Taliina o le Fesili Tele: O Le A Se Tou Manatu ia Keriso?

O le faaaliga vaaia o loo faamatalaina i le Mataupu Faavae ma Feagaiga 76 ua faamamafaina ai upumoni autu e uiga ia Iesu Keriso:

• “O le Alii o le Atua, e leai foi se Faaola e ese mai ia te ia” (fuaiupu 1).

• E “alofa mutimutivale ma agalelei o Ia ia te i latou o e matata’u ia te ia, ma e fiafia e faamamaluina i latou o e auauna atu ia te ia i le amiotonu” (fuaiupu 5).

• “Na afio mai o Ia i le lalolagi … ia tauave agasala a le lalolagi, ma faapaia le lalolagi, ma faamamaina mai le amioletonu uma; ina ia mafai ona faaolaina i latou uma o e na tuuina e le Tama i lona mana ma faia e ia” (fuaiupu 41–42).

• Ma na iu lava ina “faia e Iesu Keriso lenei togiola atoatoa e ala i le faamaligiina o lona lava toto” (fuaiupu 69).

Ua molimau atu ma le lototoa Iosefa ma Sini i le moni ma le taua o Iesu Keriso:

“O loo soifua o Ia!

“Aua na mā vaaia o ia, i le itu taumatau lava o le Atua; na mā faalogoina foi le siufofoga o molimau mai o ia lava lea o lē Toatasi na Fanaua e le Tama.

“E faapea e mai ia te ia, ma ala mai ia te ia, ma o ia, ua i ai lalolagi ma na foafoaina, ma o e ua nonofo ai o atalii ma afafine fanauina mo le Atua” (fuaiupu 22–24).

O le a laveaiina e Iesu Keriso “tagata uma vagana ai [atalii o le malaia]” (Mataupu Faavae ma Feagaiga 76:44). Ua latou taliina atoatoa le fesili “O le a se mea tou te manatu i ai ia Keriso?” e ala i le teenaina o le Agaga Paia ma faafitia ma luiina Iesu Keriso ma Lona mana ina ua uma ona faaali mai o Ia ia i latou (tagai i le fuaiupu 43). O le faia o lena mea, ua latou “faasatauroina ai o ia mo i latou lava, ma faamaasiasia ai o ia” (fuaiupu 35).

E faapefea ona tali e i latou o i le malo telesitila le fesili “O le a sou manatu ia Keriso?” Ua latou filifili e teena le talalelei ma “le molimau ia Iesu” (Mataupu Faavae ma Feagaiga 76:82, 101), ma ua latou teena Ana poloaiga, ua avea ma “tagata pepelo, ma faataulaitu, ma mulilua, ma faitaaga” (fuaiupu 103).

E ui i lea, latou te maua se toetu ma se tikeri o le mamalu e “sili atu i manatu uma” (fuaiupu 89). Latou te ola ia le itiiti ifo ma le tasi se tulafono o le malo telesitila (tagai Mataupu Faavae ma Feagaiga 88:36) e manaomia ai tagata uma ina ia “tootuli, ma o le a ta’uta’u atu e laulaufaiva uma ia te ia o lē ua nofo i luga o le nofoalii e faavavau faavavau lava” (Mataupu Faavae ma Feagaiga 76:110).

E faapefea ona tali atu i latou o i le malo terasitila i le fesili “O le a sou manatu ia Keriso?” E ui o loo i ai sa latou “molimau ia Iesu,” ae latou te “le lototoa” i ai; “o le mea lea, latou te le maua ai le pale i luga o le malo o lo tatou Atua” (fuaiupu 79). Ua faamanuiaina i latou e “mauaina luma o le Alo, ae lē o le atoatoa o le Tamā” (fuaiupu 77).

