang gahom, sa langit ug sa yuta, ug ang himaya sa Amahan nag-uban kaniya, kay siya anaa kaniya” (Doktrina ug mga Pakigsaad 93:16–17). Ang Manluluwas mitudlo:
“Ihatag ko kaninyo kini nga mga panultihon aron makasabot ug masayod kamo kon unsaon sa pagsimba, ug masayod unsa ang inyong gisimba, aron makaadto kamo sa Amahan pinaagi sa akong ngalan, ug sa tukmang panahon makadawat sa iyang kahingpitan.
“Kay kon inyong tumanon ang akong mga sugo makadawat kamo sa iyang kahingpitan, ug mahimaya ngari kanako sama nga anaa ako sa Amahan; busa, sultihan ko kamo, makadawat kamo og grasya alang sa grasya” (Doctrina ug mga Pakigsaad 93:19–20).
Didto sa Tanaman sa Getsemani ug sa krus, si Jesukristo midala diha sa Iyang Kaugalingon sa pagpas-an sa mga sala sa kalibotan ug miantos sa tanang kagul-anan, ug “mga sakit ug mga kasakit, ug mga pagtintal sa matag matang” (Alma 7:11). Kini “mihimo [Kaniya], … nga labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit” (Doktrina ug mga Pakigsaad 19:18). Pinaagi lamang ni Jesukristo ug sa Iyang Pag-ula ug Pagkabanhaw ang kaluwasan ug kahimayaan mahimong posible.
Pinaagi sa grasya ug maulaong sakripisyo sa Manluluwas, kita molambo hangtod nga kita makadawat og kahingpitan ug sa moabot nga adlaw mahimong hingpit. Kon sundon nato ang panig-ingnan sa Manluluwas ug tumanon ang Iyang mga sugo, Siya motudlo ug mogiya kanato sa atong dalan balik ngadto sa mahimayaong presensiya sa atong Amahan sa Langit.
Si Kristo nga naa sa Dalan paingon sa Jerusalem, ni Michael Coleman, dili mahimong kopyahon
Dawaton ba Nimo ang Iyang Gasa?
Sa tanang mga kamatuoran “sa mga butang kon unsa gayod ang ilang tinuod nga kinaiyahan sa umaabot” (Jacob 4:13), nahibaloan nato nga ang atong kasinatian sa kahangtoran mag-agad sa atong pagpili sa pagsunod ni Jesukristo ug sa pagdawat sa mga gasa nga Iyang gitanyag. Ang mga kasulatan nagtudlo nga kita “makatagamtam nianang [atong] andam nga dawaton.” Subo lang, ang uban dili “andam nga motagamtam nianang unta ilang madawat” (Doktrina ug mga Pakigsaad 88:32).
Ang akong presidente sa misyon, si Elder Marion D. Hanks (1921–2011), kinsa nagserbisyo isip General Authority Seventy, mitudlo sa iyang mga misyonaryo nga ang pagpangayo sa unsay andam natong dawaton ug tagamtamon maoy usa ka paagi nga kita makahukom kon asa na kita sa atong espirituwal nga panaw. “Kay unsa ang makuha sa usa ka tawo kon ang gasa itugyan diha kaniya, ug siya wala modawat sa gasa?” Samtang atong dawaton ang mga gasa sa Manluluwas pinaagi sa matinud-anong pagtinguha ug pagsunod Kaniya, maglipay kita diha sa paglaom sa kinabuhing dayon ug “diha kaniya nga mao ang tighatag [niana] nga gasa” (Doktrina ug mga Pakigsaad 88:33). Kini nga gasa nga gihatag sa mapinanggaong paagi “mao ang labing mahinungdanon sa tanan nga mga gasa sa Dios” (Doktrina ug mga Pakigsaad 14:7).
Ang Dios mao ang atong Langitnong Amahan. Nakaila Siya ug nahigugma kanato. Kon kita moduol Kaniya sa atong pagsiksik sa kamatuoran, makaunong kita og maayo sa atong salabotan, makadawat kita og kaalam, mohangop sa kamatuoran, mohigugma sa hiyas, ug mounong sa kahayag nga naggikan Kaniya (tan-awa sa Doktrina ug mga Pakigsaad 88:40). Dayon magpadayon kita sa tibuok natong kinabuhi hangtod ang “adlaw moabot nga [kita] makasabot gani ang Dios, nga gibuhi diha kaniya ug pinaagi kaniya” (Doktrina ug mga Pakigsaad 88:49).
Mahimo unya kana nga usa sa labing mahimayaon ug malipayon nga adlaw.