Auala Faigofie e Avea Atili ai e Faapei o Keriso i a Tatou Auaunaga

Saunia e Francisco Lázaro Campos de Sousa, Pasila

I le taimi o se fonotaga a le au peresitene o le korama a toeaina, sa ou lagonaina ai se manao e feiloai i se uso o le korama e le o toaga, o se tasi ou te lei feiloai i ai. I se tasi aso ina ua uma se faatauga, sa ou lagona se uunaiga e alu i lona fale. Sa ou faatuai, ae sa faateleina lagona e feiloai ia te ia. Sa ou faailoa atu au lava ma fai atu ni mea na oo mai i lo’u mafaufau. Sa ou fai atu ia te ia e manaomia o ia e le Alii, ma e manaomia e ia le Alii.

Sa ia faasoa mai lona tiga o le tuuatoatasi ma isi faigata. “O le a e maua ni uo i le korama o le a fesoasoani ma lagolagosua,” sa ou fai atu ai ia te ia. Sa ia taliaina ma le lotomalie la’u valaaulia ma auai i sauniga o le Sapati.

Ou te lei iloaina muamua o ia, ae na iloa ma lagonaina e le Alii lona loto. Na toe faamautuina lo’u talitonuga maumaututu. A o tatou auauna atu i fanau a lo tatou Tama ma tatalo ia iloa o latou manaoga, e taitaiina i tatou e le Alii ia i latou. Tatou te fefaasoaai i le aafiaga fiafia o le “sii i luga lima o loo tautau i lalo, ma faamalosia tulivae vaivai” (Mataupu Faavae ma Feagaiga 81:5).

Saunia e Ana Rodriguez Ramirez, Sepania

I se tasi aso i la’u misiona, sa uunaia ai i ma’ua ma la’u soa e asiasi i se uso i le uarota. Sa matou otiotiina ni pepa fatu ma tusia ai ni savali i luga e faamanatu ai ia te ia lona taua.

Sa matou taunuu i lona fale, ma le manatu o le a le i ai o ia i le fale. A o matou faatulagaina pepa o fatu, sa alu atu tonu lava lana taavale i le fale. Sa ma taumafai ma la’u soa e lalafi ina ia faaauau ai pea le faate’ia faaleuō, ae sa leai se aogā. Sa ia iloa mai i ma’ua.

Sa oso ese le uso mai lana taavale ma ona loimata. Sa ia fusiina i ma’ua ma fai mai, “O oulua o a’u agelu. Lua te i ai lava iina i taimi uma ou te matua manaomia ai oulua. Faafetai lava.”

Sa ia valaaulia i ma’ua i totonu ma faamatala mai ia i ma’ua le aso umi sa feagai ai ma se tulaga ogaoga faaleaiga. Sa na ona ma faalogo lava ia te ia. Sa ma faasoa atu le tele o le alofa o le Atua ia te ia ma e lei galo ia te Ia mea sa ia oo i ai. Sa matou faitauina faatasi tusitusiga paia, ma sa faatumulia lona fale i le Agaga Paia ina ua ma o ese.

O soo o Iesu Keriso e “naunau e … faamafanafana atu ia i latou o e o loo manaomia le faamafanafanaga” (Mosaea 18:9). Ua Ia faatuatuaina i tatou e avea ma se vaega o Lana galuega tele—o le auaunaga maualuga atu ma le paia. Pe a tatou faaaluina se taimi e faamasani ai i tagata ma faalogologo i ai, o le a sili atu ona tatou saunia e avea ma agelu faalelalolagi a le Atua.

Saunia e Talia Rodríguez, Suitiselani

O le tatalo o se vaega taua lea o le auauna atu e pei o le Faaola. E mafai e le tatalo ona amata la tatou sailiga ia iloa po o ai e faamanuiaina. E mafai ona fesoasoani ia i tatou ia malamalama i le finagalo o le lagi e faatatau i le auala e faamanuia ai. O le tatalo o se laasaga autu foi lea i le aoaoina o le auala e faatino ai o tatou tiute.

Na tigaina lo’u toalua o Mario i le KOVITI i le amataga o le faama’i a o le’i faia tui puipui. Sa talosagaina e le epikopo se perisitua toeaina i la matou uarota, o Moronae, e tuuina atu ia te ia se faamanuiaga faaleperisitua.

