“Kune Reki ena Nomu iLakolako Vakosipeli,” Liaona, Julai 2025.
Kune Reki ena Nomu iLakolako Vakosipeli
Na isau cecere ni noda vakaraitaka na noda lomana na Turaga ena noda muria na Nona ivakaro sai koya na veivakalougatataki e kauta mai na marau kei na reki.
iTaba ni lewe ni Lotu reki e Thailand mai vei Christina Smith
Niu veiqaravi tiko vaka iliuliu ni kaulotu mai Japani ena vica na yabaki sa oti, au a tiko ena dua na koniferedi ni mua ni macawa ena dua na siti vakakoro ena dua na tutu yawa ni neitou tabana ni kaulotu. A vakarautaka o peresitedi ni tikina meu vakayacora e dua na veivakatarogi vata kei na dua na turaga e lewena na Lotu ena dua na yabaki yani ki liu ka vinakata tiko me dua nona ivolatara ni valetabu. A nuitaka me na ciqoma na nona edaumeni ena gauna e yabaki dua kina se volekata yani ni nona papitaiso.
Ena gauna ni neirau veivosaki, a vakamacalataka na lewenilotu vou oqo na nona vakavinavinakataka vakalevu na veivakalougatataki levu a ciqoma ena loma ni yabaki mai na gauna a papitaiso kina. E dau taleitaka na tiko ena sakaramede ena veimacawa kei na soqoni tale eso. A vakaitavi vakalevu sara ena itaviqaravi ni nona tabana. Vei au, a vakaraitaka kina e dua na yalodei ni veiyalayalati ka yaco mai na nona kila na nona inaki vakosipeli, ka sa dua na tiki bibi ni nona bula ena gauna oqo. O koya e dua na tisaipeli saumaki i Karisito ka sotava e dua na veisau levu ni yalo (raica na Mosaia 5:2).
Na vo ni neirau veivosaki a muria e dua na ivakarau nuitaki. Keirau veivosakitaka na cakacaka vakalotu kei na veiyalayalati ka na tiki ni veika ena sotava ena valetabu. A sauma vakaidina o koya na taro tudei yadua e semati kina kena ciqomi e dua na ivolatara ni valetabu.
Ni oti na veivakatarogi, au nanuma lesu na noqu vakamacalataka vua na peresitedi ni tikina na noqu vakavinavinakataka na noqu sotava e dua na turaga vakasakiti vakaoqo. Au tukuna vua na noqu qoroya nira kunea na daukaulotu kei na lewenilotu, ka ra susugi cake vakayalo, e dua na tamata ka tu vua na itovo vaqo kei na yalayala.
Au kurabui ni wasea na peresitedi ni tikina ni gauna sa tekivu ciqoma kina na turaga oqo na lesoni mai vei ira na daukaulotu ka lako i lotu ena loma ni dua na yabaki yani i liu, a sega tu nona vale ka dredre sara—voleka ni sega na inuinui—ena kena ituvaki. A qai vakamacalataka o peresitedi ni tikina na sala a yaco kina na cakamana ni veisau na nona vulica na turaga oqo na kosipeli kei na nona saumaki mai ena vica na vula, ka biuti koya ena dua na salatu ni bula rawati koya vakayalo ka vakayago ka solia vua e dua na yalo vakainaki kei na reki.
E solia vua na kosipeli e dua na iyaloyalo matata ni inaki ni nona bula. Na dina matata ka talei ni kosipeli e kauta mai na isau ni taro bibi ni bula oqo, tekivu ena dua na kila ka ni “Kalou e Tamada Vakalomalagi, ka da sa Luvena. … Na Kalou e kilai keda yadua ka lomani keda.” Ena Nona ituvatuva, “Sa vakarautaka na Tamada Vakalomalagi e vuqa na isolisoli kei na idusidusi me vukea meda lesu tale ki na Nona iserau.”
