O Se Molimau Mautinoa i le Fuafuaga Ofoofogia o le Fiafia a le Atua

A o ou talavou, sa ou auai i se a‘oga faalelotu tuma‘oti e i ai se tu masani faa-Kerisiano. O se aoga matagofie, ma sa ou vaaia le tele o faataitaiga o le auaunaga faaKeriso i lo‘u taimi iina. O vaiaso uma lava i le aoga sa manaomia ai ona matou auai i se vasega o aoaoga faalelotu.

I lo‘u tausaga mulimuli i le aoga maualuga, o le kuata muamua atoa o lena vasega o aoaoga faalelotu sa faaaluina i le autu o le “FaaMamona” (e pei ona ta‘ua e le faifeau o le sa taitaia le vasega). Ae sili atu ona faapitoa, sa taulai atu le vasega i le mafuaaga na sese ai le “FaaMamona”.

I le taimi o le vasega muamua, sa lapataia ai e le faifeau tagata uma e uiga i le mea e tatau ona latou faia pe afai latou te fetaui atu i “Mamona.” Sa faasino mai tagata uma o le vasega ia te au ma fai mai, “Ae o Jared o se Mamona.” Ina ua uma le vasega, sa ou talanoa i le faifeau, ma sa ofo mai o ia e saili se fesoasoani mo a‘u.

Mo le taimi muamua i lo‘u olaga, sa ou manaomia moni lava ona iloa pe moni pe leai le talalelei a Iesu Keriso, ma pe o Le Ekalesia a Iesu Keriso o le Au Paia o Aso e Gata Ai o le Ekalesia toefuataiina a le Alii i le lalolagi. Sa le o toe avea lenei mea ma se fesili faaleteori i lo‘u olaga. Sa ou lagonaina muamua le i ai o le Agaga Paia i lo‘u papatisoga. Ae peitai, ua ou lagonaina nei se manaoga lofituina e maua se malamalama loloto atu. Na oo mai se taimi o le manatunatuga i lo‘u olaga. Sa manaomia ona ou iloa mo a‘u lava.

Mo nai isi vaiaso na sosoo ai, sa ou faaaogaina uma tusi sa mafai ona ou faia e faatatau i le talalelei toefuataiina. O le mea e sili ona taua, sa ou faitauina le Tusi a Mamona; ma a o ou faitauina le Tusi a Mamona, sa ou iloa ai o le afioga a le Atua ma o se isi molimau ia Iesu Keriso. E lei leva, ae fesoasoani mai se epikopo alofa ia i ma‘ua ma lo‘u uso e saunia mo le malumalu ma a ma‘ua misiona. O nei faaiuga ua faamanuiaina ai o matou olaga ma o matou aiga talu mai lena taimi. Ou te matua faafetai lava i lena epikopo maoa‘e.

I le talalelei toefuataiina a Iesu Keriso, ua tatou maua ai le faamanuiaga o le iloaina o le mea na tatou o mai ai, le mafuaaga ua tatou i ai iinei, ma le mea o le a tatou o i ai. Ua tatou iloa o i tatou o fanau a le Atua, ma e ala mai i le Togiola a lo tatou Faaola o Iesu Keriso, e mafai ai ona tatou toe foi atu i le afioaga o le Atua. I le Ioane 3:16 e faitauina:

“Aua ua faapea lava ona alofa mai o le Atua i le lalolagi, ua ia aumai ai lona Atalii e toatasi, ina ia le fano se tasi e faatuatua ia te ia, a ia maua e ia le ola e faavavau.”

Ina ua uma ona teena i Amonaea, sa faaali atu se agelu ia Alema ma poloaiina o ia e toe foi atu ma toe talai atu i tagata o lena aai. Sa toe foi atu Alema.

“Ma a‘o ulu atu o ia i le aai, sa fia ai o ia, ma sa ia fai atu i se alii: E te tuuina mai ea sina meaai i se auauna faatauvaa a le Atua?’”

O lena tagata o Amoleka, lea na saunia e le Alii e auauna faatasi ma Alema. Sa la aoao faatasi ma le malosi le fuafuaga a le Atua o le togiolaina.

Na faapena foi ona aoao mai le perofeta o Iakopo e faapea, e na o “galuega, ma le alofa mutimutivale, ma le alofa tunoa o le Mesia Paia” e mafai ai ona tatou toe foi atu e nonofo i le afioaga o le Atua.

Tatou te maua le mana o le Togiola a Iesu Keriso e ala i le mulimuli i Lana aoaoga faavae. A o tatou faatuatua ia te Ia, ofo atu se loto momomo ma se agaga salamo, ma o mai ia te Ia e ala i sauniga o le Talalelei—o le osia ma le faamamaluina o feagaiga paia—e faapaiaina i tatou e le Agaga Paia, ma tatou maua Lona mana i o tatou olaga.

Sa aoaoina talu ai nei i tatou e lo tatou perofeta, o Peresitene Russell M. Nelson, e uiga i le alofa o le feagaiga a le Atua. Pe a tatou maua sauniga o le Talalelei a Iesu Keriso, ma osia feagaiga ma le Atua, tatou te fesootai atu i le Atua i se sootaga faapitoa ma le mauaina o Lona alofa i le feagaiga.

Talu ai nei, sa ou maua ai le faamanuiaga o le talimalo i tagata asiasi i le Fale Tatala o le Malumalu o Aukilani Niu Sila. Sa ou aveina le toatele o tagata. E masani lava, ou te fesili atu i nei tagata asiasi po o a ni o latou lagona ina ua latou ulufale atu i potu paia i le Malumalu. E to‘atele na latou talanoa e uiga i le filemu ma le fesoota‘iga ma le Atua lea na latou lagonaina. Sa molimau atu le Agaga Paia i nei tagata asiasi o le Malumalu o Lona Maota.

I le avea ai ma tagata o le Ekalesia, ua mafai ai ona tatou maua le mana o lo tatou Faaola o Iesu Keriso ma Lana Togiola e ala i le auai e le aunoa i le Maota o le Alii. O lena mana o le a faamanuiaina ai o tatou olaga, ma olaga o a tatou fanau ma fanau a fanau a o tatou tumau faamaoni i feagaiga tatou te osia.

E tatau ona tatou o mai taitoatasi, i se aso se tasi, i o tatou lava aso o le manatunatuga. Ua faamanuiaina i tatou i le i ai o se Atua alofa e pipii mai ia i tatou, ma o se o loo saili pea ia i tatou. Pe a tatou ole atu i le Atua, ma se loto faamaoni, ma se faamoemoega moni, ma le faatuatua ia Keriso, na te faaali mai le upumoni ia i tatou e ala i le mana o le Agaga Paia. Mai lena aso ma le agai i luma , tatou te tuua ai le nofoaga e le faaituau. Ae o faamanuiaga o Lona alofa faafeagaiga ua i o tatou luga, ma o folafolaga o le faavavau ma le ola e faavavau, e ala i le fuafuaga a le Atua o le fiafia, o loo i o tatou luma.