Tausiga: O Se Taulamua Faavaomalo e Faaleleia le Soifua Manuia o Tamaitai ma Tamaiti

Vaega o se Mafuaaga Taua

Ina ua ou (Peresitene Johnson) malaga atu i Costa Rica i le tausaga ua te’a, sa ou maua le avanoa e fesoasoani ai i se gaoioiga o foai o meaai. Sa ootia au i le feiloai atu i le toatele o tamaitai ma tamaiti o e na o mai e maua se taumafataga maloloina. Sa ou maua se uunaiga manino sa matou faia le mea tonu lava lea e finagalo le Faaola matou te faia. Sa ou feiloai ia Yumana ma lana fanau aulelei e toatolu. Sa faatau atu e lenei tamaitai faamaoni ni rosa lipine sa ia faia ina ia mafai ai ona tausia lona aiga. Sa matuai faafetai lava o ia mo se taumafataga mo lana fanau fiaaai. Sa ou fai atu ia te ia ou te alofa ia te ia ma, o le mea e sili ona taua, e alofa le Atua ia te ia. Na maua e Yumana le toomaga faaletino ma le toomaga faaleagaga a o ia lagonaina ma faailoa atu le alofa o le Atua.

Ua tatou vaaia lenei taulamua faavaomalo o se vaega o le galuega o le faaolataga ma le faaeaga. A o maua e tagata le toomaga faaletino, tatou te talosia ma faamoemoe o le a latou lagonaina le alofa o le Alii mo i latou ma manao e ulufale atu pe faalolotoina se sootaga o le feagaiga ma Ia.

O taumafaiga e faaleleia atili le soifua maloloina ma le soifua manuia o tamaitai ma tamaiti e faataunuuina ai le tiutetauave paia o le tausia o i latou o loo manaomia le fesoasoani. Ae o lenei taulamua e faamanuiaina ai tagata i isi auala:

• E faateleina ai le malosi faaleatamai ma le faaletino o le tupulaga faia’e, e fesoasoani ia i latou e ausia ai foi o latou gafatia faaleagaga.

• E faatupuina ai le aapa atu i o tatou tuaoi ma uo, o le toatele foi o i latou e mananao e aoao pe faapefea ona fesoasoani i a latou lava fanau.

• O loo tuuina mai ai se faamoemoega e totonugalemu i le talalelei lea e siitia ai auaunaga anoa ma avanoa auauna atu mo tamaitai, aemaise lava tamaitai talavou matutua.

O le tupulaga o talavou matutua o loo i ai nei ua mananao e avea ma se vaega o se faamoemoega taua, o se faamoemoega e faia ai se aafiaga moni ma se eseesega i le lalolagi. Matou te faamoemoe o lenei taulamua faavaomalo o le a fesoasoani i o tatou uso ia iloa ai ua latou auai i se tasi o faamoemoega silisili i le lalolagi: o le faalapotopotoga paia a le Alii mo tamaitai i Lana Ekalesia toefuataiina, o le Aualofa.

Matou te talitonu o lenei taulamua faavaomalo o le a musuia ai o tatou tagata ma uo e auauna atu i o latou nuu. Matou te faamoemoe o le a latou vaai i ai:

• O loo faamuamua e le Ekalesia a Iesu Keriso o le Au Paia o Aso e Gata Ai ia mataupu e aafia ai tamaitai ma tamaiti ma tuuto atu punaoa e faaleleia ai lo latou soifua maloloina ma le soifua manuia.

• O le Ekalesia ma lana Aualofa o ni taitai faavaomalo i le taulimaina o mataupu tau fesoasoaniga alofa.

• O le Aualofa e taitaia ma e aofia ai tamaitai o loo faaleleia olaga o tagata taitoatasi, aiga, ma nuu.

Ua na o se amataga lenei o se mea tulaga ese o le a faamanuiaina ai olaga o le toatele o e o le a tuuina atu ma maua le toomaga a le Faaola i le asō, ma i tausaga a sau, a o faaauau pea ona alualu i luma lenei taulamua faavaomalo.

I Totonu o o Tatou Vaega o Faatosinaga

I se tulaga faavaomalo, ua fai ma sui le Ekalesia i le lalolagi atoa mo i tatou taitoatasi o ni tagata o le ekalesia i le aumaia faatasi o faalapotopotoga o e ua tomai faapitoa i le taulimaina o mataupu tetele i nofoaga mamao. Ae, atonu o le aapa atu sili ona lelei mo fesoasoaniga alofa e faia e latalata i le fale pe a e aapa atu i le isi itu o le pa po o le isi itu o le auala. O loo outou ola i a outou feagaiga ma auai i la tatou faamoemoega faavaomalo pe a outou galulue ma le agaalofa faaKeriso ma tausia ma le alofa i latou i o outou lava aiga, tuaoi, ma nuu.

Atonu e le mafai ona e toe faaleleia le taualuga o se tuaoi pe malaga atu i se isi atunuu e faamama fale o tagata ina ua mavae se afa matautia, ae e mafai ona e faitau atu i se tamaitiiti, faalogologo i se uo o loo tauivi, pe foai atu se taulaga anapogi? O taumafaiga uma lava e faataua ma taua i lenei galuega e tausia ai i latou e le tagolima. Faafetai atu mo le avea ai ma se auala e mafai ai e isi ona maua le toomaga o le Faaola e ala i le avea ma Ona lima agamalu, o Ona vae gaoioi, o Ona taliga faalogologo, o Ona laugutu e tautatala agalelei.

