“Auauna Atu ia i Latou e Afaina i Mea Faamanogi,” Liahona, Iulai 2025.
Auauna Atu ia i Latou e Afaina i Mea Faamanogi
O nofoaga e manaomia ai le faautauta ma le agaalofa mai tagata uma e aafia ai.
Ata na tusia e Elia Sampo
O le valaaulia a lo tatou Faaola e mo i tatou ina “ia o mai uma ia te ia, ia tofo i latou i lona agalelei; ua le faafitia foi e ia se tasi e sau ia te ia” (2 Nifae 26:33). O se tasi o auala taua tatou te o mai ai i le Faaola o le auai lea i le lotu ma auai i gaoioiga faalelotu. I nisi taimi, o le auai i le lotu e mafai ona avea ma luitau mo mafuaaga eseese. E mafai ona matua faigata mo se tasi o loo ola ma se manaoga faapitoa, mea e afaina [pe ma’i] ai, po o isi tulaga faafoma’i.
I le avea ai ma soo o Iesu Keriso, matou te mananao ia lagona e tagata uma le taliaina ma le mafai ona auai i le lotu ma gaoioiga. Mo se faataitaiga, tatou te faaalia lo tatou manatu mamafa mo tagata e aafia i meaai e ala i le saunia o le faamanatuga i ni filifiliga e leai se porotini o le kulutene [gluten]. O lenei mea ua maua ai se auala mo nei tagata taitoatasi e aai ai ma feinu i le faamanatuga ma faafou ai feagaiga paia ma le Alii.
O nisi tagata o le ekalesia e faigata ona auai i le lotu po o isi faatasiga faalauaitele ona o le tulaga ma’aleale i manogi o vailaau e pei o fagusausau ma fagumanogi. O tagata e iai tulaga e pei o le sela, mama’i i manogi, po o le tulaga ma’aleale i le tele o vailaau ma o latou manogi ma e ono iai se tulaga e afaina ai. E pei lava o le tulaga ma’aleale i meaai, e lē mafai ona e iloa e iai se tulaga ma’aleale i lena tagata i le na o le vaai atu ia i latou. O le taunuuga, o lenei tulaga e masani ona le vaaia, ae e matuai afaina ai lava le gafatia o lena tagata e faia gaoioiga masani o le olaga.
’Auga
E eseese ‘auga ma e mafai ona aofia ai le faafaufau, niniva, ulu tiga, vaivai, popole, faafitauli i le manava, tiga o le fatafata ma le faa’i, ma isi mea.
E eseese faailoga mai le vaivai i le ogaoga. E ui atonu e tiga le ulu o se tasi tagata lea e mafai ona te’a i ni nai itula, ae atonu e i ai se tulaga afaina a se isi tagata e mafai ona tumau mo le tele o aso pe taunuu ai foi i le alu faatopetope i le falemai.
O tulaga ma’aleale i vailaau e mafai ona faaleagaina ai le olaga o se tagata ma mafua ai ona lagona le faaesea. Na faamatala mai e se tasi o tagata o le ekalesia na oo i ni faailoga ogaoga: “O gaoioiga i aso uma, e pei o faatauga, asiasi i uo, auai i sauniga a le Ekalesia, po o le aai i fafo e mafai ona avea ma luitau faigata. O lenei mea e taitai atu ai i lagona o le le fiafia, faaesea, ma le lofituina o le tuuatoatasi. E le gata i lea, e masani ona tatou lagonaina le le malamalama ma faamasinoina e i latou o loo siomia i tatou o e e le mafai ona ‘vaai’ i o tatou ma’i ma o e manatu ua tatou manatu faapito ma faavalevalea aua tatou te ‘le fiafia i le manogi.’”
O se tasi o tamā ma lona atalii o le malosi ia o le sela ma e mafua ona o le manogi o vailaau. Sa sauniuni le atalii e lauga i le sauniga faamanatuga a o lei alu atu i le misiona. I le vaiaso a o lumanai lana lauga, sa ta’u atu ai e le epikopo i tagata o le uarota e faapea, sa matuai faaletonu le manava o le alii talavou ina ua aafia i fagusausau ma talosagaina tagata o le ekalesia ia manatua lena mea pe a auai i le lotu i le vaiaso na sosoo ai. O lenei mea na taunuu ai i se Aso Sa sili ona lelei mo le tamā ma le atalii i le lotu.
Nofoaga e Nonofo ai
I se nofoaga o le Ekalesia, e mafai e se tagata e i ai ni tulaga ma’aleale o le afaina i vailaau ona filifili e nofo ese mai isi tagata. Mo isi, e ono manaomia ni faalavefau e sili atu ona malolosi, e pei o le faia o se masini manava faamama, aumaia o se masini faamama i le ea i le lotu, po o le matamata i sauniga faamanatuga i luga o le initoneti.
