Sala Rawarawa ni Yaco me Vakarisito Vakalevu Cake na Noda Veiqaravi

Mai vei Francisco Lázaro Campos de Sousa, Brazil

Ena dua na bose ni mataveiliutaki ni kuoramu ni italatala qase, au gadreva meu sotava e dua na lewe ni kuoramu ke luluqa tu vakalotu, e dua au se bera ni sotava. Dua na siga ni oti na noqu volivoli au vakauqeti meu lako kina nona vale. Au lomalomarua, ia sa qaqa na yalo meu sotavi koya. Au a vakatakilai au ka tukuna na veika e basika mai noqu vakasama. Au tukuna vua ni gadrevi koya na Turaga, ka gadreva o koya na Turaga.

E wasea na mosi ni galili kei na dredre tale eso. “O na kunei ira na itokani ena kuoramu ka ra na veivuke ka veitokoni,” au a kaya vua. A ciqoma sara vakarawarawa na noqu veisureti ka tiko ena soqoni ni Siga ni Vakacecegu.

Au sega ni kilai koya taumada, ia a kilai koya na Turaga ka vakila na yalona. A vakadeitaki tale na noqu vakabauta. Nida qaravi ira na luvena na Tamada ka masuta meda kila na nodra gagadre, ena liutaki keda na Turaga vei ira. Eda wasea na reki ni “laveta cake na liga sa wadamele, ka vakaukauwataka na duru sa malumalumu” (Vunau kei na Veiyalayalati 81:5).

Mai vei Ana Rodriguez Ramirez, Spain

Dua na siga ena noqu kaulotu, keirau a vakauqeti kei noqu itokani me keirau sikova e dua na marama ena tabanalevu. Keirau koti uto pepa ka vola kina na itukutuku ni loloma me vakananumi koya ena kena yaga.

Keirau yaco yani ki na nona vale, ka nanuma ni na sega ni tiko e vale. Ni keirau tuva tiko na uto pepa, a kele sara yani e matanivale na nona motoka. Keirau saga kei noqu itokani me keirau vuni me maroroi toka na veivakurabuitaki vakaitokani ia e sega ni yaga. A raici keirau.

A sobu mai na nona motoka ni drodro tu na wainimatana. A mokoti keirau ka kaya, “Oi kemudrau na noqu agilosi. O drau tu wavoki ena gauna au gadrevi kemudrau vakalevu duadua kina. Vinaka vakalevu.”

A sureti keirau mai ka tukuna vei keirau na siga ocaoca ka sotava tiko kina e dua na ituvaki bibi vakamatavuvale. Keirau a vakarorogo ga vua. Keirau wasea na levu ni nona lomani koya na Kalou ka sega ni guilecava o Koya na veika e sotava tiko. Keitou a wilika vata kei koya na ivolanikalou, ka vakasinaiti na nona vale ena Yalo Tabu ni keirau biubiu.

Era sa “lomasoli na tisaipeli i Jisu Karisito mera vakacegui ira sa gadreva na vakacegu” (Mosaia 18:9). E nuitaki keda o Koya meda tiki ni Nona cakacaka cecere—na veiqaravi cecere ka savasava cake. Nida taura na gauna meda kilai ira na tamata ka vakarorogo vei ira, eda sa vakaiyaragitaki vakavinaka cake meda agilosi ni Kalou e vuravura.

Mai vei Talia Rodríguez, Suwitisaladi

Na masu sa tiki bibi ni veiqaravi me vaka na iVakabula. Na masu ena rawa ni tekivuna na noda vakasaqaqara meda kila se o cei meda vakalougatataka. E rawa ni vukei keda meda kila na lomai lomalagi me baleta na sala meda veivakalougatataki kina. Na masu e dua talega na ikalawa bibi ena kena vulici me vakayacori na noda itavi.

A tauvi COVID o Mario na watiqu ni bera na icula ni itatarovi. A kerea na bisopi e dua na italatala qase ena neitou tabanalevu, o Moronai, me solia vua e dua na veivakalougatataki ni matabete.

