Itulau i le Lotoifale
Faaleleia le Tulaga Lelei o Aoga i Toga i Ni Potuaoga Fou se Lua
O le Aoga Tulagalua a Veitongo a le Malo, faatasi ai ma Le Ekalesia a Iesu Keriso o le Au Paia o Aso e Gata Ai, na faamanatuina talu ai nei le fausiaina o ni potuaoga fou se lua i Toga. E silia ma le selau tamaiti aoga o le a manuia mai nei potuaoga.
O timuga e lei taofia ai le fiafia o matua ma tamaiti aoga a o latou faapotopoto e faamanatu le faaopoopoga fou i le Aoga Tulagalua a Veitongo a le Malo i Toga talu ai nei.
Sa oo le aoga i le matua faatumulia o potuaoga ma sa manaomia ai se vaifofo mo se taimi umi. I le iloaina o nei luitau, na faafesootai ai e le Asosi o Matua ma Faiaoga Le Ekalesia a Iesu Keriso o le Au Paia o Aso e Gata Ai e saili se fesoasoani i le galuega faatino.
Fai mai Fineasi Fūnaki, pule o fesoasoaniga alofa a le Eria o le Pasefika, “E faatatau uma lava i tamaiti.”
Sa ia faaopoopo mai, “O i tatou uma o fanau a le Tama Faalelagi. O le Ekalesia ma lona vaega o fesoasoaniga alofa ua faamanuiaina i le avanoa ua mafai ona faaopoopo sina mea ina ia mafai ai ona fesoasoani e siitia le tulaga lelei o aoaoga ma le mea e sili ona taua, o le aoaoina o a tatou fanau aua o i latou o le lumanai o le atunuu.”
O sui mai le Matagaluega o Aoga ma le nuu o Veitongo sa faailoa lo latou agaga faafetai i le Ekalesia ma ona tagata mo lenei saofaga lea o le a faamanuiaina ai e le gata i tamaiti, ae o le nuu atoa.
Na faasoa mai e Falemaama Fualalo, le puleaoga o le aoga, le auala sa latou “saili ai mo ni auala e fesoasoani ai e faatupe nei potuaoga fou e lua. Na iu lava ina faafofogaina a matou tatalo ina ua filifili Le Ekalesia a Iesu Keriso o le Au Paia o Aso e Gata Ai e fesoasoani ia i matou i le faatupeina o se faleaoga e i ai ni potuaoga se lua.”
Sa ia faaopoopo mai o potuaoga o le a “faaaogaina foi o se nofoaga autu pe a aveesea tagata mai le nuu i taimi o se faalavelave faalenatura.”