Na Loloma kei na Kauwai ni iVakabula me Baleta e Dua

A lako mai o Jisu me vaka e dua na tamata sa tucaketale vei ira na Nifai ni oti na Nona tiko vata kei Tamana. A lako mai me vakacegui ira na tamata. A sureti ira ena loloma:

“Moni tucake ka lako mai vei au, mo ni daramaka kina na ligamuni kina sarisariqu, ka tara tale ga na we ni ivako ena ligaqu kei na yavaqu mo ni kila kina ni sai Au na Kalou ni Isireli kei na Kalou ni vuravura taucoko, au a vakamatei ena vuku ni ivalavala ca ni vuravura.

A ra sa kitaka oqo ni ra sa lako yadudua yani me yacova nira sa lako taucoko, era sa raica e matadra ka tara ena ligadra, ka ra sa kila vakaidina ka vakadinadinataka ni sai koya dina oqo era a vola tu na parofita ni na lako mai” (3 Nifai 11:14–15; vakaikuritaki).

E muri, a sureti ira na iVakabula mera kauti ira kece mai era tauvimate, vakararawataki, se “vakararawataki ena dua ga na ivalavala a sa vakabulai ira kecega ko koya nira sa kau mai vua” (3 Nifai 17:7, 9; vakaikuritaki). “A sa keveti ira yadua, na gonelalai ka vakalougatataki ira ka masulaki ira vei Tamana” (3 Nifai 17:21; vakamatatataki).

Meda raitayaloyalotaka nira a tiko kina e 2,500 na tamata (raica na 3 Nifai 17:25). Niu sucu ka susugi cake mai Aferika, au dau raitayaloyalotaka vakavuqa na iVakabula ni tucake tu ena serau ni matanisiga, wawa tu me veivakabulai, veivakacegui, veivakayaloqaqataki, ka vakaraitaka na loloma vei ira kece era lako mai Vua. Nida Nona tisaipeli, eda sa kerei meda qaravi ira era tu wavoliti keda me vaka e cakava o Koya—vakayadudua.

Na mataveiliutaki ni kuoramu ni iSoqosoqo ni Veivukei se italatala qase ena nomu tabanalevu se tabana, ena veivakadonui nei bisopi se peresitedi ni tabana, sa lesi kemuni kina na tamata yadua kei na matavuvale moni veiqaravi kina. Eso vei ira o na rairai sega beka ni kila. O na rairai lomaleqataka na nomu veisiko, qiri, se vakau itukutuku mada ga vei ira. Ona rairai leqataka nira na sega ni vinakati iko ena nodra vale. Ia era sa vakasamataka ena masumasu na nomu iliuliu na ibalebale ni ilesilesi oqo vei iko kei na veivakalougatataki e rawa ni kauta mai vei iko kei na nomu matavuvale dauveiqaravi. O koya gona, lako ena vakabauta.

Ena vica na yabaki sa oti, au a lako vata kei na dua na peresitedi ni iteki ena tokalau ceva kei Amerika meu sikova e vica na matavuvale ni bera e dua na koniferedi ni iteki. Ni keirau yaco yani kina dua na vale, a lako mai vei keirau e dua na turaga vakaisulu sega ni vinaka.

“Na cava o vinakata?” a kailavaka mai. “Au sega ni vinakata mera lako mai kina noqu vale na tamata!”

Au a kauwaitaka na gauna sa yaco kina me veivakarerei na nona itovo na turaga oqo. Au vinakata meu taura na peresitedi ni iteki ka cici lesu kina motoka! Ia a yalomalua o peresitedi ni iteki. “Vosoti keirau,” a kaya. “Keirau nanuma ni a tukuna vei iko na nomu bisopi ni keirau na lako tiko mai.”

Nirau veivosaki tiko, au vakila vakaukauwa sara na Yalotabu. Au a kumuna vata na noqu yaloqaqa, torova yani na turaga oqo, ka kaya, “Taciqu lomani, o Peresitedi Thomas S. Monson [o koya na parofita ena gauna o ya] sa solia vei au na ilesilesi meu lako mai ike. Keirau lako mai ke me keirau mai raici iko. Au kauta mai vei kemudou na loloma ni parofita.”

Au raica yani na matana na turaga oya ka raica ni sa tonawanawa mai. Sa tekivu me wasea na nona dredre vei keirau. E dau lomaocaoca vakalevu na watina. Se qai biu ga mai ena nona cakacaka. E sega na kakana me vakani ira kina na luvena. A vakadeitaka na peresitedi ni iteki vua na turaga oqo ni na vukei koya kei na nona matavuvale na Lotu . A totoka na neirau veisiko.

Ni oti e vica na macawa, au a kerea vua na peresitedi ni iteki me bulagoci au mai. A tukuna vei au nio bisopi nei tacida oqo kei na matabose ni tabanalevu era sa vukei koya tiko ka rau sa tekivu sota kei ira na daukaulotu o koya kei watina, ka sega ni lewe ni Lotu.

E tekivu na veiqaravi ena noda dolele yani vei ira na tani ena vakabauta kei na loloma. Ni da lako ena vakabauta, ka vakararavi vua na Turaga, sa rawa meda vakasaqara na ivakatakila mai Vua me baleta na Nona ituvatuva kei na inaki me baleta na noda veimaliwai kei ira yadua na Luvena. Ena vukei keda o Koya meda kila na ka meda tukuna ka cakava ka dusimaki keda ena sala meda “veivukei kina ena noda icolacola, me mamada kina,” “tagi vata kei ira sa tagi; … ka vakacegui ira sa gadreva na vakacegu” (Mosaia 18:8–9). Ni da vakayacora vakakina, eda na qai kila na levu ni nona lomana dina na iVakabula na dua.

Me yacova mai nikua, au se veitaratara tiko ga kei John kei Jean Newbold. Ena veiyabaki kece oqo, au vakila na reki ena vuku ni loloma era a solia vei au. Era vakila na reki nira raici au niu sa tubu tiko ena kosipeli. Oqo na ka e rawa ni yaco nida veiqaravi—o keda kei ira eda qarava eda sa veivolekati ka semati vakalevu cake kina iVakabula.

E vakavulica na iVakabula, “Raica sa ka talei ena mata ni Kalou na tamata kecega.

“Ia kevaka drau sa vunau tiko ena nomudrau bula taucoko ka sa saumaki mai kina e dua na tamata, sa na vuabale sara na nomudrau marau e na matanitu i Tamaqu!” (Vunau kei na Veiyalayalati 18:10, 15; vakamatatataki).

Kevaka e sega ni vakaliuci vei iko na veiqaravi, e vakavulica o Peresitedi Russell M. Nelson ni “rawa nida vinaka cake ka vinaka cake mai na veigauna sa oti.” Au sureti kemuni moni veisau ka cega e dua na draunipepa vou. Au yalataka ni gauna o vakaitavi kina ena veiqaravi, ko na kunea na iwali ni bolebole o sotava tiko ena gauna oqo.

E dina na nona yalayala na iVakabula: “Ia ko koya yadua sa via maroroya na nona bula, ena vakayalia: ia ko koya yadua ena vakayalia na nona bula ena vukuqu, ena maroroya.” (Maciu 16:25).

Ena veivuke ni iVakabula, sa rawa mo yaco mo dua na mataqali tacida se ganena dauveiqaravi e gadreva o Koya mo vakataka mo cakava e dua na veisau ena nodra bula na luvena na Tamada Vakalomalagi—o ira yadua kei ira yadua na kenatalei.