Lūlūina o Leo o Musika

Ata na tusia e David Malan/Malan Creative

Sa ou manao lava e tātā i le Faaili a le Lotoa o le Malumalu, le aufaili a Le Ekalesia a Iesu Keriso o le Au Paia o Aso e Gata Ai. Ou te ilia le pu oloto [clarinet] ma e i ai sou tikeri i musika, ae e foliga mai o le a ou le maua lava se avanoa.

Ae paga, ou te nofo i Niu Sila.

Ae peitai, ua faamanatu mai e le Agaga Paia ia te au, e mafai ona “faamalieina” a’u (Alema 29:3) o se paionia faamusika mo le Ekalesia i Niu Sila ma isi eria. O lo’u valaauga muamua lava i le 18 o o’u tausaga o le avea ma taitai musika i le vasega pepe. Talu mai lena taimi, ua faamanuiaina au e taitai ma faia ni gaosiga faamusika a le siteki ma le uarota, faapea foi ma le taina o le piano i le Peraimeri. Sa ou faasoaina atu musika i Niu Sila ma Filipaina ma taina le piano mo se fale tatala faamusika mo se itu o le Ekalesia i Shanghai, Saina. Sa ou usuina se pese taitoalua i le Nofoaga Autu mo le Aoaoina o Faifeautalai i Provo.

O musika na taofia au i le Ekalesia i le taimi o se taua faigata ma le popole ma le atuatuvale. Ina ua ou lagonaina e le mafai ona ou faia se isi lava mea, sa ou iloaina e mafai ona ou fai atu ioe e fesoasoani i le musika. E fesoasoani musika ia te au e vaai ai i le lalolagi e ala i mata faaleagaga.

E mafai ona ou fatuina ni musika ma lo’u toalua ma la’u fanau e toatolu. Sa matou faafiafia faatasi i le uarota, fatuina se saofaga faamusika mo se faasalalauga faafaifeautalai i le Misiona a Aukilani Niu Sila, ma pepese mo se konafesi a le siteki i luga o le initoneti. Ou te iloa le auala e valaaulia ai e le afioga a le Atua, e ala i viiga a le Ekalesia, le Agaga Paia ma mafai ai ona pai atu i loto i o tatou aiga ma uarota.

O loo faaauau pea ona ou fiafia i le Faaili i le Lotoa o le Malumalu mai se mea mamao, ae ou te iloa e faamanuiaina i tatou pe a tatou sailia ni avanoa e auauna atu ai ma viia le Alii i soo se mea tatou te i ai ma i soo se auala tatou te mafaia (tagai i le Salamo 150:6). Ou te faafetai e mafai ona tatou faasoa atu a tatou molimau e ala i a tatou meaalofa ma taleni, e aofia ai musika. E faamanuiaina i tatou, ma tatou te faamanuiaina isi, a o tatou faasoa atu na meaalofa ma taleni i fanau a le Atua ma “siitia i le mea o loo tatou tutu ai.”