Ou te Lagona le Filemu i Lo’u Loto

Saunia e Junya Mizoguchi, Kyoto, Iapani

I le avea ai ma se tagata aoga faatausimai, sa ou lagona e pei e leai so’u taimi mo lo’u valaauga i le Ekalesia ma a’u suesuega. Ae sa ou aoaoina i lo’u talavou o le auauna atu ma le usiusitai i poloaiga a le Atua e taitai atu ai i se olaga fiafia.

I lo’u talavou, sa ou mafaufau ai e vavaeese au lava mai Le Ekalesia a Iesu Keriso o le Au Paia o Aso e Gata Ai. Ae i le taimi lava e tasi, sa ou iloa ai ou te lei mulimuli i aoaoga uma a le Ekalesia. Sa ou filifili afai o le a ou vavaeese au lava mai le Ekalesia, sa ou manao ia ou maua se lagona lelei e uiga i ai.

O lea, sa ou filifili ai o le a ou taumafai e usitai i mea uma o loo aoao mai e le talalelei. Ma, afai ou te lagonaina i totonu ia te au e leai se uiga o aoaoga, e mafai ona ou alu ese e aunoa ma se faanoanoaga.

Faatasi ai ma lo’u “manatu, mafaufau ma le malosi” (Mataupu Faavae ma Feagaiga 4:2), sa ou taumafai ai e usitai i mea o loo aoao mai e le Alii ma vaavaai mo le mea o le a taunuu ai. E ala mai i lena aafiaga, na tuuina mai ai ia te au se taimi o le fiafia i se tulaga na toetoe lava a ou le oo muamua i ai. O le tumau ai i le Ekalesia, sa ou lagonaina ai e mafai ona ou ola i se olaga fiafia, ma le iloaina o le fiafia moni.

Ina ua mavae lena aafiaga, sa ou filifili e alu i se misiona ma faasoa atu le filemu sa ou lagonaina i lo’u loto. E tusa lava po o a tofotofoga o le a ou feagai ai, sa ou aoaoina afai ou te tatalo i le Atua, o le a Ia lagolagoina au, tuuina mai ia te au le faamoemoe, ma fesoasoani ia te au ia ou malamalama i le mafuaaga o o’u faafitauli.

O Le A Le Mea E Tatau Ona Ou Faia?

Ina ua mae’a la’u misiona, a o ou aoga e avea ma se tausimai, sa tele se taimi na ou faaaluina i aso taitasi e aoao ai i le galuega. Mulimuli ane, ou te faia meaaoga seia oo i le 2:00 po o le 3:00 i le vaveao. Ona ou faia lea o se tama’i moe ae ou te lei faia nisi aoaoga i le galuega i le aso e sosoo ai.

I lena taimi, sa ou auauna atu o se peresitene o Alii Talavou a le uarota. Sa matuai faigata lava mo a’u le suesue ma faataunuu lo’u valaauga i le Ekalesia. Peitai, sa ou iloaina afai ou te tuua lo’u valaauga, o le a le mafai ona ou aoaoina alii talavou e uiga i le taua o le mulimuli i le ala o le Atua po o le mauaina o faamanuiaga ua Ia teuina mo a’u.

“O le a se mea e tatau ona ou faia?” Sa ou ole atu i lo’u Tamā Faalelagi. “Ua faaleagaina lo’u tino ma lo’u mafaufau, ma ou te manatu ou te le o faia le ituaiga galuega e te finagalo ou te faia.”

Ina ua uma la’u tatalo, sa faamafanafanaina a’u. Sa ou lagona sa fetalai mai le Atua ia te au, “O le taimi lenei o loo e faaaluina e galue malosi ai e taua mo oe. Atonu e faigata lau faatulagaga pisi, ae afai e te faatoilaloina nei lenei tofotofoga, o le a ou faaaogaina oe e faamanuia ai ma fesoasoani i le toatele o isi i le lumanai.”

O lenei tali na tuuina mai ai ia te au le faamautinoaga e i ai so’u faamoemoega, afai ou te tumau, o le a mafai ona ou faia se galuega faapitoa i le lumanai.

Sa ou tautino atu i alii talavou le faigata o le aoga mo au. Ae sa ou ta’u atu foi ia i latou e taua le Ekalesia ma le talalelei ma e tatau ona avea ma totonugalemu o o tatou olaga e oo lava i le lotolotoi o faigata. Sa ou faailoa atu lo’u alofa mo i latou ma fai atu ia i latou sa ou taumafai malosi e faataunuu lo’u valaauga aua sa tutusa lava lo latou taua ia te au e pei o a’u suesuega. Sa maligi o latou loimata a o pā’i atu le moni o nei mea i o latou loto.

Faamanuiaina mo le Auauna Atu

A o faaauau pea ona ou auauna atu i alii talavou ma aoao i latou i le talalelei, sa ou mafaufau tele i o latou lagona faigata faatalavou a o latou auai i le lotu ma aoao le talalelei. Sa ou taulai atu i lo latou soifua maloloina faalemafaufau ma fesoasoani ia i latou i o latou manaoga taitoatasi.

O le auauna atu i alii talavou na fesoasoani ia te au e atiina ae ai se tomai e matau ma ia iloaina ni suiga laiti i tagata. O lo’u galue ai nei o se tausimai ma tausia le tele o gasegase, ua ou faaaogaina lena tomai pe a fegalegaleai ma isi.

“Sa fai mai lena gasegase e te malamalama moni lava i ona lagona,” o le tala lea a le au faigaluega ia te au. Pe atonu foi e fai mai se gasegase, “O le faigofie ia ona talanoa atu ia te oe.”

ua potopoto faatamilo le aiga i se laulau

O le auauna atu i valaauga o le Ekalesia ua faamanuiaina ai foi au i le aiga. Ua ou aoao e faamuamua lo’u toalua a o ou aoao ia faaitiitia le manatu faapito.

“Afai o au o le Tama Faalelagi,” ou te fesili ifo ai ia te au lava, “e faapefea ona Ia alu atu e faamalosia lenei aiga, ma o le a se mea e tatau ona ou faia e ausia ai lena mea?”

Ona sa ou suesueina le talalelei ma lo’u loto atoa, ua ou iloa ai le auala ma le mafuaaga e aoao ai la’u fanau e taua le Ekalesia. Ua ma iloa ma lo’u toalua le auala e tausia ai lo ma aiga faaleagaga aua e faavae a ma aoaoga i aoaoga a le Faaola.

Ou te lagona le faamoemoe ma le filemu i lo’u loto e ala i le mulimuli i aoaoga a le Alii ma faalogo i Ana uunaiga. Sa i ai o Ia i o’u tafatafa i le ala atoa, ma faamanuiaina au e ala i lo’u usiusitai ma valaauga e faamanuia ma fesoasoani i isi. E tusa lava po o a tofotofoga, ou te manao e ola lo’u olaga i se auala e mafai ai ona ou faia le mea e finagalo i ai Iesu Keriso (tagai i le 2 Nifae 32:3).