Po o le a lava le ogaoga o le tulaga ma’aleale o se tagata i manogi o vailaau, e taua le manatua o se popolega moni lenei. O nofoaga e manaomia ai le faautauta ma le agaalofa mai tagata uma e aafia ai. E faaaoga e tagata fagusausau ma isi manogi mo mafuaaga eseese, e pei o le manao po o le tumama o le tagata lava ia. O le a manaomia le fefaaaloaloai ma le malamalama e taulima ai manaoga o tagata uma o loo aofia ai.
Afai e i ai sou tulaga ma’aleale o le aafia i vailaau, faamolemole talanoa i se tasi o lau au epikopo. E ui atonu e le mafai ona faia ni fetuunaiga i tulaga uma, ae e aoga le faailoa atu i taitai o le uarota e uiga i ou manaoga. E mafai ona galulue faatasi le aufono a le uarota ma oe e taumafai i le mea sili latou te mafaia e taulima ai ou tulaga ma’aleale o le afaina i vailaau. O le auala sa’o o le a eseese e faalagolago lea i tulaga ma e tatau ona paleni ma se malamalamaaga e le o tulaga uma e mafai ona taulimaina ai manaoga o tagata uma.
O nisi o manatu mo taitai:
-
Fesoasoani i tagata ia malamalama o tulaga ma’aleale o le afaina i vailaau o se popolega moni lea mo i latou ua aafia.
-
Ia tuuina atu e le aunoa ni faasilasilaga ma ni faamanatu e uiga i le auala e mafai ai ona tatou agaalofa atu i isi o e o afaina i tulaga ma’aleale o vailaau ma isi tulaga faaesea o le soifua maloloina ma le auala e mafai ona tatou fesoasoani ai i tagata uma ia auai i le tapuai atu i le Alii.
-
Mafaufau e valaau se tagata tomai faapitoa mo manaoga faapitoa o le uarota po o le siteki e fesoasoani e taulima lenei mataupu ma isi faafitauli.
-
Mafaufau e faatulaga se vasega faaleaoaoga mo taitai ma tagata o le ekalesia e uiga i tulaga ma’aleale o vailaau ma isi tulaga e ono aafia ai le gafatia o se tagata e auai i sauniga a le Ekalesia.
O nisi o manatu mo taulimaga:
-
Tuu atu avanoa mo tagata taitoatasi e i ai aafiaga o tulaga maaleale i vailaau e faasoa atu o latou manaoga ma popolega i taitai o uarota.
-
I nofoaga e mafai ai, ia fai le mea sili e te mafaia e faatino ai taiala mo fonotaga ma gaoioiga e mafai ai e tagata e i ai tulaga maaleale pe afaina [i vailaau] ia auai ma le toafimalie.
-
Mafaufau e saunia ni faasalalauga o sauniga i luga o le initoneti mo i latou e le mafai ona auai ma ofoina atu ni auala mo nei tagata e tagofia ai le faamanatuga.
-
Faaaoga na o oloa ua faamaonia ma saunia e le vaega o fale ma fanua a le Ekalesia. Afai o se tasi o oloa masani o loo mafua ai se faafitauli, ia galulue faatasi ma le pule o fale ma fanua i le lotoifale e suesue ai nisi auala. Afai e aumai e tagata o le ekalesia a latou lava mea faamanogi po o oloa e faamama ai, o na oloa e mafai ona mafua ai ni aafiaga o tulaga ma’aleale i tagata.
-
Mafaufau i aafiaga ma’aleale i vailaau pe a fuafuaina ni gaoioiga.
-
Ia manatua o nisi tagata e i ai tulaga ma’aleale i vailaau ma e fia galulue i se vaega e saogalemu mo i latou.
Na aoao mai Elder Patrick Kearon o le Korama a Aposetolo e Toasefululua: “Mo i latou o e lagona le tuulafoaiina po o le i ai i autafa, o le mafanafana o [lo tatou] faafeiloaiga o le a taua tele. O le faaiuga lava, e mafai ona tatou fesili ifo ia i tatou lava pe mata o le a se ituaiga itula o le faamanatuga e finagalo ai le Faaola. O le a Sona finagalo i le auala e faafeiloa’ia, vaaia, faafailele, ma alofaina ai Ana fanau taitoatasi? O le a Sona finagalo i o tatou lagona pe a tatou o mai e faafou e ala i le manatuaina ma tapuai atu ia te Ia?”
O le fatuina o le nofouta i lenei faafitauli, e mafai ai e tagata o e feagai ma tulaga ma’aleale i vailaau ona lagonaina le faalogoina, faaaloalogia, ma sili atu ona aafia atoatoa i a latou uarota po o paranesi. Pe a galulue ma le agaalofa ma le agaga tatalo ia au epikopo ma aufono a uarota ma tagata taitoatasi ua aafia i nei ituaiga o tulaga faalesoifua maloloina, e toatele atu fanau a le Tama Faalelagi e faamalosia a o tuuina atu ia i latou ni avanoa sili atu e faalatalata atili atu ai ia Iesu Keriso. A o faapotopoto faatasi se uarota, “ua fusi faatasi o latou loto i le lotogatasi ma le alofa” (Mosaea 18:21), e ootia ma faamaloloina loto.