A o tuufaatasia e le Ekalesia ia faalapotopotoga e galulue faatasi mo le soifua maloloina ma le soifua manuia o tamaitai ma tamaiti i atunuu eseese, e aumai faatasi e uso o le Aualofa tagata e taulima luitau i o latou lava nuu. E iloa e tamaitai o le Aualofa manaoga, ao mai punaoa, ma fesoasoani e taulima luitau. Ma e tatou te faia faapea faatasi ai ma le fesoasoani a le Agaga, e aumaia ai le alofa ma le toomaga a Iesu Keriso i fanau uma a le Atua.

I le vaaia ai o manaoga o tagata malaga i Milani, Italia, na faatulaga ai e uso o le Aualofa se avanoa o auaunaga e tuuina atu ai ia i latou lavalava ma oloa e manaomia i le fale. O nisi uso na foai atu mea na faaaogaina teisi, ae o isi na faatulagaina ma faamamaina foai. Sa taua taulaga a uso taitasi. Sa fesoasoani uso o le Aualofa i tagata asiasi e lagona le alofa o Iesu Keriso a o latou o mai i le nofoaga autu mo foai. Fai mai Monia, o se uso o le Aualofa i le lotoifale, “O mea laiti e oo mai ai mea tetele. Ma e mafai ona tatou faamanuiaina tagata i totonu ma fafo atu o le Ekalesia. O le talalelei i le faagaoioiga.”

A o lauga atu i le Aualofa faatoa faatulagaina, sa saunoa atu ai le Perofeta o Iosefa Samita i tuafafine, “Ua tuuina nei outou i se tulaga e mafai ai ona outou galulue e tusa ai ma na tigaalofa ua tuuina e le Atua i o outou loto.”

A o i ai i Guadalajara, Mekisiko, sa aoao ai Sister Yee ma vaaia le tele o faataitaiga ofoofogia o uso o loo galulue e tusa ai ma na tigaalofa a o latou saili e faafetaiaia se manaoga i le lotoifale.

O se tasi o na uso o Sister Pulido, o le na vaaia se manaoga i se falemai i le lotoifale e fesoasoani i aiga ma tagata taitoatasi o e na o mai mai mea mamao ma sa manaomia ni meaai ma ni lavalava a o latou faatalitali mo se togafitiga. Sa ia faapotopotoina ni uso se 120 o le Aualofa, ni faifeautalai, ma isi i le nuu e saili foai o meaai, vai, palanikeke, ma lavalava. Pe tusa ma le 1,500 tagata na foai atu oloa, ma sa saunia e uso ma isi meaai o le aoauli ma meaai mo le toeitiiti 1,200 tagata. Sa tuuina atu oloa ia i latou o e sa faatalitali mo se togafitiga i le falemai.

Na fai mai lenei uso sa ia faia lenei mea ona sa ia alofa mo nei tagata. Faatasi ai ma ona loimata, sa ia faamatala mai ma le lotomaualalo o ia o se tasi o na tagata sa faatalitali i le falemai a o sau lona toalua ma alu atu mo se togafitiga o le kanesa. Sa ia fai mai o lona faamanuiaga ma lona manao silisili lava o le auauna atu lea e pei ona faia e le Faaola.

Aumaia o le Toomaga o le Faaola

Uso e, ua tuuina mai ia i tatou le galuega paia o le aumaia o le toomaga a le Faaola—faaletino ma le faaleagaga—i le lalolagi atoa. Ma e mafai ona tatou faia lena mea e ala i le tausia o i latou o i totonu o o tatou lava vaega o faatosinaga. E maeu lenei meaalofa ma le faamanuiaga. O le auai i le taulamua faavaomalo e faaleleia atili le soifua manuia o tamaitai ma tamaiti o se tasi lea o le tele o aafiaga e faalatalata atili atu ai i tatou i le Faaola. O le galue e pei ona Ia faia, tatou te lagonaina ai Lona alofa; ma o lo tatou manao mo, ma le tautino atu i ai, o se sootaga o le feagaiga ma Ia e tuputupu ae.

Faafetai mo le fesoasoani mai ia i matou e aumai le alofa ma le toomaga o Iesu Keriso i o matou uso ma tuagane i soo se mea.

I le taumafai e faataitai ia Iesu Keriso, o le tulaga manaomia aupito sili ona taua mo i tatou o Ona soo o le iloa lea o manaoga vave o tagata taitoatasi o loo siomia ai i tatou ma tali atu ma le onosai ma le alofa.

Na saunoa mai Peresitene Russell M. Nelson ia i tatou i le Faigalotu a le Aualofa i le Lalolagi Atoa 2024, “Ou te faamanuiaina outou ia iloa o a outou meaalofa paia o se afafine o le Atua e tuuina atu ia te outou le mana e le gata e suia ai olaga ae ia suia ai le lalolagi!”

O la tatou matafaioi uiga ese lea!

O se vaitau mamalu le avea ai ma tamaitai o le feagaiga ma tagata o se sosaiete e aumaia le toomaga o le Faaola—faaletino ma le faaleagaga—i o tatou uso ma tuagane i le lalolagi atoa. O le sini sili i le sauniaina o le toomaga ma le ola tutoatasi o le saunia lea o le ala mo o tatou uso ma tuagane e mananao ai ma maua le alofa ma le alofa mutimutivale o loo avanoa mo i latou o e osia ma tausia feagaiga ma le Atua.

Matou te faailoa atu la matou molimau o Iesu Keriso o le toomaga ma o le toomaga ua Ia ofoina mai e faavavau.