O Iesu Keriso ma Lana talalelei tumau-faavavau e luitauina i tatou e le gata ina ia iloa ae ia faia foi ma aveaai. Ina ia maua le atoatoaga o le Tama ma le Alo, e tatau i se tasi ona maua sauniga o le malumalu ma ia faamaoni i na feagaiga. Na aoao mai e le Perofeta o Iosefa Samita: “Afai e maua e se alii se atoaga o le perisitua a le Atua, e tatau ona ia maua mai le ala lava e tasi na maua ai e Iesu Keriso, ma na ala i le tausiga o poloaiga uma ma le usiusitai i sauniga uma o le maota o le Alii.” E le naunau tagata terasitila e maua le atoatoaga o le Tama.

E faapefea ona tali atu i latou o i le malo selesitila i le fesili “O le a sou manatu ia Keriso?” Latou te maua “le molimau ia Iesu”; latou te talitonu “i lona suafa;” ua “papatisoina i latou e tusa ma le ala na tanumia ai o ia, ua tanumia i le vai i lona suafa” (fuaiupu 51). Ina ia mafai, e ala i le tausia o “poloaiga, ona fufuluina ma faamamaina i latou mai ia latou agasala uma, ma maua le Agaga Paia e ala i le faaee o lima o ia o lē ua faauuina ma faamauina i lenei mana” (fuaiupu 52). Latou te “manumalo i le faatuatua [i le Alii o Iesu Keriso], ma faamauina i le Agaga Paia o le folafolaga” (fuaiupu 53). “E faaatoatoaina [i tatou] e ala ia Iesu le puluvaga o le feagaiga fou, o lē na faia lenei togiola ua atoatoa e ala i le faamaligiina o lona lava toto” (fuaiupu 69).

E silafia e Iesu Keriso Lana vaega i le fuafuaga o le fiafia a le Tama Faalelagi: “O a’u nei le ala, ma le upu moni, ma le ola: e le alu atu lava se tasi i le tama, pe a le ui mai ia te a’u” (Ioane 14:6). E leai se tasi e mauaina le mamalu selesitila po o le atoatoaga o le Tama e aunoa ma le taliaina o mea uma e ofoina mai e le Faaola e ala i Lana Togiola (tagai Mataupu Faavae ma Feagaiga 84:37–38): Lona alofa, mana, alofa mutimutivale, agalelei, auauna, faamasinotonu, poloaiga, sauniga, ma feagaiga.

Ua faamamafa mai e Peresitene Russell M. Nelson le vaega a le Ekalesia a Iesu Keriso i le fesoasoani i fanau a le Atua e maua le ola e faavavau: “O le faamoemoega lava o le Ekalesia ua leva ona i ai o le fesoasoani lea i tagata uma ia faateleina lo latou faatuatua i lo tatou Alii o Iesu Keriso ma i Lana Togiola, ia fesoasoani ia i latou i le osia ma le tausia o a latou feagaiga ma le Atua, ma ia faamalosia ai ma faamauina o latou aiga.”

Ua fautuaina i tatou e Peresitene Russell M. Nelson ia faia le malo selesitila ma a tatou sini e faavavau ona “iloilo lea ma le faaeteete a [tatou] faai’uga taitasi a o [tatou] i ai iinei i le lalolagi, po o fea o le a latou tuu ai [tatou] i le lalolagi a sau.” O le tali atu i lenei valaaulia, o le a tatou saunia ai e tali le fesili tele “O le a sou manatu ia Keriso?”

O le vaaiga mamao i tikeri o le mamalu ua faamautinoa mai ai ia i tatou e le gata o le faitalia e moni ae faapea foi filifiliga e taua moni lava. E faamanatu mai ai foi ia i tatou, ona o Iesu Keriso, ua “togiolaina ai i tatou mai le pau” ma “ua saoloto ai e faavavau … ia filifili le saolotoga ma le ola e faavavau, e ala mai i le Puluvaga sili o tagata uma, pe filifili le faatagataotauaina ma le oti” (2 Nifae 2:26–27). O le a le mea o le a tatou filifilia? O lo tatou lumanai i lenei olaga ma lo tatou taunuuga e faavavau e susulu e pei o lo tatou faatuatua ia Iesu Keriso.