Na Vakabauta nei Sisita Muñoz

Droini mai vei David Malan/Malan Creative

Ena 1967, keirau a yaco kei Elder William Danner me rua vei ira na imatai ni 20 na daukaulotu me keimami laki veiqaravi e Colombia. E lailai sara na ka e rawa me yacova na nona sa vakaveikilaitaki keimami o Raul e dua na turaga ka a vakavulici mai vei ira na daukaulotu tale eso, kina matavuvale na Muñoz. A kaukauwa sara na Yalotabu ni keirau vakavulica na matavuvale, ka vakadinadinataka na Parofita o Josefa Simici kei na Veivakalesui mai.

“Au kila nira sa tukuna tiko na ka dina na cauravou oqo,” e kaya o Raúl. “E tautauvata na nodra matabete kei na kena vei Jisu Karisito. E rawa nira lako cake ena gauna sara ga oqo ka vakabula na luvemu yalewa mataboko, o Margarita.”

A raici au mai o Sisita Muñoz ka taroga, “E dina beka o ya?”

A curuoso na noqu itilotilo. E se bera vakadua ni vakatovolei vakaoqo na noqu ivakadinadina. Au kila ni cakamana vakaoqo ena gadrevi kina na vakabauta kaukauwa. Keirau qai kila kei noqu itokani ni ratou a tukuna na kenadau ni mata vei iratou na matavuvale nio Margarita, ka a boko na matana ena ono na vula sa oti ena dua na vakacalaka, ena sega tale ni rai rawa.

“E tautauvata na nomu matabete kei Jisu Karisito,” e kaya o Sisita Muñoz. “Sa mataboko na luvequ yalewa. Meda lako cake ka vakabulai koya.”

Au se bera vakadua ni bau vakadinadinataka na vakabauta cecere vakaoqo. E vaka na wati Lamonai na Tui, ka a kaya vei Amoni, “Au vakabauta ni na yaco me vaka ko sa tukuna” (Alama 19:9).

A lumuti Margarita o Elder Danner, kau vauca na veilumuti. Au kurabuitaka, ni vosa e lako mai gusuqu e sega ni noqu: “Ko na vakabulai ka rai rawa.” Au vakila talega meu cavuta na veivakalougatataki tale eso, oka kina nio ira na lewe ni matavuvale oqori era na veivuke ena kena tarai cake na Lotu mai Colombia. Ni oti oya, au vakataroga de so na ka au a yalataka ena sega ni vakayacori.

Ena siga ka tarava, a cici mai vei keitou na luvedratou tagane yabaki tinivakacaca na matavuvale ki gaunisala, ka kailavaka, “Cakamana! Cakamana! Sa rawa ni rai na ganequ!”

Keirau a papitaisotaki ira e 13 na tamata ena macawa oya.

Rau sa yaco me lewe ni Lotu yalodina o Baraca kei Sisita Muñoz. Na nodra veivakayarayarataki, oka kina na cakacaka nei Baraca Muñoz me iliuliu ni itovo vakavanua mai Colombia, a vukea na kena vakatetei yani na kosipeli e kea. A kaulotu e dua na luvena yalewa; a veiqaravi vaka bisopi o ganena. A rai tu ga o Margarita ena vo ni nona bula.

Sa kaya o Jisu Karisito me baleti ira era vakabauti Koya, “Ena tadola na matadra na mataboko ena yacaqu” (Vunau kei na Veiyalayalati 84:69). Au kila ni “sa rawarawa na ka kecega vua sa vakabauta” na iVakabula (Marika 9:23).