Sa vakaoqori na veivakalougatataki vua na tamata oqo, ka sa tautauvata na kena vakarautaki vei ira kece na luve ni Kalou ena kosipeli i Jisu Karisito.
Na iNaki ni Bula
Baleta ni a vakalesuya mai o Jisu Karisito na Nona kosipeli mai vua na Parofita o Josefa Simici, “sa tu vei keda na kila ka me baleta na inaki ni bula, o cei o keda,” a kaya o Peresitedi M. Russell Ballard (1928–2023). Ena iotioti ni nona ivakadinadina kina Lotu, a kaya kina o Peresitedi Ballard, ka Peresitedi Vakatawa ni Kuoramu ni iApositolo Le Tinikarua ena gauna oya:
“Eda kila kina se o cei na Kalou, eda kila kina se o cei na iVakabula, ena vukui Josefa, o koya ka a gole kina veivunikau ni se cauravou, ni vakasaqara me vosoti na nona ivalavala ca.
“Au qoroya, au vakadeitaka ni vaka kina e vuqa vei kemuni, ni kalougata nida mai kila na inaki ni noda bula, na cava eda tiko kina eke, na cava meda cakava ka rawata ena veisiga ni noda bula.”
Vei ira na lewe ni Lotu i Jisu Karisito ni Yalododonu Edaidai, na kila ka oqori e oka kina na kila ka me baleta na “ituvatuva uasivi sara” ni veivakabulai ni Kalou. E kilai talega me “ituvatuva cecere ni bula marau,” “na ituvatuva ni veisereki,” kei na “yavu ni loloma cecere” (Alama 42:8, 11, 15), e “kauta tani na veika vuni mai na bula kei na veilecayaki mai na noda veisiga ni mataka.” E bibi ki na ituvatuva o ya na “ivunau i Karisito,“ ka sa usutu ni inaki ni bula.
Baleta ni sa tu vei keda na kosipeli, eda kila nida sa luve ni Kalou, ka talai mai ivuravura meda vakatovolei, vakasavasavataki, ka vakavakarau meda “tucake tale mai na mate, ena vuku ni qaqa kei na lagilagi ni Lami“ (Vunau kei na Veiyalayalati 76:39). Eda kila na ivakaro ka da sa vakasalataki “me[da] kila kina na vinaka mai na ca” (2 Nifai 2:5). Eda kila nida sa tiko e vuravura meda loloma ka veiqaravi. Eda kila ni sa kacivi keda na iVakabula meda vakamalumalumutaka na vuravura ka vukei ira na tani me ra cakava vakakina (raica na Joni 16:33; Vunau kei na Veiyalayalati 64:2) ena vakavakarau kina iKarua ni Nona Lako Mai.
Nida vakanamata Vua, na ka e vakatoka o Josefa Simici me “rorogo ni vakavinavinaka ni Kosipeli ni noda Turaga o Jisu Karisito” ena vaqaqacotaki keda ena gauna ni dredre ka kauta mai na ibalebale kei na inaki kina noda bula kei na nodra bula na tani.
MeNa Tekiduru na Duru Kecega, mai vei Dan Wilson, me kakua ni lavetaki
Talairawarawa, Veivakalougatataki, Reki
Sa solia vei keda na Kalou na galala ni digidigi me rawa nida saumitaro ena noda digidigi (raica na Vunau kei na Veiyalayalati 101:78; 2 Nifai 2:16). Me tiki ni “veibasai ni ka kecega” (2 Nifai 2:11), sa vakatarai kina o Setani me temaki keda meda vakayagataka cala na noda galala ni digidigi.
Ia na Turaga o Jisu Karisito, “ni sa kila na veika ca ena yaco vei ira na lewei vuravura” ena noda gauna, a kaciva na Parofita o Josefa Simici, “a sa vosa vua mai lomalagi, ka solia vua na ivakaro” (Vunau kei na Veiyalayalati 1:17). Na ivakarau oqori ka vakatakila kina na Turaga na Nona ivakaro kei na nona lewa vei ira na Nona parofita e tomani tiko ena noda gauna mai vei Peresitedi Russell M. Nelson—ena inaki vata. E gadreva na Kalou me kauti keda kina marau ena bula oqo kei na lagilagi vakasilesitieli ena bula ka tarava.
