O Le Faatuatua o Sister Muñoz

Ata na tusia e David Malan/Malan Creative

I le 1967, na avea ai i ma’ua ma Elder William Danner ma ni faifeautalai se toalua o ni faifeautalai muamua e toa 20 na auauna atu i Kolomupia. Sa itiiti lava le faamanuiaina o i matou seia oo ina faailoa atu i matou e se alii e igoa ia Raúl, lea sa aoaoina e isi faifeautalai, i le aiga o Muñoz. Sa malosi le Agaga a o matou aoaoina le aiga, ma molimau atu e uiga i le Perofeta o Iosefa Samita ma le Toefuataiga.

“Ou te iloa e moni mea o loo ta’ua e nei alii talavou,” o le tala lea a Raúl. “E tutusa le la perisitua ma Iesu Keriso. E mafai ona la o i le fogafale i luga i le taimi nei ma faamalolo le lua afafine tauaso, o Margarita.”

Sa tilotilo mai Sister Muñoz ia te au ma fesili mai, “E moni lena mea?”

Sa i ai se mea i lo’u faa’i. E lei tofotofoina muamua lava la’u molimau faapenei. Sa ou iloaina o se vavega faapena o le a manaomia ai le faatuatua malosi. Na ma iloa mulimuli ane ma la’u soa, na ta’u atu e tagata tomai faapitoa o mata i le aiga e faapea, o Margarita, o lē na le toe vaai i le ono masina a o le’i mavae se faalavelave, o le a lē toe vaai lava.

“E tutusa lava lua perisitua ma Iesu Keriso,” o le tala lea a Sister Muñoz. “Ua tauaso la’u tama teine. Tatou o i luga ma faamalolo o ia.”

Ou te lei molimauina lava se faatuatua tele faapena. Sa pei o ia o le avā a le Tupu o Lamonae, o le na fai atu ia Amona, “Ou te talitonu o le a faia e pei ona e fai mai ai” (Alema 19:9).

Sa faauuina e Elder Danner ia Margarita, ae sa ou faamauina le faauuga. I lo’u ofo, o upu na sau mai lo’u gutu e le o ni a’u upu: “O le a faamaloloina oe ma toe maua lau vaaiga.” Sa ou lagonaina foi le folafola atu o isi faamanuiaga, e aofia ai le fesoasoani o tagata o le aiga e fausia le Ekalesia i Kolomupia. Mulimuli ane, sa ou mafaufau pe na ou faia ni folafolaga o le a le faataunuuina.

O le aso na sosoo ai, na tamoe mai ai le atalii talavou o le aiga ia i maua i le auala, ma alaga mai, “Vavega! Vavega! Ua mafai ona vaai lo’u tuafafine!”

Sa ma papatisoina tagata e toa 13 i lena vaiaso.

Na avea Brother ma Sister Muñoz ma tagata faamaoni o le Ekalesia. O a la uunaiga, e aofia ai le galuega a Brother Muñoz o se taitai o tiute i Kolomupia, na fesoasoani e faasalalau atu le talalelei iina. Sa auauna atu se tasi o afafine i se misiona; sa avea lona tuagane ma se epikopo. Sa tumau pea le vaai a Margarita i lona olaga atoa.

Na fetalai Iesu Keriso e uiga ia i latou o e faatuatua ia te Ia, “O lo’u igoa latou te tatala ai mata o e tauaso” (Mataupu Faavae ma Feagaiga 84:69). Ou te iloa “e mafai mea uma lava i lē e talitonu” i le Faaola (Mareko 9:23).