Ang Manila Philippines Temple Nameligro

Litrato sa Manila Philippines Temple pinaagi ni Leo Camposano Imperial

Si Dignardino Espi, pangulong opisyal sa security sa Manila Philippines Temple, nabalaka dihang miabot siya sa pagtrabaho sa pagkagabii sa Disyembre 1, 1989. Sayo nianang adlawa, ang armadong mga tawo sa Manila, milunsad og usa ka rebolusyon, nga nagdala og kagubot sa siyudad. Ikapito na kadto nga pagsulay sa pagpalagpot sa gobyerno sa Pilipinas sulod sa upat ka tuig.

Bisan sa politikanhong kasamok, ang Simbahan padayong nagtagamtam og lig-on nga pundasyon sa Pilipinas. Kapin sa milabayng 30 ka tuig, ang mga miyembro niini mitubo gikan sa gamayng pundok sa Pilipinhong mga tumutuo ngadto sa kapin sa 200,000 ka Santos. Karon duna nay 38 ka stake sa nasod ug siyam ka misyon. Ug sukad sa pagpahinungod niini niadtong Septiyembre 1984, ang Manila Philippines Temple nahimong tinubdan sa talagsaong kalipay ug espirituwal nga gahom.

Didto sa guardhouse sa templo, nakit-an ni Dignardina ang iyang kauban, si Felipe Ramos ug Remigio Julian. Bisan og hapit na mahuman ang ilang shift, ang duha ka tawo nagpanuko sa pagpamauli. Atbang sa dalan gikan sa templo mao ang Camp Aguinaldo, mao ang dako nga base sa militar. Nasayod nga ang kampo mamahimong target sa armadong mga tawo, ang mga gwardiya nabalaka mahitungod sa pagbiya sa ilang mga pwesto basin ug mapiit sila sa away. Gipalabi nila ang magpabilin ug motabang sa pagpreserba sa kasagrado sa balay sa Ginoo ug sa mga nataran niini.

Mga ala-una sa kaadlawon, ang mga tropa sa gobyerno mipahimutang og mga ali dapit sa eskina duol sa templo. Pipila ka oras ang milabay, ug ka tangke ang midaro sa giali, nga miguba sa koral nga naglibot sa templo.

Dihang miulbo ang kabangis diha sa dalan, si Dignardino ug ang ubang mga opisyal nga security miagni sa duha ka custodian sa templo nga motabang nila aron magpabiling luwas ang bilding ug ang mga nataran niini. Nagpangita og katagoan gikan sa pagtira sa gobyerno, usa ka pundok sa katawhan sa wala madugay miguba aron maabli ang mga ganghaan sa templo. Si Dinagrido misulay sa pagpugos kanila nga mobiya, apan nagdumili sila.

Wala madugay niana nga hapon, nakigsulti si Dignardino sa presidente sa templo nga si Floyd Hogan ug sa presidente sa area nga si George I. Cannon sa telepono. Si Presidente Cannon mitambag kaniya ug sa iyang mga kawani sa pagpanalipod sulod sa templo. Pipila lang ka gutlo human niadto, putol na ang mga linya sa telepono.

Pagkasunod buntag mao ang Dominggo sa puasa, ug ang mga kawani nagsugod sa pagpuasa pinaagi sa paghangyo sa Dios nga panalipdan ang balay sa Ginoo nga dili mabugalbugalan ang kabalaan o ang pagkadaot niini.

Milabay ang adlaw nga sama ra gihapon sa unang adlaw. Ang mga helikopter nagbahisbahis sa ibabaw ug girakrakan ang mga nataran sa templo. Usa ka eroplano ang mitagak og pipila ka bomba sa duol niini, nga mibuak sa mga bintana sa Church distribution store ug miguba sa ubang mga bilding. Sa usa ka dapit usa ka fighter jet ang mitira og mga rocket ibabaw sa templo nga misunog sa kasikbit nga luna.

Sayo sa pagkahapon, si Dignardino nakakita og 10 ka armadong mga tawo duol sa entrada sa templo. “Ang inyong makita sa sulod sa bilding sa templo puro lang gayod pangrelihiyoso ug sagrado nga matang,” siya miingon kanila. Ginerbiyos siya, apan padayon siya sa pagsulti. “Kon moinsister mong mosulod sa kabalaan sa bilding, ang sagrado nga matang niini mawala, miingon siya. “Hikawan ba ninyo kami niiining mga panalangin?” Hilom ra ang maong mga lalaki, ug dihang nanglakaw sila palayo, nasayod si Dignardino nga ang iyang mga pulong mitandog kanila.

Nianang gabhiona, gipundok ni Dignardino ang iyang mga kawani, ug mipasilong na usab sila sulod sa templo. Mihalad siya og mainiton nga pag-ampo, nagbutang sa iyang pagsalig sa Ginoo nga ipreserba ang Iyang balaan nga balay.

Sa tibuok gabii, naghulat sila sa mga bomba nga matagak, apan ang mga oras mihagtik sa kahilom. Dihang nabuak ang kaadlawon nianang Lunes sa buntag, mainampingon silang nanggawas gikan sa templo aron susihon ang sitwasyon. Wala na ang armadong mga tawo. Walay nagpabilin gawas sa gipangbiyaan nga mga hinagiban, mga armas, ug mga uniporme sa militar.

Giinspeksyon ni Dignardino ug sa ubang mga tawo ang mga nataran ug nakakita og pipila ka nangaguba sa pipila ka mga bilding sa gawas. Apan ang templo mismo wala maunsa.