Faatoafilemuina e le Alii e Moe

Ata na tusia e David Malan/Malan Creative

Ina ua 10 masina le matua, o le ma tama muamua, o Caden, sa ma tuua ai ma lo’u toalua o Tavita o ia i le tausiga a o’u matua mo le uluai taimi. Sa ma o e fai ‘aiga i le afiafi ona ma o lea i se fale tifaga. O le taimi lava na maua ai a matou popukoni ma nonofo ai i lalo, na valaau mai ai lo’u tina.

Sa le’i manava le ma pepe, ma o loo agai atu se taavale a le falemai!

Sa ma tietie atu i le fale ma le popolevale ma taufetuli atu i totonu e vaai Caden i lima o lo’u tina, o ataata atu i fomai. Sa manuia o ia, ae sa maua i se ma’i lili.

Sa le mafai e fomai ona filimaoti le mafuaaga o le lili po o le faalua ona oso le lili, ae sa latou tuuina atu ni vai faafoma’i e fesoasoani ai. I le avea ai ma se tina mo le taimi muamua, sa ou matuai popole lava. Sa foliga mai sa manuia Caden, ae o le aafiaga na luluina ai lo’u faatuatua. Sa oo ina ou matuā atuatuvale ma popole.

I le lua tausaga mulimuli ane, na fautuaina ai e se foma’i o le mafaufau le faia o se suesuega o le electroencephalogram (EEG) ia Caden, o se suesuega e fuaina ai le gaoioi o lona faiai a o moe. Afai e lelei le iuga, e mafai ona taofia le inuina o vai mo le ma’i lili.

Sa ou popole i le sailiiliga aua sa le toe fai ni tamai moe a Caden i le tausaga na muamua atu. E faapefea ona tatou faamoea o ia i le ofisa o se fomai pisi ma ni masini eletise i lona ulu atoa?

O le po a o lumanai le sailiiliga, na tuuina atu ai e Tavita ia Caden se faamanuiaga faaleperisitua. A o amata le faamanuiaga, sa ou lagonaina le malosi o le Agaga. Sa ou iloa o le a lelei mea uma. O le taimi muamua lea talu mai lona ma’i lili muamua na ou lagonaina ai le filemu.

O le aso na sosoo ai na faapipii ai e fomai ni masini eletise i le ulu o Caden. Ona matou faataatia lea o ia i luga o le laulau e fai ai suesuega ma tapē moli.

I ni nai minute sa moe o ia. Atonu e le foliga mai o se vavega lenei mea, ae e silia ma le tausaga talu ona le’i toe faia ni ana tamai moe.

E lei galo i matou e le Tama Faalelagi. Sa i ai Lona Agaga iina i le ofisa o lena fomai, ma faatoafilemuina Caden ma faamafanafanaina au. Na suia o’u uiga faaalia i tofotofoga ma faamanuiaga o le perisitua i lena aso. Ou te molimau atu o le mana o le perisitua e moni.

Ua avea nei Caden ma se talavou matua. E lei toe oso lava sona ma’i lili talu mai lona pepe. Sa feagai o ia ma isi luitau ae ua ia faatoilaloina le tele o na luitau. Ou te iloa o loo faaauau pea ona vaavaai o ia e le Alii ma faatoafilemuina lo’u fefe (tagai i le Luka 8:50).