Ona sa le manao o ia e maua le vairasi ma faasalalau atu i lona aiga, sa manaomia ai e Moronae le faamaoniga a le lagi a o lei faaauauina. Sa tootuli o ia i le tatalo ma lona toalua, ma faatalitali mo se faamautinoaga filemu. Ina ua la lagonaina le filemu, sa fai atu lona toalua ia te ia, “Alu ma lou ofutau, Moronae.”

Ina ua ulufale mai o ia i lo matou fale, sa matou vaaia se fitafita a le Alii. Sa maligi loimata o lo’u toalua i le olioli ina ua ia vaai atu i le uso o sau ma le lototoa e tuuina atu ia te ia le faamanuiaga sa ia manao i ai. O se aafiaga e le mafai ona faamatalaina.

Na afio mai le Faaola e ala mai i Lana auauna, lo matou tuagane/uso pele o Moronae, o le na faaee ona lima i luga o le ulu o Mario ma faamanuiaina o ia e pei ona faia e Keriso.

Saunia e Geiziane Morais Freitas Duarte, Pasila

Sa ou auauna atu i se tasi taimi i se uso ua le toe auai i le lotu. Pe a ou asiasi atu ia te ia, ou te faasoa atu le alofa tele o le Faaola ia te ia ma lona aiga. Ou te valaaulia i latou e o mai i le lotu i le Aso Sa e sosoo ai. Sa faaauau pea lenei faiga mo se taimi umi, ae latou te le’i omai lava. Sa ou lagona le lotovaivai. Sa malosi le faaosoosoga e aua le toe valaauliaina. Ae o taimi uma lava ma te asiasi atu ai ma la’u soa i lo latou fale, sa ma maua ai se vaaiga o le lagi. E masani lava ona ma vaai faalemafaufau ia i latou i le malumalu, o loo laei papae. Sa ma iloaina e tatau ona ma taumafai pea.

Ina ua mavae le tele o tatalo ma asiasiga, na iu lava ina oo mai le aso—na o mai le aiga i le lotu! Sa latou toe foi mai pea i vaiaso taitasi. Sa galulue malosi le aiga e faatupulaia lo latou faatuatua ma oo atu i le ala o le feagaiga. Na manino lava na faamalosia i latou e le talalelei.

Mulimuli ane, sa ou mauaina se valaaulia i le latou faamauga o le malumalu. A o ou vaavaai i le sauniga paia, sa le mafai ona taofia le maligi o loimata o le olioli. O se vavega lava.

Sa iai taimi sa ou manao ai e togi le solo. Ae o taimi uma lava ou te asiasi atu ai ia i latou, ou te vaaia ai le malumalu. Na faaali mai e le Atua ia te au se vaaiga o Lana fuafuaga mo lenei aiga. Sa Ia faaaogaina au e avea ma Ana meafaigaluega e fesootai ai pea ma i latou. Ou te faafetai ia te Ia mo le faaali mai ia te au o le vaaiga mamao moni o le auauna atu.

O le olioli ma le mana o le auauna atu e maua pe a avea i tatou ma se faamanuiaga i le olaga o se tasi, e auauna atu ia i latou e pei ona faia e le Faaola. Na aoao mai le Peresitene Aoao o le Aualofa o Camille N. Johnson e faapea “soo se taimi lava e te faia ai soo se mea e aumai ai le toomaga i isi—faaletino po o le faaleagaga— … ua e aumaia ia i latou le alofa o Iesu Keriso. Ou te tautino atu a o e faia, o le a faamanuiaina oe ia maua lo oe lava toomaga ia te Ia.”

Tatou te avea atili e faapei o le Faaola i la tatou auaunaga a o tatou liliu atu i le Alii mo se fesoasoani i a tatou taumafaiga. Tatou te mulimuli i uunaiga, faamasani ia i latou tatou te auauna atu i ai, tatalo mo i latou, fesoasoani ia i latou e osia ma tausia feagaiga, ma tumau i a tatou taumafaiga.

O le auaunaga a le Faaola—taitoatasi—o se mamanu lelei lea mo i tatou lava (tagai 3 Nifae 11:15). E pei ona aoao mai Elder Juan Pablo Villar o le Fitugafulu: “Afai o le a tatou mulimuli ia Iesu Keriso—le faifeau Matai—ma auauna atu i isi e pei ona Ia faia, o le a Ia faamalosia ma faamalosia i tatou. E ala i la tatou auaunaga, e mafai ai ona tatou faamanuiaina olaga o isi ma maua ai le filemu ma le olioli mo i tatou lava.”