Baleta ni sega ni vinakata me tauvi koya na matetaka ka qai vakatetea kina nona matavuvale, a gadreva kina o Moronai na veivakadeitaki mai lomalagi ni bera ni cakava. A tekiduru vata kei watina ena masu, ka waraka na veivakadeitaki. Ni rau sa vakila na vakacegu, a kaya vua o watina, “Mo lako vata kei na nomu iyaragi, Moronai.”

Ni curu yani kina neitou vale, keitou raica e dua na tamata qaqa ni Turaga. A tagi ena marau o watiqu ni raica ni lako mai ena yaloqaqa na turaga oqo me solia vua na veivakalougatataki e gadreva. E dua na ka e sega ni vakamacalataki rawa.

A lako mai na iVakabula mai vua na Nona italai, o Moronai na wekai keitou lomani, ka tabaka na ului Mario ka vakalougatataki koya me vaka ena cakava na Karisito.

Mai vei Geiziane Morais Freitas Duarte, Brazil

Au a veiqaravi ena dua na gauna vua e dua na marama ka sega ni dau lako i lotu. Niu sikovi koya, au na wasea na levu ni nona lomani koya kei na nona matavuvale na iVakabula. Au dau sureti iratou meratou lako mai i lotu ena Sigatabu ka tarava. A toso tiko vakabalavu na vakatovotovo oqo, ia era sega ni lako mai. Au vakila niu sa yalolailaii. E kaukaua na veitemaki meu sa soro. Ia ena veigauna kece keirau sikova kina kei noqu itokani na nodratou vale, keirau dau raica na lomalagi. Keirau dau raitayaloyalotaki ira ena valetabu, vakaisulu vulavula. Keirau kila ni dodonu me keirau tovolea tikoga.

Ni oti e vuqa na masu kei na veisiko, sa qai yaco mai na siga—era sa lako mai ki lotu na matavuvale! Era dau lesu tale mai ena veimacawa. Eratou a cakacaka vakaukauwa na matavuvale me vakatubura na nodra vakabauta ka muria na salatu ni veiyalayalati. Sa kune votu ni sa vaqaqacotaki ira na kosipeli.

Au mani ciqoma e dua na veisureti kina nodrau veivauci ena valetabu. Niu sarava tiko na cakacaka vakalotu tabu, au sega ni rawa ni vosota na turu ni wai ni mataqu. E dua na cakacaka mana.

So na gauna au dau via soro. Ia ena veigauna kece au dau sikovi iratou kina, au dau raica na valetabu. A vakaraitaka vei au na Kalou e dua na ivakaraitaki ni Nona ituvatuva me baleta na matavuvale oqo. A vakayagataki au me Nona iyaya ni cakacaka meu veitaratara tikoga kei ira. Au vakavinavinaka Vua ena nona vakaraitaka vei au na raivotu dina ni veiqaravi.

Na reki kei na kaukauwa ni veiqaravi e kunei nida yaco me veivakalougatataki ena nona bula e dua, ka qaravi ira me vaka ena vakayacora na iVakabula. E vakavulica o Peresitedi Raraba ni iSoqosoqo ni Veivukei o Camille N. Johnson ni “gauna cava ga o cakava kina e dua na ka mo vakacegui ira kina eso tale—vakayago se vakayalo—ko sa kauta mai vei ira na loloma i Jisu Karisito. Au vakadinadinataka ni gauna o cakava kina, o na vakalougatataki mo kunea na nomu vakacegu mai Vua.”

Eda na yaco me vaka na iVakabula ena noda veiqaravi nida gole vua na Turaga me vukei keda ena noda sasaga. Eda muria na veivakauqeti, kilai ira eda qarava, masulaki ira, vukei ira mera cakava ka maroroya na veiyalayalati, ka tomana tiko na noda sasaga.

Na veiqaravi ni iVakabula—yadudua—sa ivakarau vinaka ni noda (raica na 3 Nifai 11:15). Me vaka e vakavulica o Elder Juan Pablo Villar ena Vitusagavulu: “Kevaka eda na muri Jisu Karisito—na iVakavuvuli ni veiqaravi—ka veiqaravi vei ira na tani me vaka e vinakata o Koya, ena vaqaqacotaki keda ka vakaukauwataki keda o Koya. Mai na noda veiqaravi, eda na rawa ni vakalougatataka na nodra bula na tani ka kunea na vakacegu kei na reki me baleti keda.”