Pe Matou te Toe Vaai i le Afafine a le ma Tama?

Ata na tusia e David Malan/Malan Creative

I le 1999 na maliu ai lo ma atalii matua. Sa ia tuua se avā ma se afafine e tasi le tausaga le matua lea sa i ai se matou mafutaga malie ma ni fegalegaleaiga matagofie faalevaiaso.

Ona o tulaga matautia, o le aso fanau e atoa ai le tolu tausaga o le afafine o le ma tama sa avea ma taimi mulimuli na matou fesootai ai ma ia. Mo le tele o tausaga, sa ma tatalo, anapogi, ma faamoemoe o le a mafai ona ma toe vaai ia te ia.

I le taimi o le konafesi aoao ia Oketopa 2018, na faia ai e Peresitene Russell M. Nelson se valaaulia faatasi ai ma se folafolaga: “Ou te uunaia outou ia saili se auala e faia ai se taimi faatulagaina e le aunoa ma le Alii—ia i ai i Lona maota paia—ona tausia lea o lena taimi faatulagaina ma le sa’o ma le olioli. Ou te folafola atu ia te outou o le a aumai e le Alii ni vavega ua Ia silafia tou te manaomiaina a o outou faia ni osigataulaga e auauna atu ma tapuai atu i totonu o Ona malumalu.”

Ina ua ou faalogo i nei upu, sa ou lagonaina sa fetalai mai le Tama Faalelagi ia te au e ala mai i Lana perofeta. O lea, sa ma tautino atu ai ma lo’u toalua e amata ona auai i le malumalu i Aso Lua uma ma tausia lena tautinoga “ma le sa’o ma le olioli.”

I se tasi aso i le 2019, na faafuasei lava ona aumai se feau tusitusia mai le tama teine a le ma tama e 21 tausaga le matua ia te au i luga o le initoneti. Sa faasolosolo malie ona oo mai ana fesootaiga i le taimi muamua, ae a o faaauau pea ana savali, sa amata ona ia faia ni fesili na tatalaina ai se laina ofoofogia o talanoaga. Sa ia faatagaina i matou i lona olaga i le taimi muamua ona sosoo ai lea ma le tele o taimi.

I le 2021 sa ma valaaulia ai o ia e faaalu le Aso Faafetai ma lo matou aiga. Sa ia taliaina, ma sa ma maua se taimi matagofie e faamasani ai ia te ia. Sa faigofie ona ia fesootai i tuafafine o lona tama, o uso o lona tama, o ona tei teine, ma tei tama. Sa manao o ia ia avea lana asiasiga i le Aso Faafetai ma se tu masani.

I le tausaga mulimuli ane, na toe fesootai mai ai se atalii ua vavaeeseina ma i matou. Ia Mati 2024, mo le taimi muamua i le olaga o lo matou aiga, sa faia ai se matou faatasiga faaleaiga lea na aofia ai tamaiti uma o loo soifua, o latou taitoalua, ma fanau a fanau uma e toa 16.

Sa ou talitonu lava e saunoa mai le perofeta mo le Alii. Ou te talitonu o lenei vavega sa matuai manaomia lava na oo mai ona o le taitaiga ma le folafolaga na faaalia mai e Peresitene Nelson.

O la’u molimau ma le alofa mo lo’u Tama Faalelagi ma Lona Alo e le’i faalagolago i lenei vavega, ma e leai foi. Peitai, ou te maofa i le patino o lo Laua alofa mo au ma le mamana o a Laua folafolaga e oo mai e ala mai i le perofeta.