Ai Vakadinadina Dei ni Tuvatuva Maqosa ni Bula Marau ni Kalou

Niu se cauravou, au a lewena e dua na koronivuli lotu vakaitaukei ka vakavuvulitaka na vakabauta vaKarisito. E koronivuli totoka sara, kau raica e vuqa na ivakaraitaki ni veiqaravi vaKarisito ena noqu gauna ekea. Sa gadrevi tu ena veimacawa e koronivuli me keimami tiko ena dua na kalasi ni veituberi vakalotu.

Ena icava ni noqu yabaki ena koronivuli levu, a vakayagataki na matai ni wase ni vuli taucoko ni kalasi vakalotu oya ena ulutaga ni “Momani” (e vakatoka na italatala ka qarava na kalasi). Vakatabakidua sara, a vakanamata tu na kalasi ki na vuna e cala kina na “Momani”.

Donuya na matai ni kalasi, a veivakaroti taucoko na italatala ena ka e dodonu mera kitaka ke ra donui ira na “Momani.” Era a dusi au taucoko na tiko ena kalasi ka kaya, “Ia o Jareti e Momani.” Ni cava na kalasi, au a vosa vua na italatala, ka kaya tu ni na vukei au.

Ena matai ni gauna ena noqu bula, au a via kila saraga ke sa dina se sega na kosipeli i Jisu Karisito, ka sa Lotu vakalesuimai ni Turaga ki vuravura Na Lotu i Jisu Karisito ni Yalododonu Edaidai. Sa sega tale ni qai taro ni vakilakila oqo ena noqu bula. Au a vakila taumada na kena tiko na Yalo Tabu ena noqu papitaiso. Ia, au sa vakila oqo na gagadre luvuci me rawati kina na kilaka titobu sara. Na gauna ni vakilai yalona sa basika ki na noqu bula. Au sa gadreva tu meu kila vakaiau.

Ena macawa veitaravi eso, au a wilika taucoko na ivola au rawata e semati ki na kosipeli vakalesuimai. Vakabibi sara, au a wilika na iVola i Momani; ia niu wilika tu na iVola i Momani, au qai kila ni sa vosa ni Kalou ka dua tale na ivakadinadina i Jisu Karisito. Oti oya, a vukei au kei na taciqu e dua na bisopi lomani ena vakavakarau ki na valetabu kei na neirau kaulotu. Na vakatulewa oqo sa vakalougatataka tu na neirau bula kei na neirau matavuvale. Au sa vakavinavinakataka vakalevu na bisopi totoka oya.

Ena kosipeli vakalesuimai i Jisu Karisito, sa noda na veivakalougatataki ni kila tu na vanua eda lako mai kina, na vuna eda tiko kina eke, kei na vanua eda gole tiko kina. Eda kila ni da sa luve ni Kalou, ka sa rawa ni da lesu tale ki na itikotiko ni Kalou ena vuku ni Veisorovaki ni noda iVakabula o Jisu Karisito. Ena Joni 3:16 eda wilika:

“Ni sa lomani ira na kai vuravura vakaoqo na Kalou, me solia kina na luvena e duabauga sa vakatubura, me kakua ni rusa ko ira yadua era sa vakabauti koya, me ra rawata ga na bula tawamudu.”

Ni sega ni vakatarai tu e Amonaia, a rairai na agilosi vei Alama ka vakaroti koya me lesu ka vunau tale vei ira na tamata ena koro oya. A lesu tale o Alama.

“Ia ni sa curuma ko koya na koro levu ko ya sa viakana sara, sa kaya vua e dua na tamata: E rawa beka mo solia vua na tamata yalomalumalumu ni Kalou oqo e dua na ka me kania?’”

Na tamata oya o Amuleki, ka sa vakarautaka na Turaga me veiqaravi kei Alama. Rau a vunautaka kaukauwa sara na ituvatuva ni veivueti ni Kalou.

A vakatavulica vaka talega kina o Jekope na parofita ni da rawa ni lesu ka laki tiko vata na Kalou ena “vuku ni cakacaka dodonu, kei na loloma cecere, kei na loloma soliwale ni Mesaia Tabu” duadua ga.

Eda rawata na kaukauwa ni Veisorovaki i Jisu Karisito ena muri ni Nona vunau. Ni da vakabauti Koya tu, cabora na loma raramusumusu kei na yalo bibivoro, ka lako ki Vua ena ivakavuvuli ni Kosipeli—ena caka kei na dokai ni veiyalayalati tabu eso—eda sa vakatabui mai na Yalo Tabu, ka ciqoma na Nona kaukauwa ena noda bula.

Noda parofita, o Peresitedi Russell M. Nelson, a vakatavulici keda walega oqo ena veiyalayalati loloma ni Kalou, Hesed. Ni da ciqoma na cakacaka vakalotu ni Kosipeli i Jisu Karisito, ka caka veiyalayalati kei na Kalou, eda sa semati vua na Kalou ena veiwekani vakasakiti ka rawata na Nona veiyalayalati loloma.

Walega qo, au a kalougata ni qaravi ira na vulagi ena Dolararaba ni Valetabu e Okaladi Niu Siladi. Au a kauta eloma e vuqa na tamata. Au dau tarogi ira wasoma na vulagi ena ka era bau vakila ni ra curuma oti na rumu vakatabui eso ni valetabu. Vuqa e tukuna na vakacegu kei na isema vua na Kalou era vakila tu. Sa vakadinadinataka tiko na Yalo Tabu vei ira na vulagi oqo ni sa Nona Vale na Valetabu.

Vaka lewe ni Lotu, sa rawa ni da rawata na kaukauwa ni noda iVakabula o Jisu Karisito kei na Nona Veisorovaki ena tiko wasona ena Vale ni Turaga. Na kaukauwa oya ena vakalougatataka na noda bula, kei na nodra bula na luveda kei na makubuda ni da yalodina tu ki na noda veiyalayalati.

Eda na lako yadudua mai, dua na siga, ki na noda siga ni vakilai yaloda. Eda kalougata tu ni tiko na Kalou lomani ka kabiti keda, ka sa dau kauwaitaki keda saraga. Ni da kerekere vua na Kalou, ena yalo vinaka, ena inaki dina, ka vakabauti Karisito, sa vakatakila vei keda o Koya na dina ena kaukauwa ni Yalo Tabu. Mai na siga ya lako yani eda biuta na buturara vakatautauvata Ia na veivakalougatataki ni Nona veiyalayalati loloma sa tikori keda, kei na yalayala eso e tawamudu kei na bula tawamudu, ena ituvatuva ni bula marau ni Kalou, sa liutaki keda.