“Maua le Olioli i Lau Malaga i le Talalelei,” Liahona, Iulai 2025.
Maua le Olioli i Lau Malaga i le Talalelei
O le taunuuga sili o le faaalia o lo tatou alofa mo le Alii e ala i le tausia o Ana poloaiga o faamanuiaga ia e aumaia ai le fiafia ma le olioli.
Ata o tagata fiafia o le Ekalesia i Taialani na pueina e Christina Smith
A o ou auauna atu o se taitai misiona i Iapani i ni nai tausaga ua mavae, sa ou auai i se konafesi i le faaiuga o le vaiaso i se aai maotua i se tasi o tulimanu mamao o la matou misiona. Sa faatulagaina e le peresitene o le itu ou te faia se faatalanoaga ma se alii sa auai i le Ekalesia i le tausaga na muamua atu ma sa saili e maua se pepa faataga o le malumalu. Sa faamoemoe o ia e maua lona lava faaeega paia i le taimi po o le latalata i le tasi le tausaga o lona papatisoga.
I le taimi o la ma talanoaga, sa faamatala ai e lenei tagata fou lona matua faafetai lava mo faamanuiaga anoanoai na ia mauaina i le tausaga talu ona papatisoina o ia. Sa fiafia o ia e auai i faamanatuga faalevaiaso ma isi sauniga. Sa matuā aafia o ia i gaoioiga a lana paranesi. Ia te au lava ia, sa ia faaalia se talitonuga o le feagaiga na mafua mai i le malamalama i lona faamoemoega o le talalelei, lea ua avea nei ma se vaega taua o ia. O ia o se soo liua o Keriso o le na oo i se liuga tele o le loto (tagai Mosaea 5:2).
O le vaega na totoe o le ma talanoaga na mulimuli i se mamanu faamoemoeina. Sa ma talanoaina sauniga ma feagaiga o le a avea ma se vaega o lona aafiaga i le malumalu. Sa ia taliina ma le mautinoa fesili masani taitasi e fesootai ma le mauaina o se pepa faataga o le malumalu.
Ina ua maea le faatalanoaga, ou te manatua lo’u fai atu i le peresitene o le itu lo’u faafetai tele i le feiloai atu i se alii maoae faapena. Sa ou ta’u atu ia te ia lo’u faagaeetia ona na maua e faifeautalai ma tagata o le ekalesia, ma faafaileleina faaleagaga, se tasi e i ai lea ituaiga o folafolaga.
Sa ou ofo ina ua faasoa mai e le peresitene o le itu e faapea, ina ua amata ona maua e lenei alii lesona mai faifeautalai ma auai i le lotu i le silia ma le tausaga na muamua atu, sa leai sona fale ma sa matua faigata lava—toetoe lava a leai se faamoemoe—i tulaga. Ona faamatala lea e le peresitene o le itu le auala na taitai atu ai le suesueina e lenei uso o le talalelei ma lona liua i se vaitaimi o masina i lona suiga faavavega, ma tuuina ai o ia i se ala o le ola tutoatasi faaleagaga ma faaletino ma tuuina atu ia te ia se lagona o le faamoemoega ma le olioli.
Na tuuina atu e le talalelei ia te ia se ata manino o le faamoemoega o lona olaga. O upumoni manino ma taua o le talalelei na aumaia ai tali i fesili taua o le olaga faaletino, e amata i se malamalama “O le Atua o lo tatou Tama Faalelagi, ma o i tatou o Ana fanau. … E silafia patino i tatou e le Atua ma e alofa ia i tatou.” I Lana fuafuaga, “O le Tama Faalelagi … ua sauniaina le tele o meaalofa ma taiala e fesoasoani ia i tatou e toe foi atu ai i Lona afioaga.”
O le faamanuiaga lena mo lenei tagata, lea e tutusa lava le avanoa mo fanau uma a le Atua e ala i le talalelei a Iesu Keriso.
