Keirau na Raica Tale Beka na Makubui Keirau Yalewa?

Droini mai vei David Malan/Malan Creative

Ena 1999 a takali na luvei keirau tagane qase duadua. A biuta tu mai na watina kei na dua na luvena yalewa yabaki dua ka keirau dau veimarautaki ka veimaliwai totoka, e veimacawa.

Ena vuku ni ituvaki rerevaki, na ikatolu ni siganisucu nei makubui keirau yalewa sa iotioti ni gauna keirau a veitaratara kina kei koya. Ena vuqa na yabaki, keirau a masu, lolo, ka nuitaka ni na rawa ni keirau raici koya tale.

Ena koniferedi raraba ni Okotova 2018, a veisureti kina o Peresitedi Russell M. Nelson ena dua na yalayala: “Au vakauqeti kemuni moni vakasaqara e dua na sala mo ni veivosaki wasoma kina kei na Turaga—moni tiko ena Nona vale tabu—ka qai maroroya na ilesilesi oya ena yalodina kei na reki. Au yalataka ni Turaga ena kauta mai na mana e kila o koya nio gadreva nio solibula mo veiqaravi ka sokalou ena Nona valetabu.”

Niu rogoca na veivosa oqo, au vakila ni vosa tiko vei au na Tamada Vakalomalagi mai vua na Nona parofita. O koya gona, keirau sa yalataka kei watiqu me keirau tekivu lako kina valetabu ena Tusiti yadua ka maroroya na yalayala o ya “ena yalodina kei na reki.”

Dua na siga ena 2019, a vakauitukutuku vakasauri vei au na makubui keirau yalewa yabaki 21 ena initaneti. A yaco vakamalua mai na nona veitaratara, ia ni tomani tiko na nona itukutuku, sa tekivu me taroga na taro ka dolava e dua na sala totoka ni veivosaki. E vakatarai keirau vakawawa taumada kina nona bula ka qai vakawasoma.

Ena 2021 keirau a sureti koya me keitou vakayagataka vata na Siga ni Vakavinavinaka kei na neitou matavuvale. A ciqoma o koya, ka keirau marautaka na gauna me keirau kilai koya kina. A rawarawa na nona sema vei ira na nona nei, momo, kei ira na vugona. E vinakata me dua na ivakarau tudei na veisiko mai ena Siga ni Vakavinavinaka.

Ni oti e dua na yabaki, a semati tale kei keitou e dua na luvei keirau tagane ni oti e dua na gauna balavu. Ena Maji 2024, ena imatai ni gauna ena neitou bula vakamatavuvale, a vakayacori kina e dua na soqoni vakamatavuvale ka okati kina na gone kecega era bula tiko, watidra, kei ira kece na 16 na makubuqu.

Au dau vakabauta tu ga ni parofita e vosa ena vukuna na Turaga. Au vakabauta ni cakamana e gadrevi vakalevu oqo a yaco mai ena vuku ni veidusimaki kei na yalayala sa vakatakila mai o Peresitedi Nelson.

Na noqu ivakadinadina kei na noqu lomana na Tamaqu Vakalomalagi kei na Luvena e sega, ka sega ni vakatabakidua, ena cakamana oqo. Ia, au kurabuitaka, na nodrau loloma vakatamata yadua me baleti au kei na kaukauwa ni Nodrau yalayala e lako mai vua na parofita.