Au Vakila na Vakacegu ni Yaloqu,” Liaona, Julai 2025.
iYaloyalo ni Vakabauta
Au Vakila na Vakacegu ni Yaloqu.
Niu vulinasi voli, au vakila ni sega na gauna me baleta na noqu veikacivi ena Lotu kei na noqu vuli. Ia au a vulica niu se cauravou ni veiqaravi kei na talairawarawa kina ivakaro ni Kalou ena veimuataki kina dua na bula mamarau.
Veitaba mai vei Christina Smith
Niu se gone, au vakasamataka meu tawasei au mai na Lotu i Jisu Karisito ni Yalododonu Edaidai. Ia ena gauna vata oqori, au qai kila niu a sega ni muria tiko na ivakavuvuli kece sara ni Lotu. Au sa nanuma ni kevaka meu na tawasei au tani mai na Lotu, au vinakata me vinaka kina na lomaqu.
Au sa mani nanuma kina meu na tovolea meu talairawarawa ki na veika kece e vakavulica na kosipeli. Kevaka au vakila e lomaqu ni sega ni vakaibalebale na ivakavuvuli, au na rawa ni biubiu ka sega ni veivutunitaka.
Ena noqu “kaukauwa, vakasama kei na noqu igu taucoko” (Vunau kei na Veiyalayalati 4:2), au a tovolea meu talairawarawa ki na veika e vakavulica na Turaga ka vakaraica na veika ena yaco. Mai na ka au sotava oya, a soli vei au e dua na gauna ni marau kina dua na itagede au se bera vakadua ni bau sotava. Niu tiko ga ena Lotu, au vakila ni rawa niu bulataka e dua na bula mamarau, ka kila na cava na marau dina.
Ni oti na ka au sotava oya, au sa nanuma meu laki kaulotu ka wasea na vakacegu au vakila e yaloqu. Se cava ga na veivakatovolei au na sotava, au sa vulica ni kevaka au masu vua na Kalou, ena tokoni au o Koya, solia vei au na inuinui, ka vukei au meu kila na vuna au sotava kina na dredre.
Na Cava Meu na Cakava?
Ni oti na noqu kaulotu, niu vuli tiko meu nasi, au dau vakayagataka e levu sara na gauna ena veisiga ena noqu vuli cakacaka. Ni oti oya, au na cakava na ilesilesi ni vuli e vale me yacova na 2:00 se 3:00 ena mataka. Au na qai moce vakalailai ni bera niu cakava tale eso na vuli cakacaka ena siga ka tarava.
Ena gauna o ya, au veiqaravi tiko vakaperesitedi ni Cauravou ena tabanalevu. A dredre sara vei au meu vulica ka vakayacora na noqu veikacivi ena Lotu. Au kila kevaka meu biuta na noqu veikacivi, au na sega ni rawa ni vakavulici ira na cauravou me baleta na bibi ni muria na salatu ni Kalou se ciqoma na veivakalougatataki sa vakarautaka tu o Koya me baleti au.
“Na cava meu cakava?” Au taroga vei Tamada Vakalomalagi “Sa veilecayaki na yagoqu kei na noqu vakasama, kau sega ni vakabauta niu sa cakava tiko na mataqali cakacaka ko ni na vinakata meu cakava.”
Ni oti noqu masu, au sa vakacegu! Au vakila ni sa tukuna tiko vei au na Kalou, “Ena gauna oqo o vakayagataka tiko mo cakacaka vakaukauwa e bibi vei iko. Ena rairai dredre beka na nomu ituvatuva osooso, ia kevaka o vorata rawa na veivakatovolei ena gauna oqo, au na vakayagataki iko mo vakalougatataka ka vukei ira e vuqa tale ena veisiga ni mataka.”
Na isaunitaro oqo e vakadeitaka vei au ni tiko na noqu inaki, ni kevaka meu vosota, au na rawa ni cakava e dua na cakacaka digitaki ena veisiga ni mataka.
Au vakadinadinataka vei ira na cauravou na dredre ni vuli vei au. Ia au a tukuna talega vei ira ni sa ka bibi na Lotu kei na kosipeli ka dodonu me usutu ni noda bula ena loma mada ga ni dredre. Au vakaraitaka na noqu lomani ira ka tukuna vei ira niu tovolea tiko vakaukauwa meu vakayacora na noqu veikacivi baleta ni rau sa rui bibi sara vei au me vaka na noqu vuli. Eratou tagi ni tara na lomadratou na dina ni veika oqo.
Vakalougatataki ena Veiqaravi
Niu tomana tikoga na noqu qaravi ira na cauravou ka vakavulica vei ira na kosipeli, au dau vakasamataka vakalevu na nodra nanuma dredre vakaitabagone ena nodra lako ki lotu ka vulica na kosipeli. Au vakanamata ena ituvaki vinaka ni nodra vakasama, au vukei ira tale ga ena nodra dui gagadre.
Na noqu qaravi ira na cauravou a vukei au meu tara cake na noqu rawa ni raica na veisau lalai vei ira na tamata. Ena gauna oqo niu sa cakacaka tiko vaka-nasi ka qaravi ira e vica vata na daseni na tauvimate, au sa vakayagataka na kaukauwa oya niu veimaliwai kei ira na tani.
“E kaya na tauvimate oya nio kila vinaka na veika e nanuma,” era tukuna vei au na itokani vakacakacaka. Se ena kaya beka e dua na tauvimate, “Au raica ni rawarawa na vosa vei iko.”
Na veiqaravi ena veikacivi ni Lotu sa vakalougatataki au talega e vale. Au sa vulica meu vakaliuca na watiqu niu sa vulica meu vakalailaitaka na noqu nanumi au ga.
“Kevaka meu Tamada Vakalomalagi,” au tarogi au, “ena lako vakacava o Koya me vaqaqacotaka na matavuvale oqo, kei na cava meu cakava meu rawata kina oqori?”
Baleta niu sa vulica na kosipeli mai vu ni yaloqu, au kila na sala kei na vuna meu vakavulici ira kina na luvequ ni sa ka bibi na Lotu. Keirau kila kei watiqu na ivakarau me keirau vakabulabulataka vakayalo kina na neitou matavuvale baleta ni keirau yavutaka na neirau ivakavuvuli ena ivakavuvuli ni iVakabula.
Au vakila na inuinui kei na vakacegu e yaloqu ena noqu muria na ivakavuvuli ni Turaga ka vakarorogo kina Nona veivakauqeti. Sa dau tu e yasaqu o koya ena sala taucoko, ka vakalougatataki au ena noqu talairawarawa kei na veikacivi meu vakalougatataka ka vukei ira na tani. Se cava ga na veivakatovolei, au vinakata meu bulataka na noqu bula ena dua na sala me rawa kina niu cakava na ka e gadreva o Jisu Karisito (raica na 2 Nifai 32:3).