O le Faamoemoega o le Olaga
Ona sa toefuatai mai e Iesu Keriso Lana talalelei e ala mai i le Perofeta o Iosefa Samita, “ua i ai ia i tatou se malamalamaaga i le faamoemoega o le olaga, po o ai i tatou,” na tautino mai ai Peresitene M. Russell Ballard (1928–2023). I lana molimau faaiu i le Ekalesia, na saunoa ai Peresitene Ballard, o le sa avea ma Peresitene o le Korama a Aposetolo e Toasefululua i lena taimi:
“Ua tatou iloa pe o ai le Atua; ua tatou iloa pe o ai le Faaola, ona ua ia i tatou Iosefa, o lē sa alu i le toga laau o se tamaitiiti, e saili le faamagaloga mo ana agasala. …
“Ou te maofa lava, ma ou te mautinoa e faapena foi le toatele o outou, i le faamanuiaina o i tatou e iloa mea ua tatou iloa e uiga i lo tatou faamoemoega i le olaga, le mafuaaga ua tatou i ai iinei, o mea e tatau ona tatou taumafai e fai ma faataunuuina i o tatou olaga i aso taitasi.”
Mo tagata o Le Ekalesia a Iesu Keriso o le Au Paia o Aso e Gata Ai, o lena malamalama e aofia ai se malamalamaaga i le “fuafuaga atoatoa” a le Atua o le faaolataga. Ua lauiloa foi o “le fuafuaga sili o le fiafia,” “o le fuafuaga o le togiolaina,” ma “le fuafuaga o le alofa mutimutivale” (Alema 42:8, 11, 15), e “aveesea ai mealilo mai le olaga ma le le mautonu mai lo tatou lumanai.” E taua i lena fuafuaga “le aoaoga faavae a Keriso,” lea e totonugalemu i le faamoemoega o le olaga.
Ona ua ia i tatou le talalelei, ua tatou iloa ai o i tatou o fanau a le Atua, na auina mai i le lalolagi ina ia tofotofoina, faaleleia, ma saunia e “aumai e ala i le toetu mai o e ua maliliu, e ala i le manumalo ma le mamalu o le Tamai Mamoe” (Mataupu Faavae ma Feagaiga 76:39). Ua tatou iloa poloaiga ma ua aoaoina “ua lava lea ua tatou iloa ai le lelei mai le leaga” (2 Nifae 2:5). Ua tatou iloa ua tatou i ai i le lalolagi e alolofa ma auauna atu. Ma ua tatou iloa ua valaauina i tatou e le Faaola e faatoilalo le lalolagi ma fesoasoani i isi ia faia faapea (tagai Ioane 16:33; Mataupu Faavae ma Feagaiga 64:2) e sauniuni ai mo Lona Afio Mai Faalua.
A o tatou taulai atu ia te Ia, o le mea na ta’ua e Iosefa Samita “o le leo faamalosiau o le Talalelei a lo tatou Alii o Iesu Keriso” o le a faamalosia ai i tatou i aso faigata ma aumaia ai le uiga ma le faamoemoega i o tatou olaga ma olaga o isi.
O Le a Tootuli Tulivae Uma, saunia e Dan Wilson, e le mafai ona kopiina
Usiusitai, Faamanuiaga, Olioli
Ua tuuina mai e le Atua ia i tatou le faitalia o amioga mama ina ia mafai ona tatou tali atu mo a tatou filifiliga (tagai Mataupu Faavae ma Feagaiga 101:78; 2 Nifae 2:16). I le avea ai o se vaega o le “tetee i mea uma” (2 Nifae 2:11), ua faatagaina ai Satani e faaosooso i tatou e faaaoga sese lo tatou faitalia.
O le mea lea, o Aʼu o le Alii, “ona ua Ou iloa le malaia o le a oo mai i luga o e o nonofo i le lalolagi, na Ou valaʼau atu ai i luga o laʼu auauna o Iosefa Samita, Laitiiti, ma tautala atu ia te ia mai le lagi, ma tuu atu ia te ia poloaiga” (Mataupu Faavae ma Feagaiga 1:17). O lena mamanu lea e faaali mai ai e le Alii Ana poloaiga ma le finagalo i Ana perofeta o loo faaauau pea i o tatou aso faatasi ma Peresitene Russell M. Nelson—ma mo le mafuaaga lava lea e tasi. E finagalo le Atua e taitai i tatou i le fiafia i lenei olaga ma i le mamalu selesitila i le isi olaga.
