Noqu iVakasala Vei Ira na iTabagone Qase Cake me baleta na Veigadivi kei na Vakamau

Kevaka o tarogi se o veigadivi tiko vakacava au nuitaka ni “nakiti” e dua vei ira na imatai ni nomu isaunitaro. Meu tovolea mada meu vakaraitaka oqo ena dua na ivakaraitaki.

E sivia na veimama ni gauna ni noqu veigadivi kei watiqu ni keirau tu veiyawaki. Au sotavi Catherine ni keirau se vuli tiko mai Santiago, Chile. Keirau tekivu veigadivi, ia a toki lesu tale i vale ki Antofagasta ni bera niu vakacavara na noqu koroi. Baleta ni keirau vinakata me tarai cake na neirau veimaliwai, vakadua se vakarua ena dua na vula, au a vodo basi ena 20 na auwa ki Antofagasta ena yakavi ni Lotulevu, vakayagataka na mua ni macawa kei Catherine (oka kina na lotu), ka vodoka tale na basi 20 na auwa ki Santiago meu tiko ena noqu kalasi ena 8:00 ena mataka ni Moniti.

Ena veisiga keirau sega ni tiko vata rawa, keirau a veivosaki ena talevoni. Me vaka ni sega ni tiko na talevoni veikauyaki ena gauna o ya, au a volia e dua na ituvatuva ni talevoni ka rawa kina vei au meu qiri tawayalani ena talevoni raraba. Au vakayagataka e vica vata na auwa ena dua na vale ni talevoni, kevaka e dua tale e gadreva me vakayagataka, ena gadrevi me cegu mada kau qai qiriti Catherine lesu ena gauna ga e cava kina.

Ena gauna taucoko ni veika oqo, ena vuku ni vuqa na veivakataotaki ena neirau veimaliwai, sa dodonu kina meu vulica meu nakita na sala au veitaratara kina kei Catherine.

Au sureti kemuni moni cakava na veigadivi me nakiti ka vakainaki. Sa kerei keda o Peresitedi Russell M. Nelson meda nakita na noda bula vakatisaipeli. E rawa talega nida saga meda nakita ena sala eda veigadivi kina.

E dodonu meda taroga na taro bibi:

• Na cava o nanuma me baleta na bula, matavuvale, kei na ka bibi duadua, na iVakabula?

• Au kila na mataqali ka o cakava kei na ka o sega ni taleitaka mo cakava, ia na cava na nomu nanuma me baleta na kosipeli?

• Na cava na nomu itagede kei na vanua mo yaco kina?

Na taro e nakiti me salavata kei na kena vakayacori e levu na itaviqaravi e nakiti. Marautaka, ia mo raica me caka vata tale ga na veika vakayalo. Cakava na itaviqaravi ena vukei iko mo kila vakavinaka ka veikilai vakaidina.

Vakabauta Uasivita na Rere

Ni oti e dua na gauna na nomu veigadivi tiko, e rawa ni vaka e dua na vakatulewa veivakayalolailaitaki mo digitaka mo vakamau. Au se rere tiko ga me yacova sara na gauna keirau vakamau kina kei Catherine!

Na digitaka mo vakamau ena rairai vakatulewa dredre, ia e sega ni vakatulewa o cakava ena dua ga na gauna. Na digidigi mo vakamau e kena ibalebale na nomu digitaka mo yalataka tale vua na nomu itokani tawamudu ena nomu bula taucoko ka vaqaqacotaka vata na yalayala o ya.

Ni tiko na nomu taro me baleta na vakamau se kosipeli, sa dodonu mo “vulica ena nomu vakasama; mo qai kerea [na Turaga] kevaka e dodonu” (Vunau kei na Veiyalayalati 9:8) Mo tarogi iko talega, “Au sa tu vakarau li meu vakaitavi ena ka oqo ena vo ni noqu bula?”

Niu vakamau, era tarogi au eso keu rere niu na veisere me vakataki rau na noqu itubutubu. Na noqu isaunitaro e dau sega tu ga. Niu vakamau, au nanuma meu cakava na ka ga e gadrevi me vinaka kina na noqu vakamau. Oqori na ibalebale ni digidigi ena veisiga meu muria na iVakabula ka vakamau ena marau kei watiqu. Au digitaka meu kua ni vakayawaki au mai na vakatulewa vinaka kei na dodonu na rere ni veisere.

E kaya o Peresitedi Jeffrey R. Holland, na Peresitedi Vakatawa ni Kuoramu ni iApositolo Le Tinikarua: “Ni sa yaco na veivakararamataki dina, qarauna na veitemaki me da dro tani mai na dua na ka vinaka. Kevaka a dodonu ni ko sa masulaka oti ka nuitaka ka bulataka, e donu tikoga oqo. Mo vorata yani na nomu vakatitiqa. Mo vakatulewa qaqa ni ko sa rere. “Mo qai kakua kina ni kauta laivi na nomu yalodei.”

Na ka dina oya ni vuqa vei kemuni e tu vei kemuni na gagadre vinaka ka dina moni kunea e dua na itokani. O kila ni oqo e dua na gagadre vinaka ka dodonu, ia ni ko sasagataka tiko mo kunea e dua e donu vei iko, ona vakila nio tao tu ena nomu toso ena salatu ni veiyalayalati.

Me baleta na ka oqo, a kaya kina o Sisita Kristen M. Oaks: “Kevaka o raica nio sa tuvakadua tu ka waraka e dua e donu mo drau vakamau, muduka na wawa ka tekivu vakavakarau. Vakarautaki iko kina bula—ena vuli, cakacaka, kei na lalawa. Kua ni waraka me suguraki mai vei iko na bula marau. Vaqara yani na madigi ni veiqaravi kei na vuli. Vakabibi, vakararavi vua na Turaga, “ka dau kaciva na yaca ni Turaga e veisiga, ka mo ni tudei tu ena vakabauta na veika ena yaco mai.”[Mosaia 4:11]. Au yalataka ni kevaka oni cakava, ena yaco mai vei kemuni na marau.”

E se bera ni mudu na nomu ilakolako ena salatu ni veiyalayalati baleta nio se bera ni vakamau. E se tiko ga vei iko na nomu isema ni veiyalayalati kei na iVakabula. Kevaka o sasaga tiko ena nomu sega ni ciqomi, galili, se rere, kauti Koya mai kina nomu sasaga dredre. Ena vaqaqacotaki iko. Ena vukei iko o Koya.

Vei ira eso, na veigadivi kei na inaki me kunea e dua na itokani tawamudu ena sega ni vua vakatotolo. Vei ira tale eso ena vakakina. Se cava ga na ka, au kila ni na vakayacora na Kalou na yalayala kece sara sa cakava vei keda o Koya kevaka eda nakita ka nuitaki Koya.

Se vanua cava ga o tiko kina e vuravura se na veika e yaco tiko se sega ni yaco tiko ena nomu bula, ena vuku i Jisu Karisito, sa rawa mo reki ena ituvaki kecega. O Koya kei na Nona ivakavuvuli na kena isau.