Na talairawarawa kina ivakaro ni Kalou e dodonu me lako mai ena noda yalodina ka lomani Koya. Na Turaga o Jisu Karisito Vakaikoya a tukuna ni lomana na Kalou “sai koya na imatai ka ivunau levu” (raica na Maciu 22:37–38). A solia eso tale na vakasama ena Nona kaya, “Kevaka dou sa lomani au, dou talairawarawa kina noqu vunau” (Joni 14:15).
E tiko na isau ni noda lomana na Turaga ka muria na Nona ivakaro. Ena itabagauna oqo a vakamacalataka kina o Koya “e dua na lawa, ka sa virikotori voli mai lomalagi, ka sa yavutaki kina na veivakalougatataki kecega—
“Ia nida sa muria e dua na ivakaro, ena vakalougatataki keda na Kalou e na ka sa yalataki tu kina”(Vunau kei na Veiyalayalati 130:20–21).
O koya gona, na isau cecere ni noda vakaraitaka na noda lomana na Turaga ena noda muria na Nona ivakaro sai koya na veivakalougatataki ka kauta mai na marau kei na reki.
Na noda raica na bula ena iloilo ni kosipeli vakalesuimai kei na ivakatakila ni gauna oqo e vakamatatataki keda. Ena dua na rai matata me baleta na noda itekitekivu vakalou kei na icavacava, eda kila ni “veika sara ga ena vakavuna me yacova na noda bula vakayago na kena itutu vinaka duadua e na tautauvata vinaka sara ga kei na veika ena vakavuna me rawata na kena itutu vinaka duadua na [noda] bula taucoko ena gauna tawamudu me na vinaka duadua kina!”
iTinitini
Au tinia ena vanua au a tekivu kina, niu nanuma lesu na veika au a sotava ena vica na yabaki sa oti vata kei na dua na curuvou vou mai Japani. Mai na nona gugumatua kei na gugumatua ni daukaulotu kei na lewenilotu, a kunea kina na kosipeli vakalesui mai i Jisu Karisito. Ena nona kunea na kosipeli, a kunea talega kina na nona inaki, ka vakarabailevutaka na nona rai. A kunea talega na ituvatuva cecere ni bula marau. Na talairawarawa kina veiyalayalati ni ituvatuva ni kosipeli a kauta mai vua na veivakalougatataki kei na reki, ka laveti koya cake vakayago ka vakayalo.
Na nona ilakolako ka muataki kina lewena na Lotu i Jisu Karisito a vakatarai koya me ivakadinadina i Jisu Karisito. Sa vakamacalataka o Elder Patrick Kearon ena Kuoramu ni iApositolo Le Tinikarua na reki e tarava mai:
Ena vuku ni nona ituvatuva ni loloma na Tamada Vakalomalagi vei keda yadua na Luvena, baletana nona vueta na bula kei na itavi na noda iVakabula, ko Jisu Karisito, e rawa—ka dodonu vei keda meda—tamata mamarau taudua e vuravura! Ni liwavi keda tiko mada ga na cava ni bula ena dua na vuravura leqaleqa, e rawa nida susuga e dua na yalo ni reki kei na vakacegu ni lomada baleta na noda vanuinui vei Karisito kei na noda kila na noda tikina ena ituvatuva totoka ni marau.”
Au solia na noqu vakavinavinaka, kei na ivakadinadina ni, na kosipeli vakalesui mai i Jisu Karisito, oka kina na ituvatuva cecere ni bula marau ka sa vakacurumi vakatitobu tu kina. Au sureti kemuni moni vakaivotavota ena vua ni kosipeli ka vakila na reki levu cake ena bula oqo ena nomuni ilakolako kina bula tawamudu.