O le usiusitai i poloaiga a le Atua e tatau ona sau mai lo tatou tuuto atu ma le alofa mo Ia. Na folafola mai e le Alii o Iesu Keriso lava Ia o le alofa i le Atua “o le poloaiga muamua ma le silisili” (tagai Mataio 22:37–38). Na Ia tuuina mai se malamalamaaga atili ina ua Ia folafola mai, “Afai tou te alolofa mai ia te au, ia outou tausi i a’u poloaiga” (Ioane 14:15).
E i ai se taui mo le alofa i le Alii ma le tausiga o Ana poloaiga. I lenei tisipenisione sa Ia faamatalaina ai “se tulafono, ua folafola mai e le mafaafitia i le lagi … , lea e faavae ai faamanuiaga uma—
“Ma a tatou maua se faamanuaiga mai le Atua, e maua i le usiusitai i lena tulafono ua faavae ai i luga” (Mataupu Faavae ma Feagaiga 130:20–21).
O lea, o le taunuuga sili o le faaalia o lo tatou alofa mo le Alii e ala i le tausia o Ana poloaiga o faamanuiaga ia e aumaia ai le fiafia ma le olioli.
O le vaai atu i le olaga e ala i tioata o le talalelei toefuataiina ma faaaliga faaonapo nei e aumaia ai ia i tatou le manino. Faatasi ai ma se vaaiga manino i lo tatou tupuaga paia ma lo tatou taunuuga, ua tatou iloa ai “o mea tonu lava o le a avea ai [o tatou] olaga faaletino ma mea sili e mafai ona avea ai, o mea tonu lava ia o le a avea ai [o tatou] olaga i le faavavau atoa ma mea sili e mafai ona i ai !”
Faaiuga
Ou te faaiuina i le mea na ou amata ai, i le toe manatuaina o lo’u aafiaga i tausaga ua mavae ma se tagata liliu mai talu ai nei i Iapani. E ala i lona filiga ma le filiga o faifeautalai ma tagata o le ekalesia, na ia maua ai le talalelei toefuataiina a Iesu Keriso. I le mauaina o le talalelei, sa ia iloa ai foi lona faamoemoega, lea na faalauteleina ai lana vaaiga mamao. Sa ia mauaina foi le fuafuaga sili o le fiafia. O le usiusitai i feagaiga o le talalelei o le fuafuaga na aumaia ai ia te ia faamanuiaga ma le olioli, ma siitia ai o ia faaletino ma faaleagaga.
O lana malaga na taitai atu ai i le avea ai ma tagata auai i le Ekalesia a Iesu Keriso na mafai ai ona avea o ia ma se molimau ia Iesu Keriso. Na faamatalaina e Elder Patrick Kearon o le Korama a Aposetolo e Toasefululua le olioli lenei:
“Ona o le fuafuaga alofa a lo tatou Tama Faalelagi mo Lana fanau taitoatasi, ma ona o le soifua togiola ma le misiona a lo tatou Faaola, o Iesu Keriso, ua mafai ai ona tatou—ma e ao ai lava ona avea i tatou ma tagata e sili ona fiafia i le lalolagi! Tusa lava foi pe fesasaa’i i o tatou luga afā o le olaga i se lalolagi e tele ina pagatia, e mafai lava ona tatou atia’e se lagona faatupula’ia ma mausali o le olioli ma se toafilemu i totonu ona o lo tatou faamoemoe ia Keriso ma lo tatou malamalama i lo tatou lava tulaga i le fuafuaga matagofie o le fiafia.”
Ou te ofoina atu lo’u agaga faafetai mo, ma le molimau, i le talalelei toefuataiina a Iesu Keriso, e aofia ai le fuafuaga sili o le fiafia o loo i ai i totonu. Ou te valaaulia outou ia aai ma feinu i fua o le talalelei ma lagona le olioli sili atu i lenei olaga i la outou malaga agai i le ola e faavavau.